សម្តេចប្រមុខរដ្ឋស្តីទី អញ្ជើញជាអធិបតីភាពក្នុងពិធីបញ្ចុះខណ្ឌសីមាព្រះវិហារថ្មី និងសម្ពោធសមិទ្ធផលនានាក្នុងវត្តមុនីជីខលើ

ភ្នំពេញ៖ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះរាជាណាចក្រកម្ពុជា នាព្រឹកថ្ងៃទី១៤ ខែមីនា ឆ្នាំ២០២៣ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបញ្ចុះខណ្ឌសីមាសម្ពោធដាក់ឱ្យប្រើប្រាស់ព្រះវិហារថ្មី និងសមិទ្ធផលនានា ក្នុងវត្តមុនីជីខលើ ស្ថិតនៅភូមិជីខ ឃុំជីខលើ ស្រុកស្រែអំបិល ខេត្តកោះកុង ដោយមានការអញ្ជើញចូលរួមពីសមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល ទីប្រឹក្សា ថ្នាក់ដឹកនាំនៃអគ្គលេខាធិការដ្ឋានព្រឹទ្ធសភា អាជ្ញាធរដែនដីគ្រប់លំដាប់ថ្នាក់នៃខេត្តកោះកុង និងពុទ្ធបរិស័ទចំណុះជើងវត្តយ៉ាងច្រើនកុះករ។

សូមជម្រាបថា ព្រះវិហារថ្មី និងសមិទ្ធផលនានា ដែលត្រូវបានបញ្ចុះខណ្ឌសីមាសម្ពោធឆ្លងដាក់ឱ្យដំណើរការប្រើប្រាស់ជាផ្លូវការនាពេលនេះរួមមាន៖ ព្រះវិហារថ្មីទទឹង៨.៥០ ម៉ែត្រ បណ្តោយ១១.៥០ម៉ែត្រ កុដិថ្ម០១ខ្នង ទទឹង៦.៥០ម៉ែត្រ បណ្តោយ៧.៥០ម៉ែត្រ ខ្លោងទ្វា០១ និងដងទង់០១គូ ព្រមទាំងសមិទ្ធផលផ្សេងៗទៀត ដោយចំណាយថវិកាសរុបចំនួន ៥២០.០០០ដុល្លារ (ហាសិបពីរម៉ឺនដុល្លារអាមេរិក) ៕