នាយឧត្តមសេនីយ៍ សឹង សំណាង៖ បាត់បង់សន្តិភាព គឺបាត់បង់អ្វីគ្រប់យ៉ាង ដូច្នេះត្រូវការពារសន្តិភាព ឱ្យបានជាដាច់ខាត
ភ្នំពេញ៖ នាយឧត្តមសេនីយ៍ សឹង សំណាង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងអាកាស បានគូសរំលេចថា សុខសន្តិភាព មានសារៈសំខាន់ខ្លាំងណាស់សម្រាប់ជាតិ និងប្រជាជន។ ឯកឧត្ដមនាយឧត្ដមសេនីយ៍ បានអំពាវនាវដល់កងទ័ពការពារឱ្យបានដាច់ខាតនូវសុខសន្តិភាពនេះ ទោះក្នុងតម្លៃណាក៏ដោយ។
នាយឧត្តមសេនីយ៍ សឹង សំណាង លើកឡើងបែបនេះ ក្នុងពេលអញ្ជើញជាអធិបតីក្នុងពិធីបូកសរុបលទ្ធផលការងារជំនាញការពារអាកាសឆ្នាំ២០២២ និងលើទិសដៅអនុវត្តបន្តឆ្នាំ២០២៣ នៅព្រឹកថ្ងៃទី០៧ ខែមីនា ឆ្នាំ២០២៣ នៅបញ្ជាការដ្ឋានការពារអាកាស អគ្គបញ្ជាការ។ ក្នុងពិធីនោះមានការអញ្ជើញចូលរួមពីនាយទាហានមកពីកងទ័ពជើងអាកាស ការពារអាកាស និងកងទ័ពជើងទឹក។
នៅក្នុងពិធីនោះ ឧត្តមសេនីយ៍ទោ អឿ សំអុល មេបញ្ជាការបញ្ជាការដ្ឋានការពារអាកាសអគ្គបញ្ជាការ បានឡើងបង្ហាញនូវលទ្ធផលការងារមួយចំនួន ដែលកងទ័ពជំនាញការពារអាកាសបានបំពេញប្រកបជោគជ័យក្នុងឆ្នាំ២០២២ ព្រមទាំងបានលើកបង្ហាញទិសដៅការងារត្រូវអនុវត្តបន្តក្នុងឆ្នាំ២០២៣។
នាយឧត្តមសេនីយ៍ សឹង សំណាង បានថ្លែងកោតសរសើរ និងវាយតម្លៃខ្ពស់ ចំពោះបញ្ជាការដ្ឋានការពារអាកាសអគ្គបញ្ជាការ ដែលបានដើរតួនាទីយ៉ាងសំខាន់ធ្វើជាសេនាធិការជូនអគ្គមេបញ្ជាការលើភារកិច្ចគ្រប់គ្រងការពារអាកាស ការត្រៀមប្រយុទ្ធ ការងារហ្វឹកហ្វឺន ការងារសាងសង់ហេដ្ឋារចនាសម្ព័ន្ធសម្រាប់កងកម្លាំងការពារអាកាស សម្រេចបានលទ្ធផលបានល្អប្រសើរ។
ឯកឧត្ដមនាយឧត្តមសេនីយ៍ បន្តថា ប្រមុខដឹកនាំក្រសួងការពារជាតិ ក៏ដូចអគ្គមេបញ្ជាការ នៃកងយោធពលខេមរភូមិន្ទតែងរំលឹកជារឿយៗថា កិច្ចការពារជាតិជាអាទិភាពមួយក្នុងចំណោមអាទិភាពនានា ដែលរាជរដ្ឋាភិបាលបានគិតគូរ យកចិត្តទុកដាក់ ដើម្បីធានាសន្តិភាព សន្តិសុខ ស្ថេរភាព និងលើកតម្កើងកិត្យានុភាពកម្ពុជាលើឆាកអន្តរជាតិ។
មេបញ្ជាការកងទ័ពអាកាស ក៏បានរំលឹកពីការវិវឌ្ឍន៍នូវស្ថានការណ៍សន្តិសុខទាំងក្នុងតំបន់ និងពិភពលោក។ លោកបានគូសបញ្ជាក់ថា ផ្អែកតាមសភាពការណ៍ក្នុងស្រុកជាមួយឥទ្ធិពលនៃការវិវត្តផ្នែកភូមិសាស្ត្រនយោបាយ និងកត្តាដទៃទៀតក្នុងតំបន់ ប្រការនេះទាមទារឱ្យមានការយកចិត្តទុកដាក់ក្នុងការដាក់ចេញគោលនយោបាយ និងយុទ្ធសាស្ត្រការពារជាតិដើម្បីឆ្លើយតបនឹងភាពប្រឈមនៃការគំរាមកំហែងគ្រប់ប្រភេទមកលើសន្តិសុខជាតិនាពេលបច្ចុប្បន្ន និងអនាគត។
