ឯកឧត្តម ខៀវ កាញារីទ្ធបានលើកឡើងថា ការអានសៀវភៅ បានផ្ដល់ចំណេះដឹងនិងធ្វើឱ្យខួរក្បាល មានការចងចាំបានលឿន

ភ្នំពេញ៖ ឯកឧត្តមខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា បច្ចុប្បន្នការអានសម្រាប់ឯកឧត្តម គឺ៩០ភាគរយ អានតាមប្រព័ន្ធអេឡិកត្រូនិច តែក៏នៅត្រូវការទិញសៀវភៅមកអានដែរ ព្រោះងាយស្រួលចំណាំទុកកន្លែងដែលសំខាន់ៗ ទុកបើកមើលលើកក្រោយទៀត ហើយការអាន សៀវភៅក៏ជួយធ្វើការរំលឹកឡើងវិញនូវកិច្ចការមួយចំនួនថែមទៀតផងដែរ ។
ការថ្លែងបែបនេះ ធ្វើឡើងនៅក្នុងឱកាសឯកឧត្តមអញ្ជើញជាអធិបតីក្នុងពិធីសម្ពោធការតាំងពិព័រណ៍លក់សៀវភៅដ៏បំផុតលំដាប់ពិភពលោក «Big Bad Wold Cambodia» ថ្ងៃទី២២ ខែកុម្ភៈ ឆ្នាំ២០២៣ នៅក្នុងផ្សារទំនើបអូឡាំព្យា ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
ឯកឧត្តម មានមកដល់ថ្ងៃនេះ អាចនិយាយបានថា ៥០ភាគរយ បានមកពីការសិក្សានៅសាលា ហើយ៥០ភាគរយទៀតបានដោយសារការអានសៀវភៅ បើប្រៀបធៀបពីសម័យមុន និងសម័យឥឡូវនេះ សៀវភៅសម្បូរជាងរាប់ពាន់ដង ហើយគុណភាព លើស ១ម៉ឺនដង ព្រោះការបោះពុម្ព និងរចនាសៀវភៅស្អាតៗ ហើយជាភាសាខ្មែរថែមទៀតផង។ ទាក់ទងការអានសៀវភៅនេះដែរ ឯកឧត្តម បានលើកឡើងថា តាមការស្រាវជ្រាវផ្នែកចិត្តសាស្ត្រ បើយើងមើលទូរទស្សន៍ ខួរក្បាលយើង៩០ភាគរយ តាមរូបភាព អត់មានពេលវិភាគនោះទេ តែបើការអានវិញគឺ៣០ភាគរយ សម្រាប់ការអាន ហើយ ៧០ភាគរយសម្រាប់ធ្វើការវិភាគ។ ការអានសៀវភៅមានផលប្រយោជន៍ច្រើនណាស់ មិនត្រឹមតែធ្វើឱ្យចេះដឹងនោះទេ ថែមទាំងធ្វើឱ្យខួរក្បាលយើងរីក វិវឌ្ឍរឿង ទៀតផង។
សូមជម្រាបថា ពិព័រណ៍សៀវភៅនេះ នឹងបើកឱ្យសាធារណជនចូលរួមដោយសេរី ចាប់ពីថ្ងៃទី២២ ខែកុម្ភៈ ឆ្នាំ២០២៣ ដល់ថ្ងៃទី១២ ខែមិនា ឆ្នាំ២០២៣ ចាប់ពីម៉ោង៩ព្រឹករហូតដល់ម៉ោង១២យប់៕