លោកជំទាវ ម៉ែន នារីសោភ័គ អញ្ជើញជាអធិបតីក្នុងពិធីបិទកិច្ចប្រជុំពិគ្រោះយោបល់ស្ដីពី «ការប៉ាន់ប្រមាណសមត្ថភាពសាខាកាកបាទក្រហមកម្ពុជា ខេត្តកណ្តាល»
ភ្នំពេញ៖ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា នាព្រឹកថ្ងៃទី២៨ ខែកុម្ភ: ឆ្នាំ២០២៣នេះ បានអញ្ជើញជាអធិបតីក្នុងពិធីបិទកិច្ចប្រជុំពិគ្រោះយោបល់ស្ដីពី «ការប៉ាន់ប្រមាណសមត្ថភាពសាខាកាកបាទក្រហមកម្ពុជា ខេត្តកណ្តាល» (ជុំទី២)។ ដោយកិច្ចប្រជុំនេះ បានប្រព្រឹត្តទៅរយៈពេល ២ថ្ងៃ ចាប់ពីថ្ងៃទី ២៧-២៨ ខែកុម្ភៈ ឆ្នាំ២០២៣ ដោយមានការអញ្ជើញចូលរួមពីសមាជិក សមាជិកាគណៈកម្មាធិការសាខា ក្រុមការងារបច្ចេកទេសមកពីទីស្នាក់ការកណ្ដាល ក្រុមប្រតិបត្តិសាខា-អនុសាខា អ្នកស្ម័គ្រចិត្ត និងទីប្រឹក្សាយុវជនកាកបាទក្រហមកម្ពុជាសរុបប្រមាណ ៤០នាក់។
បន្ទាប់ពីការធ្វើបទបង្ហាញពីលទ្ធផលនៃការពិភាក្សាក្រុមទាំង២ ទៅលើសូចនាករទាំង ២៨ចំណុចរួចមក លោក ទៀង សុគន្ធ នាយកសាខាកាកបាទក្រហមកម្ពុជា ខេត្តកណ្តាល បានធ្វើរបាយការណ៍បូកសរុបលទ្ធផលកិច្ចប្រជុំដោយបានគូសបញ្ជាក់ថា «អ្នកចូលរួមទាំងអស់បានចូលរួមយ៉ាងសកម្មក្នុងការពិភាក្សា និងពិគ្រោះយោបល់យ៉ាងផុលផុសដោយផ្អែកលើឧបករណ៍បូកា (BOCA) ដែលមានសមត្ថភាពស្នូលចំនួន៥ និងមានសូចនាករចំនួន២៨ ហើយដែលកិច្ចប្រជុំបានឯកភាពកំណត់កម្រិតសមត្ថភាព នូវសូចនាករមានកម្រិតខ្ពស់ចំនួន ២៤សូចនាករ និងសូចនាករដែលត្រូវពង្រឹងបន្ថែមមានចំនួន ៤សូចនាករ»។
ឯកឧត្តមវេជ្ជបណ្ឌិត គួយ ប៊ុនធឿន អនុប្រធានគណៈកម្មាធិការសាខាកាកបាទក្រហមកម្ពុជា ខេត្តកណ្តាល តំណាងឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជា ខេត្តកណ្តាល បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានយកចិត្តទុកដាក់ខ្ពស់ក្នុងការលើកកម្ពស់សមត្ថភាពសាខាគ្រប់រាជធានី-ខេត្ត តាមរយៈកិច្ចប្រជុំពិគ្រោះយោបល់ស្តីពី ការប៉ាន់ប្រមាណសមត្ថភាពសាខាបូកា (BOCA) ដើម្បីធានាឱ្យសកម្មភាពមនុស្សធម៌ជួយដល់ជនរងគ្រោះដោយគ្រោះមហន្តរាយផ្សេងៗ និងជនងាយរងគ្រោះបំផុត ប្រកបដោយប្រសិទ្ធភាពខ្ពស់។
