សាធារណរដ្ឋកូរ៉េ ផ្តល់គ្រឿងចក្រវិស្វកម្មដល់មជ្ឈណ្ឌលជាតិរក្សាសន្តិភាព សម្រាប់ការហ្វឹកហ្វឺន

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព នាព្រឹកថ្ងៃទី២៣ ខែកុម្ភៈ ឆ្នាំ២០២៣ បានផ្តល់វត្តមានខ្ពង់ខ្ពស់ធ្វើជាសក្សីទទួលគ្រឿងចក្រវិស្វកម្ម ដែលជាជំនួយឥតសំណងរបស់សាធារណរដ្ឋកូរ៉េ ដល់មជ្ឈមណ្ឌលជាតិរក្សាសន្តិភាព ក្នុងគោលបំណងផ្ដល់ការហ្វឺកហ្វឺនដល់កម្លាំងរក្សាសន្តិភាពកម្ពុជា ឱ្យក្លាយជាគ្រូបង្គោលសម្រាប់អនុវត្តគម្រោងហ្វឹកហ្វឺនត្រីភាគី អ.ស.ប កូរ៉េ-កម្ពុជា នាចុងឆ្នាំ២០២៣នេះ ជាពិសេស ដើម្បីពង្រឹងសមត្ថភាពជំនាញវិស្វកម្ម សម្រាប់ប្រតិបត្តិការរក្សាសន្តិភាព អង្គការសហប្រជាជាតិ។

រឿងចក្រទាំងនេះនឹងបម្រើឱ្យការងារហ្វឹកហ្វឺនមុននឹងចល័តកងកម្លាំងទៅតំបន់បេសកកម្មកាន់តែមានប្រសិទ្ធភាព ដ្បិតកម្លាំងទាំងអស់ ត្រូវប្តូរវេនជារៀងរាល់ឆ្នាំ និងតម្រូវឱ្យទទួលបានការហ្វឹកហ្វឺនមុនចល័ត ដើម្បីដើរឱ្យទាន់សភាពការណ៍ មុននឹងធ្វើយុទ្ធដំណើរទៅកាន់តំបន់បេសកកម្ម។

ឯកឧត្តម នាយឧត្តមសេនីយ៍ សែម សុវណ្ណនី បានមានប្រសាសន៍ក្នុងពិធីទទួលគ្រឿងចក្រវិស្វកម្មធុនធ្ងន់ពីសាធារណរដ្ឋកូរ៉េថា ការមកដល់នៃគ្រឿងចក្រវិស្វកម្មនាពេលនេះ គឺជាសក្ខីភាព ក្រោយពីអនុស្សរណនៃការយោគយល់ ស្ដីពីប្រតិបត្តិការរក្សាសន្តិភាព រវាងកម្ពុជា-កូរ៉េ និងការផ្ទេរប្រគល់គ្រឿងចក្រវិស្វកម្ម ក្រោមគម្រោងហ្វឹកហ្វឺនត្រីភាគី អសប ដែលត្រូវបានចុះហត្ថលេខាជាផ្លូវការ ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ឯកឧត្តម លី ចង ស៊ុប (Lee Jong-Sup) រដ្ឋមន្ត្រីការពារជាតិ នៃសាធារណរដ្ឋកូរ៉េ កាលពីថ្ងៃទី២៤ ខែវិច្ឆិកា ឆ្នាំ២០២២ អំឡុងពេលកិច្ចប្រជុំរដ្ឋមន្រ្តីការពារជាតិអាស៊ានបូក ក្នុងទឹកដីខេត្តសៀមរាប។

ជំនួយឥតសំណងរបស់សាធារណរដ្ឋកូរ៉េខាងត្បូងនេះ មិនត្រឹមតែសម្រាប់អនុវត្តគម្រោងត្រីភាគីប៉ុណ្ណោះទេ តែក៏បានឆ្លុះបញ្ចាំងពីការរួមចំណែកអនុវត្តឱ្យមានប្រសិទ្ធភាព “សកម្មភាពដើម្បីសន្តិភាពបូក” ដែលបានកែតម្រូវថ្មី ដោយ អសប ដែលសង្កត់ធ្ងន់លើ៖
ទី១-លើការពង្រឹងភាពជាដៃគូរ ទាំងទ្វេរភាគី និងពហុភាគី។
ទី២-ការផ្ដល់ទំនុកចិត្ត និងពង្រឹង សមត្ថភាពដល់កម្លាំងរក្សាសន្តិភាព ឱ្យអនុវត្តភារកិច្ចប្រកបដោយប្រសិទ្ធិភាព និងសុវត្តិភាព ជាពិសេស បង្ហាញពីការតាំងចិត្ត ដ៏មុះមុតរបស់រដ្ឋាភិបាលកូរ៉េអំឡុងពេលដែលសាធារណរដ្ឋកូរ៉េបានធ្វើជាម្ចាស់ផ្ទះលើកិច្ចប្រជុំថ្នាក់រដ្ឋមន្ត្រីស្ដីពីការរក្សាសន្តិភាព កាលពីខែធ្នូ ឆ្នាំ២០២១។

ឯកឧត្តម នាយឧត្តមសេនីយ៍ បានថ្លែងអំណរគុណចំពោះរដ្ឋាភិបាល កងទ័ព និងប្រជាជននៃសាធារណរដ្ឋកូរ៉េ ក្នុងការជួយឧបត្ថម្ភគាំទ្រ ដល់មជ្ឈមណ្ឌលជាតិរក្សាសន្តិភាព ដើម្បីបន្តរួមចំណែកក្នុងកិច្ចការរក្សាសន្តិភាព ដើម្បីបុព្វហេតុសន្តិភាព និងសន្តិសុខក្នុងលោក ៕