ឯកឧត្ដមបន្តថា រយៈកាលកន្លងមកនេះ កងយោធពលខេមរភូមិន្ទ បានការ ពារ និងទប់ស្កាត់បានទាន់ពេលវេលាប្រកបដោយប្រសិទ្ធភាពលើការប៉ុនប៉ងធ្វើភេរវកម្ម ចូលរួមប្រយុទ្ធយ៉ាងពេញទំហឹងជាមួយជំងឺរាតត្បាតកូវីដ១៩ រួមចំណែកអភិវឌ្ឍន៍ហេដ្ឋារចនាសម្ព័ន្ធ ការជួយសង្គ្រោះការងារមនុស្សធម៌ ដែល តែងតែកើតមានជាបន្តបន្ទាប់ ប្រកបដោយស្មារតី ទទួលខុសត្រូវខ្ពស់ចំពោះវាសនាប្រទេសជាតិ។
នាយឧត្តមសេនីយ៍ សឹង សំណាង បន្តថា ការអនុវត្តកម្មវិធីកំណែទម្រង់កងយោធពលខេមរភូមិន្ទទៀតសោត ត្រូវពឹងផ្អែកលើធនធានមនុស្ស សន្តិសុខអន្តរជាតិ និងស្ថានភាពជាក់ស្តែង នៅកម្ពុជាពាក់ព័ន្ធដល៎កិច្ចការពារជាតិដោយផ្តោតទៅលើការពង្រឹងកងកម្លាំងឲ្យមានជំនាញវិជ្ជាជីវៈ មានសមត្ថភាពបន្តវេន និងមូលដ្ឋានសម្ភារ:សម ស្រប មានទឹកចិត្តស្មោះត្រង់ចំពោះជាតិ សាសនា ព្រះមហាក្សត្រ។
ឆ្លៀតក្នុងឱកាសនោះនាយឧត្តមសេនីយ៍ បានរំលឹកដល់នាយទាហាន និងពលទាហាន ក្នុងបញ្ជាការដ្ឋានការពារអាកាសអគ្គបញ្ជាការ ត្រូវយកចិត្តទុកដាក់ខ្ពស់ដល់សុខសន្តិភាព ស្ថិរភាព និងសណ្តាប់ធ្នាប់សង្គម ប្រការនេះយើងត្រូវដឹងថាភាពរីកចម្រើនរបស់ប្រជាជនយើង ត្រូវពឹងផ្អែកលើសន្តិភាព និងការអភិវឌ្ឍ។ សន្តិភាព គឺជាកត្តាស្លាប់រស់ និងចាំបាច់សម្រាប់យើង និងសាកលលោក និយាយជារួមសន្តិភាពកើតមានឡើងនៅកម្ពុជា គឺជាពលិកម្មសាច់ស្រស់ ឈាមស្រស់ របស់យុទ្ធជន យុទ្ធនារីយើង ដែលរកបានដោយលំបាកបំផុត ប្រការនេះ បើយើងធ្វើឱ្យប្រទេសជាតិយើង បាត់បង់នូវសន្តិភាពហើយ គឺយើងនឹងបាត់បង់អ្វីៗទាំងអស់ ដូច្នេះពាក្យសន្តិភាព ចាំបាច់ស្ថិត ជាអមត:ក្នុងក្រអៅបេះដូងកូនខ្មែរគ្រប់ៗរូប។
នាយឧត្តមសេនីយ៍បានធ្វើការគូសបញ្ជាក់បន្ថែមថា កងទ័ពត្រូវស្មោះត្រង់ដាច់ខាតចំពោះជាតិ សាសនា ព្រះមហាក្សត្រ និងរាជរដ្ឋាភិបាលកម្ពុជាដែលដឹកនាំសម្តេចតេជោ ហ៊ុន សែន នាយករដ្ឋមន្ត្រី។ ត្រូវគោរពវិន័យ គោរពបទបញ្ជា ច្បាប់រដ្ឋ និងកសាងផែនការត្រៀមប្រយុទ្ធ ការពារទីតាំង។
មេបញ្ជាការទ័ពអាកាស បានក្រើនរំលឹកដល់កងទ័ពការពារអាកាស ឱ្យបន្តសិក្សាបន្ថែម ផែនការហ្វឹកហ្វឺនបំប៉ន បណ្តុះបណ្តាល ធនធានមនុស្សជំនាញគ្រប់ថ្នាក់តាមបទបញ្ជារបស់អគ្គមេបញ្ជាការ ត្រូវរៀបចំផែនការកសាងកម្លាំងផ្អែកលើកំណែទម្រង់របាកងយោធពលខេមរភូមិន្ទមួយវិញទៀតកម្លាំងទាំងអស់ត្រូវស្វែងយល់ពីបច្ចេកវិទ្យាសម័យទំនើប ស្របតាមសព្វាវុធទំនើបដែលបានបំពាក់។
បន្តពង្រឹងសាមគ្គីភាព ឯកភាពផ្ទៃក្នុងឲ្យមានលក្ខណ:ល្អប្រសើរ ពិសេសកិច្ចសហប្របតិបត្តិការកសាងជំនាញការពារអាកាសអគ្គបញ្ជា
ការដ្ឋាន ការពារអាកាសកងទ័ពជើងគោក ការពារអាកាសកងទ័ពជើងទឹក៕
