ឧត្តមសេនីយ៍ទោ សោម ស៊ុន ណែនាំដល់យោធិន និងគ្រួសារ ត្រូវភ្ជាប់តេឡេក្រាម ដើម្បីទទួលបានព័ត៌មានទាន់ពេលវេលា ពីសម្តេចតេជោ
ភ្នំពេញ៖ ក្នុងកិច្ចប្រជុំបូកសរុបលទ្ធផលការងារយោធាសន្តិសុខប្រចាំខែកុម្ភៈ និងដាក់ចេញនូវទិសដៅសម្រាប់អនុវត្តបន្តនៅក្នុងខែមីនាឆ្នាំ២០២៣ នាថ្ងៃទី២៧ ខែកុម្ភៈ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ណែនាំដល់យោធិនទាំងអស់ និងក្រុមគ្រួសារ ត្រូវភ្ជាប់បណ្ដាញតេឡេក្រាមដើម្បីទទួលបានព័ត៌មានទាន់ពេលវេលាពីសម្តេចតេជោ ហ៊ុន សែន នាយករដ្ឋន្ត្រីកម្ពុជា ។
លោកវរសេនីយ៍ទោ ស៊ុន សារិន នាយការិយាល័យទី៣ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងរាយការណ៍អំពីលទ្ធផលការងារយោធាសន្តិសុខ ដែលសម្រេចបានក្នុងខែកុម្ភៈ កន្លងមក និងលើកឡើងនូវទិសដៅ ដែលត្រូវអនុវត្តបន្តនៅក្នុងខែមីនា ឆ្នាំ២០២៣ ដើម្បីដាក់ជូនអង្គប្រជុំពិភាក្សាកែសម្រួលបំពេញបន្ថែមនិងចាត់តាំងអនុវត្តឲ្យទទួលបានជោគជ័យបន្ថែមទៀត ។
បន្ទាប់ពីបានចូលរួមពិភាក្សាកែសម្រួលនិងបំពេញបន្ថែមនៅលើខ្លឹមសាររបាយការណ៍និងទិសដៅ សម្រាប់អនុវត្តបន្តរបស់សមាជិកអង្គប្រជុំរួចមក ឧត្តមសេនីយ៍ទោ សោម ស៊ុន បានមានមតិបូកសរុបនឹងវាយតម្លៃខ្ពស់និងកោតសរសើរ ចំពោះកិច្ចខិតខំប្រឹងប្រែងបំពេញភារកិច្ចរបស់យោធិនគ្រប់រូបៗ និងថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់គ្រងឯកភាព ដែលបានខិតខំបំពេញតួនាទីភារកិច្ច ដែលអង្គភាពបានប្រគល់ជូន ដោយអនុវត្តន៍សម្រេចភារកិច្ច នឹងទទួលបានជោគជ័យគួរជាទីមោទនៈ ។
ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ដែលត្រូវអនុវត្តបន្តនៅក្នុងខែមីនា ឆ្នាំ២០២៣ នេះ រួមមាន ទី១. ប្រុងប្រៀបលើគ្រប់វិស័យ ក្នុងកិច្ចសហប្រតិបត្តិការ ការពារសន្តិសុខសុវត្ថិភាព ក្នុងពិធីបុណ្យទន្លេលើកទី៧ ដែលនឹងប្រព្រឹត្តទៅនៅខេត្តកំពង់ធំ នៅដើមខែមីនា ឆ្នាំ២០២៣នេះ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទី២. យោធិន ម្នាក់ៗ នឹងក្រុមគ្រួសារ ត្រូវភ្ជាប់បណ្ដាញប្រព័ន្ធតេឡក្រាមដើម្បីទទួលពត៌មានទាន់ពេលវេលាពីសម្តេចតេជោ ឲ្យបានគ្រប់ៗគ្នា ទី៣ រៀបចំពិធីទិវានារីអន្តរជាតិ ៨ មិនាឆ្នាំ ២០២៣ នៅទីបញ្ជាការកំបន់ប្រតិបត្តិការសឹករងកំពង់ធំ ទី ៤ ពង្រឹងរបៀបរបបការងារ និងតួនាទីភារកិច្ច របស់យោធិនម្នាក់ៗ ដោយត្រូវអនុវត្តឲ្យបានម៉ឺនម៉ាត់តាមលក្ខន្តិកៈនិងបទវិន័យទូទៅរបស់កងយោធពលខេមរភូមិន្ទ និងទី៥. បន្តសកម្មភាពចុះមូលដ្ឋាន ដើម្បីផ្សព្វផ្សាយ និងចូលរួមអនុវត្តតាមគោលនយោបាយភូមិ.ឃុំ មានសុវត្ថិភាព ព្រមទាំងបម្រើនិងដោះស្រាយការលំបាកជូនបងប្អូនអតីតយុទ្ធជន និងប្រជាពលរដ្ឋ នៅតាមមូលដ្ឋាននីមួយៗ ដែលខ្លួនទទួលខុសត្រូវ ៕
