សម្តេចតេជោ លើកឡើងទស្សនៈសំខាន់ៗ៦ចំណុច , សន្តិភាពជំរុញការអភិវឌ្ឍ និងស្រូបទាញទេសចរ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងនូវទស្សនៈ ក៏ដូចជាការណែនាំសំខាន់ៗចំនួន៦ចំណុច ពិសេសអ្វីដែលសម្ដេចចង់សង្កត់ធ្ងន់នោះគឺថា «សន្តិភាពជំរុញការអភិវឌ្ឍសង្គម អភិវឌ្ឍវិស័យទេសចរណ៍ និងជួយស្រូបទាញចរន្តភ្ញៀវទេសចរ»។
ក្នុងពិធីអបអរសាទរបុណ្យទន្លេឆ្នាំ២០២៣នេះ សម្តេចតេជោនាយករដ្ឋមន្ត្រីបានលើកឡើងសំខាន់ៗទាំង៦ចំណុច រួមមាន៖
ទី១. ភាគីពាក់ព័ន្ធ និងប្រជាពលរដ្ឋគ្រប់គ្នាចាំបាច់ត្រូវរក្សាវត្តមានជាអចិន្ត្រៃយ៍នៃសន្តិភាព ដែលជាចំណុចធំជាងគេក្នុងចំណោមចំណុចដែលទាក់ទងជាមួយការអភិវឌ្ឍនៃបណ្តាប្រជាជននៅលើពិភពលោក។ បច្ចុប្បន្ន កម្ពុជាចាប់ផ្តើមទទួលភ្ញៀវជាតិនិងអន្តរជាតិនៅគ្រប់ទីកន្លែងជាបណ្តើរៗ ជាមួយនឹងការគ្រប់គ្រងដោយជោគជ័យលើសមរភូមិជំងឺកូវីដ-១៩។
សម្ដេចសង្កត់ធ្ងន់ថា «គ្មានសន្តិភាព គ្មានការអភិវឌ្ឍ, គ្មានសន្តិភាព ក៏គ្មានការគោរពសិទ្ធិមនុស្ស និងប្រជាធិបតេយ្យ ហើយបើគ្មានសន្តិភាព ក៏គ្មានអ្វីៗទាំងអស់»។ ដូច្នេះសម្ដេចតេជោបានស្នើឱ្យប្រជាពលរដ្ឋកម្ពុជានៅទូទាំងប្រទេសរួបរួមគ្នារក្សាការពារនូវសន្តិភាពដែលយើងរកបានទាំងលំបាក និងមិនត្រូវឱ្យប្រទេសណាមួយ ឬក្រុមណាមួយមកបំផ្លាញសន្តិភាពនៅក្នុងប្រទេសនេះនោះទេ ទោះក្នុងតម្លៃណាក៏ដោយ យើងទាំងអស់គ្នាត្រូវរក្សាសន្តិភាពនេះឱ្យខានតែបាន ដើម្បីធានាដល់ការអភិវឌ្ឍ។
ទី២. ត្រូវបន្តយកចិត្តទុកដាក់ខ្ពស់ក្នុងការថែរក្សាសន្តិសុខ និងសណ្តាប់ធ្នាប់ ពិសេសជំរុញការអនុវត្តគោលនយោបាយភូមិ-ឃុំមានសុវត្ថិភាពឱ្យបានម៉ត់ចត់ និងជាប់ជាប្រចាំ។ ក្នុងន័យនេះ តំបន់ទេសចរណ៍ទាំងអស់ ទាំងខេត្តកំពង់ធំ តាមបណ្តាខេត្តជាប់ដងទន្លេ និងគ្រប់ទីកន្លែង ជាពិសេសតំបន់ដែលមានភ្ញៀវទេសចរទៅទស្សនា គឺត្រូវខិតខំរក្សាឱ្យបាននូវសន្តិសុខ និងសណ្តាប់ធ្នាប់សង្គម។
ទី៣. ក្រសួង-ស្ថាប័នពាក់ព័ន្ធ និងរដ្ឋបាលខេត្តជុំវិញបឹង-ទន្លេសាបត្រូវបន្តជំរុញកិច្ចការវាស់វែង និងឆ្វៀលដីចេញពីតំបន់២ និងតំបន់៣នៃផ្ទៃបឹងទន្លេសាបឱ្យបានចប់សព្វគ្រប់ និងឆាប់រហ័ស ដើម្បីផ្តល់កម្មសិទ្ធិជូនប្រជាពលរដ្ឋនៅតំបន់១ និងការអាស្រ័យផលនៅតំបន់២ និងបន្តរស់នៅអាស្រ័យផលនៅតំបន់៣។
