កម្ពុជានាំយកអង្ករ និងផលិតផលធ្វើពីអង្ករ ចូលរួមការតាំងពិព័រណ៍នៅឌូបៃ ជាលើកដំបូង

ភ្នំពេញ៖ សហព័ន្ធស្រូវអង្ករកម្ពុជា ចូលរួមការតាំងពិព័រណ៍ GULFOOD FAIR នៅទីតាំងមជ្ឈមណ្ឌលពាណិជ្ជកម្ម ពិភពឌូបៃ (DUBIA WORLD TRADE CENTER) រយៈពេល៤ថ្ងៃដោយនាំយកអង្ករ និងផលិតផលធ្វើអំពីអង្ករ មកដាក់តាំងបង្ហាញ។

GULFOOD FAIR គឺជាព្រឹត្តិការណ៍តាំងពិព័រណ៍ដ៏ធំជាងគេសម្រាប់តំបន់មជ្ឈឹមបូព៌ា ដែលព្រឹត្តការណ៍ ឆ្នាំ២០២៣ នេះ គឺជាកម្មវិធីលើកទី២៨ ប្រព្រឹត្តឡើងពីថ្ងៃទី២០ ដល់ ថ្ងៃទី២៤ ខែកុម្ភៈ ឆ្នាំ២០២៣ និងមានការចូលរួមពី ក្រុមហ៊ុនធំៗ លំដាប់ពិភពលោកផ្នែកចំណីអាហារចំនួនជាង ៥ ០០០ ក្រុមហ៊ុន មកពីប្រទេសចំនួន ១២៥។ ការចូលរួម GULFOOD គឺជាការចូលរួមលើកទី១ របស់សហព័ន្ធស្រូវអង្ករកម្ពុជា ហើយក៏ជាលើកទី១ របស់តំណាងវិស័យឯកជនពីប្រទេសកម្ពុជាផងដែរ

ការចូលរួមរបស់សហព័ន្ធស្រូវអង្ករកម្ពុជា នៅក្នុងព្រឹត្តការណ៍ ពិព័រណ៍ចំណីអាហារ GULFOOD FAIR គឺកំពុងអនុវត្តន៍ឱ្យទាន់ពេលវេលា ដែល រាជរដ្ឋាភិបាលកំពុងខិតខំប្រឹងប្រែងបើកទីផ្សារជូនប្រទេសកម្ពុជា នៅតំបន់មជ្ឈឹមបូព៌ា។

ជាមួយគ្នានេះ នៅថ្ងៃទី២១ ខែកុម្ភៈ ឆ្នាំ២០២៣នេះ លោកស្រី តឹករ៉េត កំរង រដ្ឋលេខាធិការ ក្រសួងពាណិជ្ជកម្ម បានដឹកនាំគណៈប្រតិភូអន្តរក្រសួង ធ្វើការទស្សនកិច្ចតាមស្តង់របស់សហព័ន្ធស្រូវអង្ករកម្ពុជា នៅក្នុងកម្មវិធីការតាំងពិព័រណ៍នេះផងដែរ ស្របពេលដែលលោកស្រី បានដឹកនាំក្រុមចចាររបស់កម្ពុជាទៅចរចាកិច្ចព្រមព្រៀង ពាណិជ្ជកម្មសេរី កម្ពុជា-អារ៉ាប់រួម នៅប្រទេសអារ៉ាប់រួម។

ដើម្បីចូលរួមលើកស្ទួយ និងជំរុញដល់ផលិតផលកម្ពុជា នៅក្នុងទីផ្សារមជ្ឈឹមបូព៌ា ក៏ដូចទីផ្សារផ្សេងៗ នៅក្នុងពិពភលោក ទោះបីជាកម្មវិធីដ៏មមាញឹក លើកិច្ចប្រជុំចចារ ក៏ដោយ តែលោកស្រីនៅតែដឹកនាំគណៈប្រតិភូអន្តរក្រសួងរួមមាន ក្រសួងការបរទេស និងកិច្ចសហប្រតិបត្តិការអន្តរជាតិ ក្រសួងពាណិជ្ជកម្ម ក្រសួងឧស្សាហកម្ម បច្ចេកវិទ្យា និងនរវានុវត្តន៍ ក្រសួងកសិកម្ម រុក្ខាប្រមាញ់ និងនេសាទ អគ្គនាយកដ្ឋានគយ និងរដ្ឋាករកម្ពុជា។ចំនួន ១៥រូប មកទស្សនាស្តង់របស់សហព័ន្ធស្រូវ អង្ករកម្ពុជាដោយផ្ទាល់៕