លោកជំទាវ ភឿង សកុណា អញ្ចើញជួបសំណេះសំណាលជាមួយមត៌កមនុស្សរស់ចាស់-ថ្មី ព្រឹទ្ធាចារ្យដែលជាគ្រូគុនល្បុក្កតោ និងសមាគមហ្វារពន្លឺសិល្បៈ

ភ្នំពេញ៖ លោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ នៅរសៀលថ្ងៃទី១ ខែមីនា ឆ្នាំ២០២៣ បានអញ្ចើញជួបសំណេះសំណាលស្វាគមន៍យ៉ាងកក់ក្តៅចំពោះមត៌កមនុស្សរស់ចាស់-ថ្មី, ព្រឹទ្ធាចារ្យដែលជាគ្រូគុនល្បុក្កតោ, និងសមាគមហ្វារពន្លឺសិល្បៈ។

លោកជំទាវ បណ្ឌិតសភាចារ្យ បានបង្ហាញនូវសេចក្តីសោមនស្សចំពោះវត្តមានរបស់ព្រឹទ្ធាចារ្យ លោកគ្រូ អ្នកគ្រូ មត៌កមនុស្សរស់ទាំងចាស់-ថ្មី និងបានថ្លែងអំណរគុណចំពោះព្រឹទ្ធាចារ្យដែលជាមត៌កមនុស្សរស់ក្នុងការខិតខំប្រឹងប្រែងលើកស្ទួយ ថែរក្សា ការពារមត៌កវប្បធម៌របស់កម្ពុជាជាពិសេសការចូលរួមជាមួយនឹងយន្តការបន្តវេន ដើម្បីចែករំលែកចំណេះដឹងក្នុងវិស័យមត៌កវប្បធម៌ប្រពៃណីដូនតាដល់អ្នកជំនាន់ក្រោយ។

បន្ថែមជាងនេះទៅទៀតលោកជំទាវក៏បានថ្លែងអំណរគុណចំពោះគ្រូគុនល្បុក្កតោទាំងអស់ដែលបានចូលរួមចំណែកយ៉ាងសកម្មក្នុងការរៀបចំឯកសារដាក់គុនល្បុក្កតោចូលក្នុងបញ្ជីមត៌កវប្បធម៌អរូបីរបស់មនុស្សជាតិនៃអង្គការយូណេស្កូ។

ឆ្លៀតក្នុងឱកាសដដែលនោះ លោកជំទាវ បណ្ឌិតសភាចារ្យ បានប្រគល់ព្រះរាជក្រឹត្យតែងតាំងជូនចំពោះព្រឹទ្ធាចារ្យមត៌កមនុស្សរស់ថ្មីផងដែរ៕