ទី៤. ក្រសួង-ស្ថាប័នពាក់ព័ន្ធត្រូវបន្តផ្តល់អាទិភាពដល់ការអភិវឌ្ឍតំបន់តាមដងទន្លេ ជាពិសេសបណ្តាខេត្តជុំវិញបឹងទន្លេសាប លើការកសាងហេដ្ឋារចនាសម្ព័ន្ធចាំបាច់ដែលបម្រើឱ្យវិស័យទេសចរណ៍ ការតភ្ជាប់ និងការដឹកជញ្ជូនជាដើម ជាពិសេសពិនិត្យលទ្ធភាពក្នុងការសាងសង់ស្ពានឆ្លងទន្លេសាប និងបឹងទន្លេសាប ការតភ្ជាប់ស្ពាន និងផ្លូវពីកំពង់ឆ្នាំងមកកំពង់ធំ។
ទី៥. ត្រូវបន្តជំរុញការផលិតដើម្បីផ្គត់ផ្គង់ដល់ទេសចរ ដែលជាទិសដៅនាំចេញនៅនឹងកន្លែង។ ប្រជាពលរដ្ឋកម្ពុជាមានឱកាសច្រើនណាស់ ដើម្បីចិញ្ចឹម និងបំពេញតម្រូវការរបស់ភ្ញៀវទេសចរអន្តរជាតិ ដែលកំពុងត្រឡប់មកកម្ពុជាវិញជាបណ្តើរៗ រួមជាមួយនឹងទេសចរក្នុងស្រុករាប់លាននាក់។
កម្ពុជាត្រូវខិតខំជំរុញការផលិតឱ្យត្រឹមត្រូវតាមស្តង់ដា បម្រើឱ្យវិស័យទេសចរណ៍ ពិសេសត្រូវបង្កើតឱ្យមានខ្សែក្រវាត់បៃតងក្នុងតំបន់ទេសចរណ៍។ ដោយឡែក សម្រាប់ខេត្តកំពង់ធំដែលសម្បូរដោយផលិតផលកសិកម្មជាច្រើន សម្ដេចតេជោក៏បានស្នើក្រសួង-ស្ថាប័នដែលមានសមត្ថកិច្ចផ្តល់អាទិភាពក្នុងជំរុញការដាំដុះផលិត និងស្វែងរកទីផ្សារ ស្របតាមគោលនយោបាយជំរុញវិស័យកសិកម្ម ដែលជាវិស័យ អាទិភាពរបស់រាជរដ្ឋាភិបាល ជាពិសេសដូចករណីស្វាយចន្ទី ដែលរាជរដ្ឋាភិបាលបានអនុម័តគោលនយោបាយជំរុញដំណាំនេះ កាលពីពេលថ្មីៗ។
ទី៦. ក្រសួង-ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋ និងវិស័យឯកជនសូមចូលរួមឱ្យបានផុសផុលប្រកបដោយស្មារតីទទួលខុសត្រូវ ធ្វើឱ្យពិធីបុណ្យទន្លេឆ្នាំនេះប្រកបដោយជោគជ័យ និងចូលរួមឱ្យកាន់តែសកម្មក្នុងចលនាប្រឡងប្រណាំង «ទីក្រុងស្អាត រមណីយដ្ឋាន ស្អាត សេវាល្អ បដិសណ្ឋារកិច្ចល្អ និងសហការថែរក្សាសោភ័ណភាព អនាម័យ និងបរិស្ថាន» ដែលកត្តាចម្បងមិនអាចខ្វះបានក្នុងការថែរក្សាតំបន់តាមដងទន្លេឱ្យស្រស់ស្អាត យូរអង្វែង ដើម្បីបន្តជាមរតកដល់កូនចៅជំនាន់ក្រោយ។
សម្ដេចតេជោ ហ៊ុន សែន បានបញ្ជាក់ទៀតថា រាជរដ្ឋាភិបាលកម្ពុជានឹងបន្តកិច្ចខិតខំប្រឹងប្រែងលើកិច្ចការពារ និងអភិរក្សបរិស្ថានធនធានធម្មជាតិ ដោយឈរលើគោលការណ៍ «ការអភិវឌ្ឍបម្រើឱ្យការ-អភិរក្ស រីឯការអភិរក្សបម្រើឱ្យការអភិវឌ្ឍ» ដោយយើងត្រូវរួមគ្នា «រួមគិត រួមធ្វើ រួមទទួលខុសត្រូវ» ដើម្បីឱ្យតំបន់តាមដងទន្លេក្លាយជាគោលដៅទេសចរណ៍ដ៏ទាក់ទាញសម្រាប់ភ្ញៀវទេសចរ។
សម្តេចតេជោនាយករដ្ឋមន្ត្រីបានប្រកាសគាំទ្រឱ្យមានការរៀបចំបុណ្យទន្លេជារៀងរាល់ឆ្នាំដោយឆ្លាស់វេនគ្នានៅតាមបណ្តាខេត្តជាប់ដងទន្លេ និងបណ្តាខេត្តដែលមានខ្សែទឹកជាប់ទន្លេនានា៕
