អគ្គនាយកដ្ឋានអន្តោប្រវេសន៍ ប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលេីកទិសទៅការងារបន្ត របស់អគ្គនាយកដ្ឋានអន្តោប្រវេសន៍
ភ្នំពេញ៖ អគ្គនាយកដ្ឋានអន្តោប្រវេសន៍ នាព្រឹកថ្ងៃអង្គារ ៨ រោច ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៤ ខែមីនា ឆ្នាំ២០២៣នេះ បានប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលេីកទិសទៅការងារឆ្នាំ២០២៣ របស់អគ្គនាយកដ្ឋានអន្តោប្រវេសន៍ ក្រោមអធិបតីភាព ឯកឧត្ដម សន្តិបណ្ឌិត សុខ ផល រដ្ឋលេខាធការក្រសួងមហាផ្ទៃ ប្រារព្ធនៅភោជនីដ្ឋាន ទន្លេបាសាក់ ។
ពិធីនេះក៏មានការអញ្ជេីញចូលរួមពីឯកឧត្តម-លោកជំទាវ អនុរដ្ឋលេខាធការក្រសួមហាផ្ទៃ ឯកឧត្ដម អគ្គនាយកអន្តោប្រវេសន៍ ឯកឧត្ដម-ជំទាវអគ្គនាយករង លោក ប្រធាននាយកដ្ឋាន លោក-លោកស្រីអនុនាយកដ្ឋាន លោក-លោកស្រី នាយកការិយាល័យ លោកនាយប៉ុស្តិ៍នគរបាលច្រកទ្វាព្រំដែនអន្តរជាតិ និងមន្រ្តីពាក់ព័ន្ធជាច្រេីនរូបទៀត ។
ជាកិច្ចចាប់ផ្ដេីមឯកឧត្តម ឧត្តមសេនីយ៍ឯក ណុប វី អគ្គនាយករងអន្តោប្រវេសន៍ បានអានសេចក្ដីរបាយការណ៍យ៉ាងលំអិតដែលបានបង្ហាញក្នុងសន្និបាតនេះជូនអង្គពិធី បានឲ្យដឹងថា ក្នុងឆ្នាំ២០២២ អគ្គនាយកដ្ឋានអន្តោប្រវេសន៍ បានបំពេញបែបបទសម្របសម្រួលអ្នកដំណើរជាជនបរទេសចូលមកកម្ពុជា ជាលក្ខណៈអន្តរជាតិសរុបចំនួន២,១២៥,៥២១នាក់ ស្មើនឹង២១៣សញ្ជាតិ ក្នុងនោះទេសចរណ៍ ១,៥៩៩,៧៩២នាក់ ពាណិជ្ជករ ៣៨១,២៣៦នាក់ ការទូត៦,៨៨៤នាក់ ផ្លូវការ៨,៩៧១នាក់ បោរីភាព៧,៩៤០នាក់ នាវិក៤៦,៦៥៣នាក់ អនិកជន៧២,៣៦១នាក់ និងអ្នកដំណើរឆ្លងកាត់ចំនួន១,៦៨៤នាក់ ទាំងតាមផ្លូវអាកាស ផ្លូវគោក និងផ្លូវទឹក ។
ចំណែកជនបរទេសដែលចេញពីកម្ពុជា ជាលក្ខណៈអន្តរជាតិវិញ មានចំនួន១,៩០០,១៦៥នាក់ ស្មើនឹង២១៧សញ្ជាតិ។ ជនបរទេសបានចូលមកកម្ពុជាជាលក្ខណៈតំបន់ព្រំដែន សរុបចំនួន ៦២៧,៩៩២នាក់ ខណៈការចេញជាលក្ខណៈតំបន់ព្រំដែននេះមានចំនួន ៦២០,៤៣៧នាក់ ។
អគ្គនាយកដ្ឋានអន្តោប្រវេសន៍ ក៏បានបំពេញបែបបទ និងសម្រួលការធ្វើដំណើរចេញជាលក្ខណៈអន្តរជាតិ ជូនពលរដ្ឋខ្មែរក្នុងឆ្នាំ២០២២ បានចំនួន៨៩៥,៤៣៦នាក់ ទាំងតាមផ្លូវអាកាស ផ្លូវគោក និងផ្លូវទឹក ខណៈពលរដ្ឋខ្មែរ បានចូលមកប្រទែសវិញជាលក្ខណៈអន្តរជាតិមានចំនួន ៨១៩,២០៥នាក់ ។
