ចាប់ខ្លួនជនសង្ស័យ២នាក់ ពាក់ព័ន្ធករណីលួចនៅស្រុកស្អាង

កណ្ដាល៖ ជនសង្ស័យជាមុខសញ្ញាលួចយ៉ាងសកម្ម២នាក់ ត្រូវបានសមត្ថកិច្ចស្រុកស្អាងចាប់ខ្លួនពាក់ព័ន្ធនឹងករណីលួច ។ ករណីនេះបានកើតឡើង នៅថ្ងៃទី០១ ខែមីនា ឆ្នាំ២០២៣ វេលាម៉ោង ០២និង៣០នាទី នៅចំណុចផ្ទះជនរងគ្រោះឈ្មោះ ហៃ មករា ស្ថិតនៅភូមិថ្កុល ឃុំត្រើយស្លា ស្រុកស្អាង ខេត្តកណ្តាល។

មន្ត្រីនគរបាលស្រុកស្អាងបានឲ្យដឹងថា ជនរងគ្រោះឈ្មោះ ហៃ ពិសិដ្ឋ ភេទប្រុស អាយុ៣៩ឆ្នាំ ជនជាតិខ្មែរ មុខរបរកសិករ មានទីលំនៅភូមិថ្កុល ឃុំត្រើយស្លា ស្រុកស្អាងខេត្តកណ្តាល។ ជនសង្ស័យចំនួន០២នាក់ ដែលបានឃាត់ខ្លួន មាន ១.ឈ្មោះ វ៉ុន វ៉ិត ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិគោកអណ្ដែត ឃុំស្អាងភ្នំ ស្រុកស្អាង ខេត្តកណ្ដាល។ និង២.ឈ្មោះ ជីម ពិសិដ្ឋ ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលក្តី ឃុំត្រើយស្លា ស្រុកស្អាង ខេត្តកណ្ដាល។ រីឯវត្ថុតាងចាប់យក ១.ម៉ូតូម៉ាកMSX ចំនួន០១គ្រឿង ពណ៌សលាយខ្មៅ គ្មានផ្លាកលេខ(ជារបស់ជនសង្ស័យ) ហើយសម្ភារៈបាត់បង់ម៉ូតូសណ្ដោងរម៉កចំនួន ០១គ្រឿង។

ប្រភពដដែលបន្តថា នៅថ្ងៃទី០១ ខែមីនា ឆ្នាំ២០២៣ វេលាម៉ោង០២និង៣០នាទី ជនសង្ស័យទាំងពីរនាក់ បានធ្វើសកម្មភាពលួចម៉ូតូសណ្ដោងរ៉ឺម៉ក របស់ជនរងគ្រោះទុកនៅមុខផ្ទះយកទៅបាត់។ លុះនៅថ្ងៃទី០២ ខែមីនា ឆ្នាំ២០២៣ វេលាម៉ោង១០និង៣០នាទី កម្លាំងសមត្ថកិច្ចនគរបាលប៉ុស្តិ៍ត្រើយស្លា បានចុះធ្វើការស្រាវជ្រាវកំណត់មុខសញ្ញា និងធ្វើការឃាត់ខ្លួនជនសង្ស័យទាំងពីរនាក់យកមកធ្វើការសាកសួរ។ នៅចំពោះមុខសមត្ថកិច្ចនគរបាល ជនសង្ស័យទាំងពីរនាក់ បានសារភាពថា ពិតជាបានលួចម៉ូតូសណ្ដោងរ៉ឺម៉ក របស់ជនរងគ្រោះពិតប្រាកដមែន។

បច្ចុប្បន្នជនសង្ស័យទាំងពីនាក់ ត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី៕