ឧត្តមសេនីយ៍ឯក ឃឹង សារ៉ាត់ ជួបសំណេះសំណាលជាមួយនគរបាលនារី ចំណុះមន្ទីរប្រឆាំងបទល្មើសគ្រឿងញៀន

ភំ្នពេញ៖ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន និងលោកជំទាវ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ នាព្រឹកថ្ងៃពុធ ២រោច ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែមីនា ឆ្នាំ២០២៣ បានអញ្ជើញជួបសំណេះសំណាលជាមួយនគរបាលនារី ចំណុះមន្ទីរប្រឆាំងបទល្មើសគ្រឿងញៀន។

បន្ទាប់ពីបានស្តាប់របាយការណ៍ ដែលនគរបាលនារីបានលើកឡើងរួចមក ឯកឧត្តម ឧត្តមសេនីយ៍ឯក ឃឹង សារ៉ាត់ បានមានប្រសាសន៍ដោយសេចក្តីរីករាយខ្លាំងណាស់ ជាលើកទី១ ដែលបានជួបសំណេះសំណាលសាកសួរសុខទុក្ខដល់នគរបាលនារី ពិសេសបានពាំនាំនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ជូនដល់កងកម្លាំងនគរបាលនារី ចំណុះមន្ទីរប្រឆាំងបទល្មើសគ្រឿងញៀន។

ឯកឧត្តម ឧត្តមសេនីយ៍ឯក នាយកមន្ទីរប្រឆាំងបទល្មើសគ្រឿង បានមានប្រសាសន៍ថា ក្នុងឱកាសដ៏វិសេសវិសាលប្រពៃថ្លៃថ្លា នៃការប្រារព្ធខួបលើកទី១១២ ទិវាអន្តរជាតិនារី៨មីនាឆ្នាំ២០២៣ ជំនួសមុខឲ្យថ្នាក់ដឹកនាំនៃកងកម្លាំងនគរបាលនៃមន្ទីរប្រឆាំងបទល្មើសគ្រឿងញៀន និងក្នុងនាមខ្លួនឯកឧត្តមផ្ទាល់ ព្រមទាំងលោកជំទាវ សូមចូលរួមអបអរសាទរប្រកបដោយក្តីសោមនស្សរីករាយ ជាមួយបងប្អូនកងកម្លាំងនគរបាលនារីទាំងអស់ ក្នុងមនោសញ្ចេតនាស្រលាញ់រាប់អានយ៉ាងជ្រាលជ្រៅជាទីបំផុត។

ឯកឧត្តម ឧត្តមសេនីយ៍ឯក បានបន្តថា ទិវាអន្តរជាតិនារី៨មីនា ជាព្រឹត្តិការណ៍ដែលមានអត្ថន័យជាប្រវត្តិសាស្ត្រ សម្រាប់នារីទូទាំងពិភពលោកក៏ដូចជានារីនៅក្នុងព្រះរាជាណាចក្រកម្ពុជា និយាយជារួម និងនិយាយដោយឡែកសម្រាប់កងកម្លាំងនគរបាលជានារីនៅក្នុងមន្ទីរប្រឆាំងបទល្មើសគ្រឿងញៀនេះ ហើយក៏ជាការរំឭកអំពីតួនាទីដ៏សំខាន់របស់នារីក្នុងការចូលរួមប្រកបដោយវីរភាពក្នុងបុព្វហេតុបម្រើសង្គម និងមនុស្សជាតិប្រកបដោយមោទនភាព។

ឯកឧត្តម ឧត្តមសេនីយ៍ឯក បានលើកទឹកចិត្តដល់កងកម្លាំងនគរបាលនារី នៅក្នុងមន្ទីរប្រឆាំងបទល្មើសគ្រឿង ដោយបានលើកឡើងថា ឯកឧត្តមនឹងលើកសំណើទៅ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ពាក់ព័ន្ធនឹងប្រាក់រង្វាន់លើកទឹកចិត្តដែលកម្លាំងមន្ទីរបង្រ្កាបបាននាពេលកន្លងមក ដល់នគរបាលនារីទាំងអស់ក្នុងមន្ទីរ គឺត្រូវមានឈ្មោះក្នុងបញ្ជីបើកប្រាក់រង្វាន់ ទោះជាបានប៉ុន្មានភាគរយក៏ដោយ គឺត្រូវតែមានការលើកទឹកចិត្ត។

ឯកឧត្តម ឧត្តមសេនីយ៍ឯក បានមានប្រសាសន៍បន្តថា ក្រោមការដឹកនាំរបស់រាជរដ្ឋាភិបាល ដែលមានសម្តេចអគ្គមហាសនាបតីតេជោ ហ៊ុន សែន ជាប្រមុខ បានដាក់ចេញនូវគោលនយោបាយ និងទស្សនវិស័យលុបបំបាត់នូវការរើសអើង ដោយផ្តល់សិទ្ធិស្មើភាពរវាងបុរសនិងនារី ព្រមទាំងចាត់ទុកថា ស្ត្រីជាឆ្អឹងខ្នងនៃការអភិវឌ្ឍសេដ្ឋកិច្ចនិងសង្គមជាតិ ហើយការបញ្ជ្រាបយេនឌ័រ គឺជាកិច្ចការអន្តរវិស័យក្នុងការធានាចីរភាព នៃសុខសន្តិភាព និងពន្លឿនល្បឿនការអភិវឌ្ឍក្នុងយុគសម័យឌីជីថល។ ជាក់ស្ដែងរាជរដ្ឋាភិបាលបានលើកទឹកចិត្ត និងផ្ដល់ឱកាសជាអាទិភាពដល់នារីលើគ្រប់សកម្មភាព ទាំង កិច្ចការនយោបាយ សេដ្ឋកិច្ច សង្គមកិច្ច វប្បធម៌ សិល្បៈ វិស័យការពារជាតិ និងសន្តិសុខសណ្តាប់ធ្នាប់សង្គម រួមទាំងវិស័យផ្សេងៗទៀតផងដែរ។

ឯកឧត្តម ឧត្តមសេនីយ៍ឯក បានបន្តថា សព្វថ្ងៃនេះ អនុវត្តតាមគោលនយោបាយរបស់រាជរដ្ឋាភិបាល ក្រសួងមហាផ្ទៃ ដែលមានអគ្គស្នងការដ្ឋាននគរបាលជាតិជាសេនាធិការ បានយកចិត្តទុកដាក់គាំទ្រលើកទឹកចិត្តដល់កងកម្លាំងនគរបាលនារី ដោយបាន ផ្តល់ឋានៈ តួនាទីក្នុងជួរថ្នាក់ដឹកនាំគ្រប់លំដាប់ថ្នាក់ ទើបមាននគរបាលជានារី ជានាយករងមន្ទីរ ព្រមទាំងឧបត្ថម្ភគាំទ្រ លើកកម្ពស់ទាំងស្មារតី សម្ភារនិងសមត្ថភាពជំនាញក្នុងការបំពេញមុខនាទីរបស់ខ្លួនទៀតផង។

ជាចុងក្រោយ ឯកឧត្តម ឧត្តមសេនីយ៍ឯក នាយកមន្ទីរប្រឆាំងបទល្មើសគ្រឿងញៀន ក៏បានឧបត្ថម្ភថវិកាដល់នគរបាលនារីចំនួន២១នាក់ ក្នុងម្នាក់ៗទទួលបានថវិកា ១០ម៉ឺនរៀលផងដែរ ៕