លោកជំទាវ កុយ សុដានី ដឹកនាំកិច្ចប្រជុំពិនិត្យលើការងាររៀបចំ សម្រាប់កម្មវិធីអបអរសាទរខួប៣ឆ្នាំ លេខពិសេសផ្ទាល់ខ្លួន នាថ្ងៃ៧-៨ មីនា
ភ្នំពេញ៖ លោកជំទាវ កុយ សុដានី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្ត នាថ្ងៃទី២ ខែមីនា ឆ្នាំ២០២៣ បានអញ្ជើញដឹកនាំក្រុមការងារ ដើម្បីប្រជុំពិនិត្យពិភាក្សាលើវឌ្ឍនភាពការងារនៃការរៀបចំកម្មវិធីអបអរសាទរខួប៣ឆ្នាំលេខពិសេសផ្ទាល់ខ្លួន (ពិព័រណ៍ផ្លាកលេខ និងរថយន្ត)។
អង្គប្រជុំបានពិនិត្យលើវឌ្ឍនភាពការងារ លទ្ធផលសំខាន់ៗដែលសម្រេចបាន ទិសដៅការងារបន្ត និងយន្តការផ្សេងៗរបស់ក្រុមការងារគ្រប់ផ្នែកទាំងអស់នៃគណៈកម្មការអន្តរក្រសួង ដើម្បីធានាជំរុញឱ្យកម្មវិធីនេះអាចសម្រេចបានលទ្ធផលដូចការគ្រោងទុក។
សូមជម្រាបជូនថា៖ ក្រសួងសាធារណការ និងដឹកជញ្ជូន នឹងរៀបចំកម្មវិធីអបអរសាទរខួប៣ឆ្នាំលេខពិសេសផ្ទាល់ខ្លួន (លេខកម្ពុជា) ពីថ្ងៃទី០៧-០៨ ខែមីនា ឆ្នាំ២០២៣ ចាប់ពីវេលាម៉ោង៨:០០ព្រឹក រហូតដល់ម៉ោង៩:០០យប់ ដែលក្នុងកម្មវិធីនេះនឹងមានការតាំងពិព័រណ៍រថយន្តពីក្រុមដៃគូសហការ ការតាំងពិព័រណ៍របស់គ្រឹះស្ថានធនាគារ-ហិរញ្ញវត្ថុ និងធានារ៉ាប់រង ហើយនឹងបើកឱកាសដល់សាធារណជន និងប្រជាពលរដ្ឋគ្រប់រូបអាចស្វែងយល់បន្ថែមអំពីផ្លាកលេខ ការដេញថ្លៃលេខពិសេសផ្ទាល់ខ្លួន ក៏ដូចជាអាចទស្សនាការប្រគំតន្ត្រីពីសិល្បករសិល្បការនីល្បីៗជាច្រើនរូបផងដែរ៕
