ឯកឧត្តមព្រុំ សុខា ៖ យើងមានថ្ងៃនេះដោយសារមានការដឹកនាំដ៏ឈ្លាសវៃត្រឹមត្រូវ របស់ថ្នាក់ដឹកនាំគណបក្សប្រជាជនកម្ពុជា
ក្រចេះ៖ ឯកឧត្តម ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះបានលើកឡើងថា យើងទាំងអស់គ្នាមានថ្ងៃនេះ ដោយសារការដឹកនាំដ៏ឈ្លាសវៃត្រឹមត្រូវ របស់ថ្នាក់ដឹកនាំគណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្សបានធ្វើឱ្យទេសជាតិមានសន្តិភាព និងការអភិវឌ្ឍលើវិស័យ។
ការថ្លែងបែបនេះ ក្នុងពិធីបោះឆ្នោតស្ទាបស្ទង់ជ្រើសរើសបេក្ខជនប្រធានភូមិថ្មី ដែលមានឈ្មោះថា ភូមិព្រែកសណ្តាយ ស្ថិតនៅក្នុងឃុំព្រែកសាម៉ាន់ ស្រុកឆ្លូង ខេត្តក្រចេះ ពីការចូលរួមរបស់ប្រជាពលរដ្ឋសមាជិកសមាជិកាប្រមាណជាង ៤៥០ នាក់កាលពីរសៀលថ្ងៃទី ២៥ កុម្ភៈ ឆ្នាំ ២០២៣ ។
ឯកឧត្តមបានបន្តថា សម្តេចតេជោហ៊ុនសែនបានដឹកនាំ ខិតខំកសាងស្ថាបនានូវហេដ្ឋារចនាសម្ព័ន្ធរូបវ័ននានាជាច្រើន ពីបាតដៃទទេឱ្យរីកចម្រើនដុះដាលពាសពេញតំបន់លើផ្ទៃប្រទេស ក្នុងនោះដែរស្ថិរភាពជីវភាពសេដ្ឋកិច្ចប្រជាជន ក៏បាននឹងកំពុងភាពធូរធាកើនឡើងពីមួយឆ្នាំទៅមួយឆ្នាំផងដែរ ដែលនេះសរបញ្ជាក់ឱ្យឃើញពីក្តីអាណិតស្រលាញ់ និងការយកចិត្តទុកដាក់ខ្ពស់ ស៊ូទ្រាំខាំស្មៅរួមសុខរួមទុក្ខជាមួយប្រជាជនខ្លួន មិនថាឋិតក្នុងកាលៈទេសៈណានោះទេ គណបក្សប្រជាជន និងសម្តេចតេជោ ហ៊ុន សែន នៅតែជាប់កៀកជិតនឹងប្រជាជន ។ “ ដូច្នេះយើងទាំងអស់គ្នាមិនត្រូវភ្លេចឡើយចំពោះគុណូបការៈ ដ៏ធំធេងមិនអាចកាត់ថ្លៃបានរបស់គណបក្សប្រជាជនកម្ពុជា“ ។
ឯកឧត្តមសូមឱ្យបន្តគាំទ្ររក្សាប្រៀបឈ្នះដោយបេះដូងយូរអង្វែង ទាំងនៅពេលបច្ចុប្បន្ននិងនាពេលអនាគត ជាពិសេសក្នុងឃុំព្រែកសាម៉ាន់នេះតែម្ដង ត្រូវប្តេជ្ញាបន្តរក្សាយកប្រៀបឈ្នះដាច់ ពង្រឹងសាមគ្គីភាព និងពូនជ្រុំជំនឿរឹងមាំចំពោះការដឹកនាំរបស់គណបក្សប្រជាជនកម្ពុជា ដើម្បីឈានទៅដណ្តើមជ័យជម្នះសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ខាងមុខ ។
នៅក្នុងឱកាសនោះដែរ ឯកឧត្តម ក៏បានផ្តាំផ្ញើនិងក្រើនរំលឹកដល់បេក្ខជនដែលនឹងជាប់ឈ្មោះដោយការពេញចិត្តបោះឆ្នោតគាំទ្រពីប្រជាពលរដ្ឋ សូមកុំភ្លេចការជឿទុកចិត្តចំពោះម្ចាស់សន្លឹកឆ្នោត ខិតខំបំពេញការងារ និងដឹកនាំទទួលខុសត្រូវខ្ពស់លើតួនាទីភារកិច្ចរបស់ខ្លួន ជាពិសេសត្រូវដឹកនាំផ្សព្វផ្សាយនិងអនុវត្តឱ្យបានខ្ជាប់ខ្ជួននូវគោលនយោបាយភូមិឃុំមានសុខសុវត្ថិភាព ដើម្បីសហគមន៍មូលដ្ឋានទទួលបានសុខសុវត្ថិភាព ស្ថេរភាព និងការអភិវឌ្ឍរីកចម្រើន ។
ឯកឧត្តមបញ្ជាក់ថា ការបោះឆ្នោតស្ទាបស្ទង់ជ្រើសរើសប្រធានភូមិនាពេលនេះ គឺជាការអនុវត្តនីតិវិធីប្រជាធិបតេយ្យ ដើម្បីចូលរួមចំណែកស្ទាបស្ទង់ការជ្រើសរើសប្រធានភូមិ ដែលប្រជាជនស្រឡាញ់ ហើយជាប្រធានភូមិដែលល្អសម្រាប់ប្រជាជនដើម្បីបម្រើប្រជាជន សំដៅកសាងសុខសន្តិភាពក្នុងភូមិ ឃុំ ចូលរួមបន្តថែរក្សាការពារឱ្យបានគង់វង្សនូវសុខសន្ដិភាព កសាងអភិវឌ្ឍមូលដ្ឋានជំរុញវឌ្ឍនភាព និងវិបុលភាពសម្រាប់អនាគតរុងរឿងរបស់សង្គមជាតិ ។
គូសបញ្ជាក់ដែរថា ៖ ស្រុកឆ្លូងទទួលបានសេចក្តីសម្រេចពីក្រសួងមហាផ្ទៃ ដើម្បីបង្កើតភូមិរដ្ឋបាលថ្មីចំនួន ០៣ ក្នុងនោះមាន ៖ ភូមិត្រពាំងបេង និងភូមិព្រែកសណ្តាយ បំបែកចេញពីភូមិឈើទាលភ្លោះ នៃឃុំព្រែកសាម៉ាន់ និងភូមិស្រែផល បំបែកចេញពីភូមិល្វាធំ នៃឃុំព្រែកសាម៉ាន់ ស្រុកឆ្លូង ខេត្តក្រចេះ ៕
