អំណោយមនុស្សធម៌ពីកាកបាទក្រហមកម្ពុជា ផ្ដល់ជូនប្រជាពលរដ្ឋងាយរងគ្រោះបំផុតចំនួន ១២១គ្រួសារ នៅឃុំទួលអំពិល ស្រុកបរសេដ្ឋ ខេត្តកំពង់ស្ពឺ
ភ្នំពេញ៖ បន្ទាប់ពីទទួលបានសំណើរពីសាខាកាកបាទក្រហមកម្ពុជា ខេត្តកំពង់ស្ពឺ មានប្រជាពលរដ្ឋត្រូវការឲ្យជួយ កាកបាទក្រហមកម្ពុជា ដែលមាន ហ្លួងម៉ែ នរោត្ត មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសាខាកាកបាទក្រហមកម្ពុជា ខេត្តកំពង់ស្ពឺ នាព្រឹកថ្ងៃសៅរ៍ ទី២៥ ខែកុម្ភៈ ឆ្នាំ២០២៣នេះ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ជូន ប្រជាពលរដ្ឋងាយរងគ្រោះបំផុត ចំនួន ១២១គ្រួសារ មកពី១៥ភូមិ ក្នុងឃុំទួលអំពិល ស្រុកបរសេដ្ឋ ខេត្តកំពង់ស្ពឺ។
ក្នុងពិធីសំណេះសំណាលជាមួយប្រជាពលរដ្ឋ លោកជំទាវអគ្គេខាធិការរងទី១ បាននាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ និងក្តីនឹក រលឹកជូនចំពោះបងប្អូនប្រជាពលរដ្ឋមានជីវភាពលំបាកទាំងអស់ និងតែងតែគិតគូរយកចិត្តទុកដាក់ជានិច្ច ចំពោះជនរងគ្រោះគ្រប់ប្រភេទ ដោយមិនបានប្រកាន់បក្សពួកជាតិសាសន៍ ឬនិន្នាការនយោបាយអ្វីឡើយ ហើយក្រៅពីការជួយសង្គ្រោះជនរងគ្រោះ ដោយគ្រោះមហន្តរាយ និងឧប្បទ្ទវហេតុផ្សេងៗនោះ ជនចាស់ជរាគ្មានទីពឹង ស្ត្រីមេម៉ាយកូនច្រើន ជនមានពិការភាព កុមារកំព្រា និងអ្នកផ្ទុកមេរោគអេដស៍ គឺជាមុខសញ្ញានៃការយកចិត្តទុកដាក់និងជួយសម្រាលនូវទុក្ខលំបាកលើបញ្ហាជីវភាពរស់នៅពីកាកបាទក្រហមកម្ពុជាផងដែរ។ ជាក់ស្តែងបងប្អូនទាំង១២១គ្រួសារ ដែលមកទទួលអំណោយពេលនេះ គឺជាគ្រួសារជួបការលំបាកខ្លាំង ដែលភាគច្រើនមានវ័យចាស់ៗ មិនអាចប្រកបរបអ្វីបាន ម៉្យាងទៀត រយៈពេលនេះគឺជាចន្លោះពេលនៃការរង់ចាំការប្រមូលផល ដែលនាំឲ្យជីវភាពបងប្អូនជួបការលំបាក ដោយការខ្វះខាតស្បៀងដូច្នេះហើយទើបកាកបាទក្រហមកម្ពុជា សម្រេចផ្តល់អំណោយជូនបងប្អូនក្នុងថ្ងៃនេះ។
ជាមួយគ្នានេះដែរ លោកជំទាវអគ្គលេខាធិការរងទី១ ក៏បានក្រើនរំឮកប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព ដោយបរិភោគអាហារដែលមានអនាម័យ ពិសារទឹកដាំឆ្អិន និងសូមនាំគ្នាទៅទទួលការចាក់វ៉ាក់សាំងការពារ ជំងឺកូវីដ-១៩ តាមពេលវេលាកំណត់ឲ្យបានគ្រប់ៗគ្នា ព្រោះថាថ្វីត្បិត តែប្រទេសយើងឆ្លងផុតពីគ្រោះថ្នាក់ធ្ងន់ធ្ងរនៃការរាត្បាតមេរោគកូវីដ-១៩ក៏ពិតមែន តែពីភពលោកទាំងមូលនៅតែបន្តការយាយីពីមេរោគនេះនៅឡើយ ដូចនេះយើងត្រូវការពារប្រសើរជាងព្យាបាល។
ទន្ទឹមនឹងនេះដែរ លោកជំទាវអគ្គលេខាធិការរងទី១ បានលើកឡើងពីករណីក្មេងស្រី អាយុ១១ឆ្នាំ នៅខេត្តព្រៃវែង ដែលបានបាត់បង់ជីវិត ដោយជំងឺផ្តាសាយបក្សី (H5N1) ដើម្បីដាស់ស្មារតីប្រុងប្រយ័ត្ន ចំពោះបងប្អូនដែលមានចិញ្ចឹមបក្សី(មាន់ ទា…)បើមានករណីបក្សីឈឺស្លាប់កុំយកមកបរិភោគត្រូវយកទៅកប់ឬដុតចោល ព្រោះបើសិនជាបក្សីទាំងនេះមានជំងឺវាអាចចម្លងមកយើងបាន។
អំណោយផ្តល់ជូន ប្រជាពលរដ្ឋជួបការ លំបាកទាំង១២១គ្រួសារ រួមមាន៖ អង្ករ ២៥គីឡូក្រាម, មីយើង ១កេស, ត្រីខ ១យួរ, ទឹកស៊ីអ៊ីវ ១យួរ, សាប៊ូដុសខ្លួន ១ដប និងឃីត១ ( មុង ភួយ សារុង និងក្រមារ)។ ជាមួយគ្នានេះដែរ ប្រជាពរដ្ឋ ទាំង១២១គ្រួសារ ទទួលបាន ក្រណាត់ស១ដុំ និងថវិកាចំនួន២ម៉ឺនរៀលបន្ថែមទៀតជាអំណោយរបស់សម្តេចតេជោ និងសម្តេចកិត្តិព្រឹទ្ធ បណ្ឌិត ផងដែរ ៕