ឯកឧត្តម បានបញ្ជាក់ផងដែរថា កិច្ចប្រជុំនេះពិតជាមានសារសំខាន់បំផុតសម្រាប់អភិវឌ្ឍសាខា-អនុសាខា និងជឿជាក់ថាបន្ទាប់ពីកិច្ចប្រជុំនេះទៅ សាខាកាកបាទក្រហមកម្ពុជា ខេត្តកណ្តាល ក៏ដូចជាគ្រប់អនុសាខាក្រុង-ស្រុកទូទាំងខេត្ត ពិតជាមានសមត្ថភាពគ្រប់គ្រាន់ក្នុងការប្រតិបត្តិការងារតាមវិស័យអាទិភាពទាំង៤ និងក្លាយជាសាខា-អនុសាខា ដែលមានដំណើរការល្អ។
ថ្លែងក្នុងឱកាសនៃការបិទកិច្ចប្រជុំ លោកជំទាវ ម៉ែន នារីសោភ័គ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញេីសួរសុខទុក្ខ និងកោតសរសេីរចំពោះគណៈកិត្តិយសសាខា គណៈកម្មាធិការសាខា មន្ត្រីប្រតិបត្តិសាខា-អនុសាខា អ្នកស្ម័គ្រចិត្ត និងយុវជនកាកបាទក្រហមកម្ពុជាទាំងអស់ ដែលបានលះបង់កម្លាំងកាយ-ចិត្តបំពេញការងារមនុស្សធម៌នាពេលកន្លងមក។
ជាមួយគ្នានេះ លោកជំទាវ បានគូសបញ្ជាក់ពីវឌ្ឍនភាពរបស់កាកបាទក្រហមកម្ពុជា ចាប់តាំងពីពេលដែលមហាសន្និបាតអាណត្តទី២របស់កាកបាទក្រហមកម្ពុជា កាលពីថ្ងៃទី១០ ខែមេសា ឆ្នាំ១៩៩៨ បានបោះឆ្នោតជ្រេីសតាំង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ធ្វើជាប្រធានដឹកនាំរៀងមក នោះគឺសម្តេចកិត្តិព្រឹទ្ធបណ្ឌិតប្រធាន បានយកចិត្តទុកដាក់ខ្ពស់ ផ្តោតអាទិភាពលើការងារអភិបាលកិច្ចល្អ និងបន្តអភិវឌ្ឍស្ថាប័នរបស់កាកបាទក្រហមកម្ពុជា រហូតដល់សម្រេចបានការកសាងយុទ្ធសាស្ត្រទី១របស់កាកបាទក្រហមកម្ពុជា ២០០៣-២០១០ ដើម្បីកសាងកាកបាទក្រហមកម្ពុជា ឱ្យក្លាយជាសមាគមជាតិដែលមានដំណើរការល្អ។ ការអភិវឌ្ឍជាជំហានៗរហូតដល់ថ្ងៃទី១៨ ខែកុម្ភៈ ឆ្នាំ២០១០ គឺ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានរៀបចំឱ្យមានសិក្ខាសាលាមួយដើម្បីរៀបរយការងារអភិវឌ្ឍស្ថាប័ននេះ ឱ្យមានសូចនាករទៅតាមលក្ខណៈរបស់កម្ពុជា។ ពេលនោះហេីយគឺជាពេលដែល សម្តេចកិត្តិព្រឹទ្ធបណ្ឌិតប្រធាន បានប្រកាសអនុវត្តទិសវិមជ្ឈការ វិសហមជ្ឈការរបស់សាខា ហេីយអ្វីដែលត្រូវបានយកធ្វេីជាផែនទីបង្ហាញផ្លូវ ដើម្បីឱ្យសម្រេចបានទិសវិមជ្ឈការ វិសហមជ្ឈការរបស់សាខានេះគឺ យុទ្ធសាស្ត្រទី២ ២០១១-២០២០ របស់កាកបាទក្រហមកម្ពុជា។
