លោកជំទាវ មិថុនា ភូថង អញ្ជើញប្រារព្ធទិវាជាតិសុខភាពមាតា ទារក និងកុមារ ២១កុម្ភៈ ឆ្នាំ២០២៣

ភ្នំពេញ៖ លោកជំទាវ មិថុនា ភូថង ប្រធានគណ:កម្មាធិការសាខាខេត្តកោះកុង រួមដំណើរជាមួយ លោកស្រី ទួត ហាទីម៉ា ប្រធានគណៈកម្មាធិការអនុសាខា ក្រុមការងារឥស្សជនឆ្នើមថ្នាក់ខេត្ត ក្រុមការងារសុខាភិបាល មន្រ្តីសាខា អនុសាខា អ្នកស្ម័គ្រចិត្ត និងយុវជនកាកបាទក្រហម នារសៀលថ្ងៃសុក្រ ថ្ងៃទី២៤ ខែកុម្ភៈ ឆ្នាំ២០២៣ បានអញ្ជើញប្រារព្ធទិវាជាតិសុខភាពមាតា ទារក និងកុមារ ២១កុម្ភៈ ឆ្នាំ២០២៣ ក្រោមប្រធានបទ”ពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ និងការផ្តល់វ៉ាក់សាំងបង្ការជំងឺកូវីដ-១៩ ជូនស្ត្រីមានផ្ទៃពោះ និងមាតាកំពុងបំបៅកូនដោយទឹកដោះម្តាយ” នៅសាលាស្រុកថ្មបាំង ស្ថិតនៅឃុំឬស្សីជ្រុំ ស្រុកថ្មបាំង ខេត្តកោះកុង  ដោយមានការចូលរួមពីស្ត្រីមានផ្ទៃពោះ ស្រ្តីមានកូនតូច ចំនួន ២៥នាក់។

ក្នុងឱកាសនេះដែរ ក្រុមគ្រូពេទ្យផ្នែកសម្ភព ប្រចាំមណ្ឌលសុខភាពឬស្សីជ្រុំ បានឡើងផ្សព្វផ្សាយពីការអប់រំ សុខភាពបន្តពូជ និងការថែទាំសុខភាព មាតា ទារក កុមារ និងអាហាររូបត្ថម្ភ។

ជាមួយគ្នានេះ លោកជំទាវ មិថុនា ភូថង បានពាំនាំប្រសាសន៍ផ្ដាំផ្ញើសួរសុខទុក្ខ និងក្តីនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាប្រធានក្រុមការងារឥស្សជនឆ្នើមថ្នាក់ជាតិ ជូនចំពោះស្រ្តីមានផ្ទៃពោះ ស្រ្តីមានកូនតូច កុមារកំព្រា ជនពិការ និងអ្នកផ្ទុកមេរោគអេដស៍ ព្រមទាំងបានអានសារលិខិតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា ក្នុងទិវាជាតិសុខភាពមាតា ទារក និងកុមារ ២១កុម្ភៈ ឆ្នាំ២០២៣ សារលិខិតសម្តេចកិត្តិព្រឹទ្ធបណ្ឌិត ផ្តោសំខាន់ការរៀបចំផែនការសកម្មភាព ស្តីពីការថែទាំសុខភាពមាតា ទារក កុមារ យុវ័យ និងអារូបត្ថម្ភ។លោកជំទាវ ក៏រំលឹកដល់ស្ដ្រីមានផ្ទៃពោះ ស្ដ្រីមានកូនតូច ទៅពិនិត្យសុខភាពឧ្យបានទៀងទាត់ដើម្បីចៀសផុតបញ្ហាផ្សេងនៅពេលសម្រាល។

ឆ្លៀតក្នុងឱកាសនេះ លោកជំទាវ ប្រធាន បានក្រើនរំលឹកដល់ បងប្អូនស្ត្រី ជាមាតាទាំងអស់ ត្រូវបន្ត “រស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩” ដោយត្រូវថែទាំសុខភាពអោយបានរឹងមាំ និងអនុវត្តអោយបានខ្ជាប់ខ្ជួនតាមវិធានសុខាភិបាល “៣ការពារ ៣កុំ ” និងចូលរួមចាក់វ៉ាក់សាំង ដូសជំរុញ តាមវេន ដើម្បីទប់ស្កាត់ បង្ការ ជំងឺកូវីដ-១៩ ឱ្យបានគ្រប់ៗគ្នា ។

ជាចុងក្រោយ លោកជំទាវប្រធាន និងក្រុមការងារបានផ្តល់អំណោយមនុស្សធម៌ជូនដល់ស្រ្តីមានផ្ទៃពោះ ស្ត្រីមានកូនតូច ចំនួន ២៥នាក់ ក្នុងមួយម្នាក់ទទួលបាន៖ មី១កេស, ទឹកផ្លែឈើស្រស់ ១២កំប៉ុង, ឃីតកូនង៉ែត ១ឈុត, សាប៊ូម្សៅ ១កញ្ចប់, សាប៊ូកូនក្មេង ១ដប, ប្រេងកូឡា ១ដប, កន្សែងពោះគោ១ ព្រមទាំងថវិកាចំនួន ៥ម៉ឺនរៀលដូចៗគ្នាផងដែរ ៕