ក្នុងដំណើរការការងារគ្រប់គ្រងការចេញ-ចូលប្រទេសនេះដែរ មន្រ្តីនគរបាលប្រចាំការនៅច្រកទ្វារអន្តរជាតិ និងច្រកទ្វារព្រំដែនអន្តរជាតិ បានត្រួតពិនិត្យរកឃើញបទល្មើស ចំនួន៧៩២លើក ប្រព្រឹត្តិដោយអ្នកដំណើរ១,១៣៤នាក់ ដោយបានចាត់វិធានការផ្អាកដំណើរ និងបញ្ជូនត្រឡប់ថយក្រោយវិញ។ អ្នកទាំងនោះជាជនចិន, វៀតណាម, ឥណ្ឌូនេស៊ី, កូរ៉េខាងត្បូង, អូស្រ្តាលី, បង់ក្លាដែស, ឥណ្ឌា, ថៃ, អាមេរិក, អង់គ្លេស, តៃវ៉ាន់, សឹង្ហបូរី, ស្រីលង្កា, ដាណឺម៉ាក, បារាំង, បែលហ្សិក, រុស្សី និងសេនឃិត។
អញ្ជើញមានប្រសាសន៍នាឱកាសនោះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានមានប្រសាសន៍កោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ និងកងកម្លាំងមានសមត្ថកិច្ចគ្រប់លំដាប់ថ្នាក់នៃអគ្គនាយកដ្ឋានអន្តោប្រវេសន៍ ព្រមទាំងក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ ដែលបានសហការគ្នាបំពេញតួនាទីភារកិច្ចយ៉ាងសកម្ម ប្រកបដោយស្មារតីទទួលខុសត្រូវ សម្រេចបាននូវសមិទ្ធផលនានាជាច្រើនក្នុងឆ្នាំ២០២២កន្លងទៅនេះ។
ឯកឧត្តម នាយឧត្តមសេនីយ៍ អគ្គនាយក បានចាត់ទុកស្នាដៃ និងសមិទ្ធផលដែលខិតខំសម្រេចបាន គឺពិតជាបានចូលរួមចំណែកក្នុងការថែរក្សាសុខសន្តិភាព ស្ថិរភាពនយោបាយ និងខិតខំថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម, ការលើកកម្ពស់លទ្ធិប្រជាធិបតេយ្យសេរីពហុបក្ស និងជំរុញការអភិវឌ្ឍសេដ្ឋកិច្ចសង្គមឱ្យកាន់តែមានការអភិវឌ្ឍរីកចម្រើនបន្ថែមទៀត។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានមានប្រសាសន៍ចូលរួមរំលឹកដល់មន្រ្តីនគរបាលទាំងអស់ថា ដេីម្បីសម្រេចគោលបំណងឱ្យរុងរឿងជោគជ័យនាពេលអនាគត ត្រូវមានការតាំងចិត្ត ប្រាជ្ញាចិត្តខ្លួនឯង សេចក្ដីព្យាយាមខ្ពស់ទេីបសម្រេចបានភាគរយល្អប្រសេីរ និងបន្តរក្សាទំនាក់ទំនង កិច្ចសហប្រតិបត្តិការណ៍ផ្ទៃក្នុងឱ្យកាន់តែល្អប្រសេីបន្ថែមទៀត។
ឯកឧត្តម នាយឧត្តមសេនីយ៍ អគ្គនាយក ក៏បានជូនពរដល់អង្គពិធីទាំងមូល ជាពិសេសមន្រ្តីនគរបាលថ្នាក់ក្រោយទទួលបានជោគជ័យគ្រប់ៗគ្នា។