រហូតមកដល់បច្ចុប្បន្ននេះ កាកបាទក្រហមកម្ពុជា បាននិងកំពុងអនុវត្តយុទ្ធសាស្ត្រ ២០២១-២០៣០ ដែលមានទស្សនវិស័យ ធ្វេីយ៉ាងណាឱ្យកាកបាទក្រហមកម្ពុជា ដែលជាស្ថាប័នមនុស្សធម៌នាំមុខគេនៅកម្ពុជា នឹងក្លាយជាសមាគមជាតិដែលមានភាពម្ចាស់ការខ្ពស់ និងសម្រេចបានបេសកកម្ម ក្នុងការប្រមូលផ្តុំកម្លាំងមនុស្សធម៌ ដើម្បីចូលរួមលើកកម្ពស់ជីវភាពរបស់ជនងាយរងគ្រោះបំផុតនិងជនរងគ្រោះ តាមរយៈវិស័យអាទិភាពចំនួន៤រួមមាន៖
១-ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ
២-សុខភាពនិងការថែទាំសុខភាពក្នុងសហគមន៍
៣- ការលើកកម្ពស់គោលការណ៍គ្រឹះ និងតម្លៃមនុស្សធម៌
៤-ការអភិវឌ្ឍស្ថាប័ន។លោកជំទាវ អគ្គលេខាធិការរងទី១ បានបញ្ជាក់ផងដែរថា ការងារអភិវឌ្ឍស្ថាប័ន គឺត្រូវផ្តោតលើការពង្រឹងសមត្ថភាពសាខា អនុសាខា ក្រុមកាកបាទក្រហម ឱ្យក្លាយជាប្រតិបត្តិករជួរមុខដ៏សកម្មឱ្យស្របនឹងទិសស្លោកជាសកល របស់សហព័ន្ធអន្តរជាតិ «សកម្មភាពនៅមូលដ្ឋាន សម្រេចបានគោលដៅសកល» និងជឿជាក់យ៉ាងមុតមាំថាអ្វីដែលបានដាក់ជាការងារអាទិភាពទាំងអស់នោះ ក្រុមប្រតិបត្តិទាំងសាខា-អនុសាខា នឹងអាចយកទៅអនុវត្តបានយ៉ាងល្អ ប្រកបដោយប្រសិទ្ធភាព និងនិរន្តរភាព។
សូមបញ្ជាក់ថា កាកបាទក្រហមកម្ពុជា បានអនុវត្តការប៉ាន់ប្រមាណសមត្ថភាពសាខា (បូកា-BOCA) ជុំទី១ (នៅឆ្នាំ២០១៥) ចំពោះសាខាទាំង២៥រាជធានី-ខេត្តបានចប់សព្វគ្រប់ហេីយ ដោយបានឆ្លុះបញ្ចាំងទៅតាមយុទ្ធសាស្ត្រ២០១១-២០២០។ ដោយឡែក ក្នុងត្រីមាសទី១ ឆ្នាំ២០២៣នេះ កាកបាទក្រហមកម្ពុជា បានចាប់ផ្តើមអនុវត្ត ការប៉ាន់ប្រមាណសមត្ថភាពសាខា (បូកា-BOCA) ជុំទី២នេះ ដោយឆ្លុះបញ្ចាំងទៅតាមយុទ្ធសាស្ត្រ២០២១-២០៣០ ដែលបានចាប់ផ្តេីមអនុវត្តជំហានដំបូងក្នុងជុំទី២នេះ សម្រាប់សាខាចំនួន៤ រួមមាន៖ ខេត្តត្បូងឃ្មុំ បន្ទាយមានជ័យ ប៉ៃលិន និងខេត្តកណ្តាល ដែលជាសាខាគោលដៅកំពុងអនុវត្តកម្មវិធីលេីកកម្ពស់សកម្មភាពមនុស្សធម៌ និងសុខភាពក្នុងសហគមន៍ ក្រោមការជួយឧបត្ថម្ភគាំទ្រពីកាកបាទក្រហមហ្វាំងឡង់។
លទ្ធផលនៃការប៉ាន់ប្រមាណសមត្ថភាពសាខាខាងលេីនេះ គឺជាផែនទីចង្អុលផ្លូវសម្រាប់ឱ្យសាខាធ្វេីការកសាងផែនការអភិវឌ្ឍ និងផែនការប្រចាំឆ្នាំរបស់ខ្លួន ដេីម្បីឈានទៅសម្រេចបានគោលដៅ និងលទ្ធផលរំពឹងទុកនៃយុទ្ធសាស្ត្រ២០២១-២០៣០របស់កាកបាទក្រហមកម្ពុជា។ ចំពោះសាខាដទៃផ្សេង កាកបាទក្រហមកម្ពុជា នឹងបន្តចុះផ្សព្វផ្សាយពីយុទ្ធសាស្ត្រ និងធ្វេីបូកា-BOCAនេះ ជាបន្តបន្ទាប់ផងដែរ ៕
