បណ្ឌិត ថោង ខុន៖ កម្ពុជាត្រៀមខ្លួនជាង៦ឆ្នាំ ដើម្បីធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម

ភ្នំពេញ៖ ឯកឧត្ដមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) និងជាអនុប្រធានអចិន្ត្រៃយ៍ គណៈកម្មាធិការជាតិរៀបចំកីឡា ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (CAMSOC-CAMAPGOC) មានប្រសាសន៍ថា កម្ពុជាបានត្រៀមខ្លួនគ្រប់ទម្រង់ការងារទាំងអស់ អស់រយៈពេលជាង៦ឆ្នាំ ដើម្បីឆ្ពោះទៅទទួលរៀបចំការប្រកួតកីឡាស៊ីហ្គេម នាខែឧភា និងអាស៊ានប៉ារ៉ាហ្គេម នាខែមិថុនា ឆ្នាំ២០២៣។

ការឲ្យដឹងបែបនេះរបស់ឯកឧត្ដម ធ្វើឡើងនៅក្នុងសន្និសីទសារព័ត៌មាន កាលព្រឹកថ្ងៃទី២៣ ខែកុម្ភៈ ឆ្នាំ២០២៣ ដែលរៀបចំឡើងដោយក្លិបអ្នកកាសែតកម្ពុជា សហការជាមួយគណៈកម្មាធិការជាតិអូឡាំពិកកម្ពុជា។

ឯកឧត្ដមបណ្ឌិត ថោង ខុន បានគូសបញ្ជាក់ថា នេះជាការសន្យារបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ចំពោះសមាជិកអាស៊ីអាគ្នេយ៍ទាំងអស់ ហើយកម្ពុជាបានសម្រេចធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម នាខែឧសភា និងខែមិថុនា ឆ្នាំ២០២៣ ដែលជាប្រវត្តិសាស្ត្រដំបូង ក្រោយរង់ចាំ ៦៤ឆ្នាំ។

ឯកឧត្ដមបន្ថែមថា រាជរដ្ឋាភិបាលកម្ពុជា បានសម្រេចបង្កើតគណៈកម្មាធិការជាតិ CAMSOC និងបានអនុម័តផែនការមេស៊ីហ្គេម ២០២៣ កាលពីឆ្នាំ២០១៦ ហើយចាប់តាំងពីឆ្នាំ២០១៧មក ដោយមិត្តចិនបានសាង់សងពហុកីឡដ្ឋានជាតិមរតកតេជោ ក្នុងរយៈពេល ៤០ខែ ហើយបានសាងសង់រួច នៅចុងឆ្នាំ២០២១ កន្លងទៅ ដែលនេះជាសមិទ្ធផលដ៏ធំធេង និងជាកន្លែងប្រារព្ធពិធីបើក-បិទជាផ្លូវការស៊ីហ្គេម ឆ្នាំ២០២៣ ដែលនឹងចូលមកដល់នាថ្ងៃទី៥ ខែឧសភា ឆ្នាំ២០២៣៕