ឯកឧត្ដម ថោង ខុន ជំនួបជាមួយអង្គការសមាគមសហប្រតិបត្តិការជប៉ុន-កម្ពុជា សម្ដែងការចង់ចូលរួមជួយពង្រីកការបណ្តុះបណ្តាលជំនាញទេសចរណ៍នៅកម្ពុជា

ភ្នំពេញ៖ ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ នៅថ្ងៃទី២៤ ខែកុម្ភៈ ឆ្នាំ២០២៣នេះ លោកបានអនុញ្ញាតឱ្យប្រតិភូអង្គការសមាគមសហប្រតិបត្តិការជប៉ុន.កម្ពុជា ដែលដឹកនាំដោយលោកបណ្ឌិត Fumio Yamada ប្រធានអង្គការសមាគមសហប្រតិបត្តិការជប៉ុន.កម្ពុជា [JCIA] និងសហការីចូលរួមសម្តែងការគួរសម និងពិភាក្សាការងារ នាទីស្តីការក្រសួងទេសចរណ៍។

នៅក្នុងកិច្ចជំនួបនោះ លោកបណ្ឌិត[ Fumio Yamada ]បានថ្លែងអរគុណដល់ ឯកឧត្ដមរដ្ឋមន្ត្រី ថោង ខុន ដែលបានអនុញ្ញាតឱ្យលោក និងសហការីចូលជួយសម្តែងការគួរសមនាឱកាសនេះ ដោយលោកក៏បានបញ្ជាក់ថា អង្គការសមាគមសហប្រតិបត្តិការជប៉ុន.កម្ពុជា ក្រៅពីការជួយរៀបចំកម្មវិធីបណ្តុះបណ្តាលជំនាញវិជ្ជាជីវៈលើកផ្នែកជំនាញសម្រាប់ថែទាំមនុស្សចាស់ដល់ប្រជាជនកម្ពុជាហើយនោះ JCIA ក៏មានគម្រោងជួយពង្រីកការបណ្តុះបណ្តាលបន្ថែមផ្នែកជំនាញទេសចរណ៍នៅកម្ពុជាផងដែរ។

ជាមួយនឹងរឿងការជួយពង្រីកការបណ្តុះបណ្តាលបន្ថែមទៅលើជំនាញទេសចរណ៍នេះ លោកបណ្ឌិត Fumio Yamada ក៏បានស្នើសុំឯកឧត្ដមរដ្ឋមន្ត្រី ថោង ខុន ជួយផ្តល់នូវមន្ត្រីជំនាញក្នុងការជួយដល់សាលាបណ្តុះបណ្តាលរបស់លោក ដើម្បីឱ្យសិក្ខាកាមបានចូលរៀនកាន់តែច្រើន និងទទួលបានប្រសិទ្ធភាពខ្ពស់។ លោកក៏បានអះអាងដែរថា ក្រោយការបណ្តុះបណ្តាលសិក្ខាកាមឱ្យមានជំនាញហើយនោះ លោកនឹងជ្រើសរើសសិក្ខាកាមនោះឱ្យទៅធ្វើការនៅសណ្ឋាគាររបស់លោកនៅក្នុងប្រទេសជប៉ុនតែម្តង។

ឯកឧត្ដមរដ្ឋមន្ត្រី ថោង ខុន ក៏បានថ្លែងអរគុណដល់រដ្ឋាភិបាលជប៉ុន ដែលតែងតែជួយគាំទ្រដល់កម្ពុជា និងបានកោតសរសើរ និងគាំទ្រទាំងស្រុងសម្រាប់គម្រោងដែលអង្គការសមាគមសហប្រតិបត្តិការជប៉ុន.កម្ពុជា ចង់ចូលរួមជួយពង្រីកការបណ្តុះបណ្តាលបន្ថែមទៅលើជំនាញទេសចរណ៍នៅកម្ពុជា ។

នេះបើយោងតាមឯកឧត្ដមរដ្ឋមន្ត្រី ថោង ខុន, នៅក្នុងអាស៊ានបានដាក់ចេញនូវកម្មវិធីមួយដែលជាកម្មវិធីរួមរបស់អាស៊ាន ហើយសម្រាប់កម្មវិធីនេះក្រសួងទេសចរណ៍ជាអ្នកដឹកនាំពិនិត្យ និងវាយតម្លៃលើសាលាដែលជាដៃគូររបស់ក្រសួងទេសចរណ៍ កម្មវិធីនេះគឺមានការពាក់ព័ន្ធទៅនឹងវិស័យសណ្ឋាគារ និងកម្មវិធីផ្សេងៗទៀតដែលរហូតដល់ ៣២មុខជំនាញ ហើយក្រសួងទេសចរណ៍ គឺជាអ្នកនាំមុខក្នុងការវាយតម្លៃលើការសិក្សានេះ ហើយក្រោយជាប់លើការវាយតម្លៃនេះ សិក្ខាកាមនឹងទទួលបានវិញ្ញាបនបត្របញ្ជាក់ និងអាចយកដើម្បីស្វែងរកកាងារធ្វើនៅក្នុងបណ្ដាលប្រទេសអាស៊ានបានផងដែរ។

បើតាមការគូសបញ្ជាក់របស់ឯកឧត្ដមរដ្ឋមន្ត្រី ថោង ខុន ជាគោលដៅរបស់អាស៊ាន គឺចង់ឱ្យសេវាទេសចរណ៍នៅក្នុងអាស៊ាន មានគុណភាព និងឱ្យអាស៊ានមានគោលដៅតែមួយក្នុងការបង្កើតកម្មវិធីទេសចរណ៍នេះឡើង។ ជាមួយគ្នានោះឯកឧត្ដមក៏បានថ្លែងអរគុណដល់រដ្ឋាភិបាលជប៉ុន ដែលតែងជួយដល់កម្ពុជា និងជួយឱ្យប្រជាពលរដ្ឋកម្ពុជាមានការងារធ្វើកាន់តែច្រើនផងដែរ។

ឯកឧត្ដម ថោង ខុន ក៏បានបង្ហាញក្តីសង្ឃឹមដែរថា សិក្ខាកាមបន្ទាប់ពីបានរៀននៅក្នុងសាលាបណ្តុះបណ្តាលរបស់អង្គការសមាគមសហប្រតិបត្តិការជប៉ុន-កម្ពុជា (JCIA)រួច​ និងបន្តទៅធ្វើការនៅជប៉ុន ហើយក្រោយត្រឡប់មកវិញ និងទទួលបានចំណេះដឹងកាន់តែច្រើន ហើយធ្វើការកាន់តែមានប្រសិទ្ធខ្ពស់ផងដែរ។។