ឯកឧត្តមបណ្ឌិត អូស្មាន ហាស្សាន់ អញ្ជើញដឹកនាំកិច្ចប្រជុំគណៈចលនាសាសនិកឥស្លាម របស់គណបក្សប្រជាជនកម្ពុជា ជាមួយថ្នាក់ដឹកនាំគណៈចលនាឥស្លាម រាជធានី-ខេត្ត ក្រុង ស្រុក ខណ្ឌ

ភ្នំពេញ៖ ឯកឧត្តមបណ្ឌិត អូស្មាន ហាស្សាន់ ប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា និងជាបេសកជនពិសេស របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា នាព្រឹកថ្ងៃទី៨ ខែមីនា ឆ្នាំ២០២៣ បានអញ្ជើញដឹកនាំកិច្ចប្រជុំគណៈចលនាសាសនិកឥស្លាម របស់គណបក្សប្រជាជនកម្ពុជា ជាមួយថ្នាក់ដឹកនាំគណៈចលនាឥស្លាម រាជធានី-ខេត្ត ក្រុង ស្រុក ខណ្ឌ មកពីទូទាំងប្រទេសចំនួន ១៤០ នាក់ នៅវិមាន៧ មករា។

ក្នុងនោះក៏មានអភិបាលរង រាជធានី-ខេត្ត មុស្លិម ១២រូប និងអភិបាលរង ក្រុង ស្រុក ខណ្ឌ​ ៣៨រូប​ ដែលទើបទទួលបានមុខតំណែង ដែលជាប្រធាន អនុប្រធាន សមាជិក នៃគណៈចលនាឥស្លាមផងដែរ ។

នាឱកាសនោះ ឯកឧត្តមបណ្ឌិតបានលើកឡើងថា កិច្ចប្រជុំនាថ្ងៃនេះ ក្នុងគោលបំណងរៀបចំផែនការយកប្រៀបឈ្នះ ដណ្ដើមយកសន្លឹកឆ្នោតឱ្យបានច្រើននៅតំបន់ដែលមានបងប្អូនខ្មែរឥស្លាមរស់នៅច្រើន និងការងារឃោសនាបោះឆ្នោតនៅតំបន់ដែលមានបងប្អូនខ្មែរឥស្លាម សម្រាប់ការបោះឆ្នោតជ្រើសរើសតំណាងរាស្ត្រនីតិកាលទី៧ ឆ្នាំ២០២៣ នាខែកក្កដា ខាងមុខនេះ។

ឯកឧត្តម ក៏បានលើកឡើងដែរថា កន្លងមកនៅតាមសហគមន៍ខ្មែរឥស្លាមតែងតែទទួលបានសន្លឹកឆ្នោតច្រើន នៅពេលដែលមានការបោះឆ្នោតម្តងៗ ប៉ុន្តែឯកឧត្តមបានជំរុញឱ្យ សមាជិកសមាជិកាគណៈចលនាឥស្លាមកម្ពុជា នៅទូទាំងប្រទេសទាំងអស់ ត្រូវត្រៀមលក្ខណៈ និងកម្លាំងជាមុន ក្នុងការឃោសនារកសន្លឹកឆ្នោតឱ្យច្រើន ភ្លូកទឹកភ្លូកដី ជូនគណបក្សប្រជាជនកម្ពុជាបន្ថែមទៀត សម្រាប់ការបោះឆ្នោតនីតិកាលជ្រើសរើសតាំងតំណាងរាស្ត្រនីតិកាលទី៧ ឆ្នាំ២០២៣។

គួរបញ្ជាក់ថា កិច្ចប្រជុំនេះ ក៏បានពិភាក្សារៀបចំកម្មវិធីជួបជុំសំណេះសំណាលគណៈចលនាឥស្លាម របស់គណបក្សប្រជាជនកម្ពុជា រាជធានី-ខេត្ត ឥស្លាម ទូទាំងប្រទេសចំនួន ៣៥០០ នាក់ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជាផងដែរ៕