តំណាងរាស្រ្តមណ្ឌលខេត្តកំពង់ចាម ជួបសំណេះសំណាលជាមួយលោកគ្រូ អ្នកគ្រូ និងមន្ត្រីសុខាភិបាលក្នុងស្រុកចំការលើ
ភ្នំពេញ៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម និងជាលេខាធិការគណ:កម្មការទី៣ នៃរដ្ឋសភា លោកជំទាវ ខុង ស៊ុនអេង សមាជិកាគណ:ម្មការទី៤ នៃរដ្ឋសភា លោកជំទាវ កុល ធារិន សមាជិកាគណ:កម្មការទី២ នៃរដ្ឋសភា នាព្រឹកថ្ងៃទី០៥ ខែមីនា ឆ្នាំ២០២៣ បានអញ្ជើញជួបសំណេះសំណាលជាមួយលោកគ្រូអ្នកគ្រូ និងមន្ត្រីសុខាភិបាល ក្នុងមណ្ឌលសុខភាពឃុំបុសខ្នុរ ដែលពិធីនេះធ្វើឡើងនៅក្នុងអនុវិទ្យាល័យបុសខ្នុរ ស្រុកចំការលើ ខេត្តកំពង់ចាម។
ក្នុងឱកាសនោះដែរ ឯកឧត្តម លោកជំទាវ បានថ្លែងអំណរគុណយ៉ាងជ្រាលជ្រៅបំផុតជូនចំពោះ លោកគ្រូ អ្នកគ្រូ ក៏ដូចជាមន្ត្រីសុខាភិបាលទាំងអស់ ដែលបានយកអស់កម្លាំងកាយចិត្ត ក្នុងការបង្ហាត់បង្រៀនដល់សិស្សានុសិស្សអោយទទួលបាននូវចំណេះដឹងបានយ៉ាងគាប់ប្រសើរ និងការផ្តល់នូវសេវាកម្មផ្នែកសុខភាពជូនដល់បងប្អូនប្រជាពលរដ្ឋបានយ៉ាងច្រើនរបស់មន្ត្រីនៅក្នុងមណ្ឌលសុខភាពបុសខ្នុរនេះផងដែរ។
ថ្លែងនៅក្នុងជំនួបនោះ ឯកឧត្តម លោកជំទាវ តំណាងរាស្រ្តបានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចតេជោនាយករដ្ឋមន្ត្រីផងដែរ។ ឯកឧត្តម លោកជំទាវ បានជម្រាបជូនពីសភាពការណ៍ថ្មីៗដែលកើតមាន ក៏ដូចជាលើកឡើងអំពីវឌ្ឍនភាព និងការរីកចម្រើនឥតឈប់ឈរលើគ្រប់វិស័យក្រោមកាដឹកនាំល្អ និងឈ្លាសវៃរបស់ប្រមុខរដ្ឋាភិបាលដែលដឹកនាំដោយ សម្តេចតេជោ ហ៊ុន សែន បានធ្វើអោយប្រទេសមួយនេះស្គាល់នូវសុខសន្តិភាពខ្ពស់មុខខ្ពស់មាត់លើឆាកអន្តរជាតិ។ ដោយនៅឆ្នាំ២០២៣នេះ គឺជាពេលវេលាត្រូវបោះឆ្នោតជ្រើសតាំងតំណាងរាស្ត្រនីតិកាលទី៧ផងនោះ ឯកឧត្តម លោកជំទាវ ក៏បានសំណូមពរអោយ លោកគ្រូ អ្នកគ្រូ ក៏ដូចជាប្រជាពលរដ្ឋទាំងអស់ ត្រូវរួមគ្នាបន្តនូវការគាំទ្រដល់ការដឹកនាំរបស់សម្តេចតេជោធ្វើជានាយករដ្ឋមន្ត្រីជាបន្តទៀត និងគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត ដើម្បីដឹកនាំនាវាកម្ពុជាឆ្ពោះទៅរកសន្តិភាព និងការអភិវឌ្ឍរីកចម្រើនអោយបានយូរអង្វែង។ ឯកឧត្តម លោកជំទាវ បានថ្លែងនូវអំណរគុណដល់លោកគ្រូអ្នកគ្រូ និងបងប្អូនប្រជាពលរដ្ឋទាំងអស់ដែលតែងតែជឿទុកចិត្តមកលើការដឹកនាំដ៏ល្អរបស់គណបក្សប្រជាជនកម្ពុជា និងរួមគ្នាការពារនូវសុខសន្តិភាពមួយនេះអោយនៅស្ថិតស្ថេរដើម្បីបន្តនូវនិរន្តរភាពនៃការរីកចម្រើន និងភាពសុខសាន្តរបស់ជាតិជាបន្តទៀត។
ឯកឧត្តម លន់ លឹមថៃ លោកជំទាវ ខុង ស៊ុនអេង លោកជំទាវ កុល ធារិន បានឧបត្ថម្ភជាថវិកាដល់លោកគ្រូអ្នកគ្រូ និងគ្រូពេទ្យនៅមណ្ឌលសុខភាពបុសខ្នុរចំនួន២០៤នាក់ ក្នុងម្នាក់ៗទទួលបានថវិកាចំនួន២មុឺនរៀលផងដែរ ៕