ឯកឧត្តម នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យ នៃអគ្គនាយកដ្ឋានអន្ដោប្រវេសន៍ បានប្រាប់អ្នកសារព័ត៌មានថា ក្នុងរយៈពេលមួយឆ្នាំកន្លងមកនេះ អគ្គនាយកដ្ឋានទទួលជោគជ័យលើការគ្រប់គ្រងវត្តមានជនបរទេសដែលស្នាក់នៅ ការចេញ-ចូល គឺគ្រប់គ្រងដោយយកចិត្តទុកដាក់ម្មត់ចត់ និងទទួលបានលទ្ធផលជាវិជ្ជមាន ពិសេសការចេញ-ចូលតាមច្រកទ្វារព្រំដែនអន្ដរជាតិ ក៏ដូចជាការគ្រប់គ្រងស្នាក់នៅរបស់ជនបរទេស ដែលនៅផ្ទៃក្នុងប្រទេសដោយប្រើប្រាស់ប្រព័ន្ធបច្ចេកវិទ្យា។ឯកឧត្តម នាយឧត្តមសេនីយ៍ កែវ វណ្ណថន បានឲ្យដឹងទៀតថា ក្នុងឆ្នាំកន្លងទៅនេះ អគ្គនាយកដ្ឋានអន្តោប្រវេស៍ បានបណ្ដេញជនបរទេសដែលស្នាក់នៅដោយខុសច្បាប់ និងរត់គេចខ្លួនពីសំណាញ់ច្បាប់ពីបរទេសមកលាក់ខ្លួននៅកម្ពុជា សរុបចំនួន ៥,៨២៥នាក់ ក្នុងនោះមាន៤២សញ្ជាតិ។ សញ្ជាតិដែលបណ្ដេញចេញច្រើនជាងគេ គឺ ចិន, ថៃ, វៀតណាម, ឥណ្ឌូនេស៉ី និងម៉ាឡេស៉ី។
សម្រាប់ទិសដៅអនុវត្តបន្ដវិញ ត្រូវបានឯកឧត្តម នាយឧត្តមសេនីយ៍ អគ្គនាយករង បានអះអាងថា នឹងបន្ដខិតខំប្រឹងប្រែងធ្វើយ៉ាងណាដើម្បីឲ្យការគ្រប់គ្រងតាមច្រកទ្វារ ក៏ដូចជាការគ្រប់គ្រងនៅក្នុងប្រទេសទាំងជនបរទេសដែលមកស្នាក់នៅ ទាំងមកប្រកបមុខរបរឲ្យបានម្មត់ចត់ និងបន្ដស្រាវជ្រាវរកឲ្យឃើញនូវជនបរទេសដែលគេចខ្លួនពីសំណាញ់ច្បាប់នៅក្រៅប្រទេស ហើយចូលមកកម្ពុជា ដោយត្រូវស្រាវជ្រាវរកឲ្យឃើញ និងបណ្ដេញចេញពីកម្ពុជា ហើយអនុវត្តច្បាប់ស្ដីពីអន្ដោប្រវេសន៍ និងច្បាប់ស្ដីពីការងារដែលមានជាធរមាន។
បន្ថែមពីនេះ ដើម្បីរួមចំណែកពង្រឹងសន្ដិសុខ សណ្ដាប់ធ្នាប់ និងសុវត្ថិភាព ពេលកម្ពុជាធ្វើជាម្ចាស់ផ្ទះ នៃកិច្ចប្រជុំកីឡាស៉ីហ្គេម និងអាស៊ានប៉ារ៉ាហ្គេម នាពេលខាងមុខនេះ ។
ឯកឧត្តម នាយឧត្តមសេនីយ៍ កែវ វណ្ណថន បានបញ្ជាក់ថា អគ្គនាយកដ្ឋានប្រវេសន៍ បានកំណត់ឲ្យមន្ដ្រីគ្រប់ច្រកទ្វារពង្រឹងការត្រួតពិនិត្យ ការចេញចូលរបស់ភ្ញៀវឲ្យបានម្មត់ចត់ ទាំងអ្នកដំណើរទូទៅ កីឡាករ និងអ្នកដែលមកចូលរួមគាំទ្រ។
ជាមួយគ្នានេះ ឯកឧត្តម នាយឧត្តមសេនីយ៍ កែវ វណ្ណថន បានអំពាវនាវដល់ជនបរទេស ដែលមកទស្សនកិច្ចនៅកម្ពុជា ក៏ដូចជាទេសចរណ៍ បម្រើការងារ ធ្វើការវិនិយោគ ត្រូវគោរពឲ្យបានម៉ឺងម៉ាត់តាមច្បាប់របស់កម្ពុជា ជាពិសេសច្បាប់ស្ដីពីអន្ដោប្រវេសន៍ និងច្បាប់ស្ដីពីការងារ ៕
