នាយឧត្តមសេនីយ៍ គៀត ច័ន្ទថារិទ្ធ ជួបប្រជុំពិភាក្សាការងារជាមួយគណៈកម្មការកិច្ចការបរទេស នៅវិមានព្រឹទ្ធសភា

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ អញ្ជើញជួបប្រជុំពិភាក្សាការងារជាមួយគណៈកម្មការកិច្ចការបរទេស សហប្រតិបត្តិការអន្ដរជាតិ ឃោសនា និងព័ត៌មាន នៃព្រឹទ្ធសភា នៅវិមានព្រឹទ្ធសភា

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ រួមជាមួយឯកឧត្តម អគ្គនាយករងអន្តោប្រវេសន៍មួយចំនួន នាព្រឹកថ្ងៃអង្គារ ២កើត ខែផល្គុន ឆ្នាំខាល ចត្វាស័ក ពុទ្ធស័ករាជ២៥៦៦ ត្រូវនឹងថ្ងៃទី២១ ខែកុម្ភៈ ឆ្នាំ២០២៣ បានអញ្ជើញជួបប្រជុំពិភាក្សាការងារជាមួយគណៈកម្មការកិច្ចការបរទេស សហប្រតិបត្តិការអន្ដរជាតិ ឃោសនា និងព័ត៌មាន នៃព្រឹទ្ធសភា ដឹកនាំដោយលោកជំទាវកិត្តិនីតិកោសលបណ្ឌិត ទី បូរ៉ាស៉ី ប្រធានគណៈកម្មការកិច្ចការបរទេស សហប្រតិបត្តិការអន្ដរជាតិ ឃោសនា និងព័ត៌មាន (គណៈកម្មការទី៥) នៃព្រឹទ្ធសភា ព្រមទាំងមានវត្តមានចូលរួមពីឯកឧត្តម លោកជំទាវអនុប្រធាន សមាជិក សមាជិកា និងលេខាធិការគណៈកម្មការទី៥ នៃព្រឹទ្ធសភាជាច្រើនរូបទៀតផងដែរ។

ថ្លែងក្នុងឱកាសនោះ លោកជំទាវកិត្តិនីតិកោសលបណ្ឌិត ទី បូរ៉ាស៉ី បានសម្ដែងនូវការស្វាគមន៍ចំពោះគណៈប្រតិភូនៃអគ្គនាយកដ្ឋានអន្តោប្រវេសន៍ និងថ្លែងអំណរគុណចំពោះសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានអនុញ្ញាតឲ្យថ្នាក់ដឹកនាំនៃអគ្គនាយកដ្ឋានអន្តោប្រវេសន៍ចូលរួមកិច្ចប្រជុំពិភាក្សាការងារប្រចាំឆ្នាំជាមួយគណៈកម្មការទី៥ នៃព្រឹទ្ធសភា តបតាមការអញ្ជើញរបស់គណកម្មការនាពេលនេះ។ លោកជំទាវប្រធានគណៈកម្មការទី៥ ក៏បានសម្តែងនូវការកោតសរសើរ និងវាយតម្លៃខ្ពស់ចំពោះលទ្ធផលការងារដែលអគ្គនាយកដ្ឋានអន្ដោប្រវេសន៍ នៃក្រសួងមហាផ្ទៃ សម្រេចបាននាពេលកន្លងមក ជាពិសេសកិច្ចខំប្រឹងប្រែងបំពេញភារកិច្ចរបស់ថ្នាក់ដឹកនាំគ្រប់លំដាប់ថ្នាក់ និងមន្ត្រីនគរបាលអន្តោប្រវេសន៍គ្រប់រូបក្នុងកំឡុងពេលនៃវិបត្តិជំងឺកូវីដ១៩ ជាសកល ក៏ដូចជាពេលបច្ចុប្បន្ននេះផងដែរ។

បន្ទាប់មក ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានធ្វើសេចក្តីរាយការណ៍អំពីលទ្ធផលការងាររបស់អគ្គនាយដ្ឋានអន្តោប្រវេសន៍ក្នុងឆ្នាំ២០២២ លើកិច្ចការសំខាន់ៗមួយចំនួនដែលរួមមាន៖
១-ការងារគ្រប់គ្រងការចេញ-ចូលប្រទេស
២-ការងារគ្រប់គ្រងវត្តមានស្នាក់នៅរបស់ជនបរទេស
៣-ការងារអធិការកិច្ចហត្ថពលកម្មបរទេស
៤-ការងារគ្រប់គ្រងជនភៀសខ្លួន
៥-ការងារស្រាវជ្រាវ ស៊ើបអង្កេត និងអនុវត្តនីតិវីធី
៦-ដំណើរការនៃការរៀបចំសេចក្តីព្រាងច្បាប់ស្តីពីអន្តោប្រវេសន៍ថ្មី។

នៅចុងបញ្ចប់ លោកជំទាវកិត្តិនីតិកោសលបណ្ឌិត ទី បូរ៉ាស៉ី បានថ្លែងនូវការកោតសរសើរ និងអរគុណចំពោះឯកឧត្តម អគ្គនាយកអន្តោប្រវេសន៍ ដែលបានធ្វើសេចក្តីរាយការណ៍អំពីលទ្ធផលការងារ និងឆ្លើយតបនូវសំនួររបស់គណៈកម្មការទី៥ ទាក់ទងនឹងកិច្ចការងារមួយចំនួនរបស់អគ្គនាយកដ្ឋានអន្ដោប្រវេសន៍។

ជាការឆ្លើយតប ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ជំនួសមុខឲ្យថ្នាក់ដឹកនាំ និងមន្ដ្រីនគរបាលទាំងអស់ នៃអគ្គនាយកដ្ឋានអន្ដោប្រវេសន៍ បានបញ្ជាក់អំពីការប្ដេជ្ញាចិត្តខ្ពស់ក្នុងការបន្តអនុវត្តតួនាទីភារកិច្ចរបស់ខ្លួន ដែលក្រសួងមហាផ្ទៃ និងរាជរដ្ឋាភិបាលបានប្រគល់ជូន សំដៅចូលរួមឲ្យសកម្មក្នុងការការពារសន្ដិសុខជាតិ សុវត្ថិភាព សណ្តាប់ធ្នាប់សង្គម និងអនុវត្តនយោបាយជាតិផ្សេងៗទៀត ទាក់ទងនឹងវិស័យទេសចរណ៍ សេដ្ឋកិច្ច និងសង្គមកិច្ចជាដើម ៕