សិក្ខាសាលាស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” ត្រូវបានបិទ

ភ្នំពេញ៖ អង្គភាព​អ្នកនាំពាក្យ​រាជរដ្ឋាភិបាលកម្ពុជា​ បានរៀបចំពិធីបិទសិក្ខាសាលាស្តីពី​ “ទិសដៅនៃការពង្រឹងយន្តការ​ និងគោលនយោបាយព័ត៌មាន”​ ជូនដល់មន្ទីរ​ ស្ថាប័នពាក់ព័ន្ធ​ មន្ត្រីរាជការមកពីខេត្តចំនួន៤ រួមមាន ៖ ខេត្ត​បន្ទាយមានជ័យ បាត់ដំបង ប៉ៃលិន និងខេត្តឧត្តរមានជ័យ។

ពិធីបិទសិក្ខាសាលានេះធ្វើក្រោមអធិបតីភាពដ៏ខ្ពង់ខ្ពស់​ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ​ រួមនឹងឯកឧត្តម ឱម ច័ន្ទ​តារ៉ា ជំនួយការអមទីស្ដីការគណៈរដ្ឋមន្ត្រី និងជាទីប្រឹក្សាអង្គភាពអ្នកនាំពាក្យរាជរដ្ឋាភិបាល ធ្វើឡើងនៅសាលាខេត្តបន្ទាយមានជ័យ នាថ្ងៃទី១៤ ខែមីនា ឆ្នាំ២០២៣ ។

ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យមានប្រសាសន៍នាឧកាសនោះថា ៖ ធ្វើការកោតសរសើរនិងវាយតម្លៃខ្ពស់ ចំពោះវត្តមានរបស់ឯកឧត្តម លោក ជំទាវ លោក លោកស្រីជាសិក្ខាកាមដែលអញ្ជើញមកពីខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ ដែលបានចំណាយពេលវេលានិងកម្លាំងកាយថាមពលចូលរួមក្រេបជញ្ជក់មេរៀនដ៏ល្អៗ ដើម្បីបង្កើនចំណេះដឹងបទពិសោធ​ថ្មីៗបន្ថែមទៀតសំដៅលើកកម្ពស់ពង្រឹងយន្តការ និងគោលការណ៍នយោបាយព័ត៌មាន សម្រាប់ការប្រា​ស្រ័យទំនាក់ទំនង ជាមួយប្រជាពលរដ្ឋនៅតាមមូលដ្ឋាន និងមជ្ឈដ្ឋាននានាប្រកបដោយប្រសិទ្ធភាព បរិយាបន្ន និងសមធម៌ ដោយធ្វើការបំផុស រំលេចសមិទ្ធផលសម្រេចបានពិតៗ និងគោលការណ៍ផ្ដល់សេវាសាធារណៈជូន ប្រជាពលរដ្ឋ ជាពិសេសរំលេចនូវស្នាដៃដ៏ធំធេងជាមរតកប្រវត្តិសាស្ត្ររបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មាន៤ចំណុចសំខាន់ៗ។

ឯកឧត្តម អ៊ុំ រាត្រី បានបន្តទៀតថា ៖ ១- ស្នាដៃប្រវត្តិសាស្ត្រ ផ្តើមចេញពីរណសិរ្សរួបរួមជាតិ ដើម្បីសង្គ្រោះជាតិ និងអាយុជីវិតប្រជាពលរដ្ឋចេញពីរបបប្រល័យពូជសាសន៍ ២- រណសិរ្ស ដើម្បីបញ្ចប់សង្គ្រាម ស្វែងរកដំណោះស្រាយនយោបាយរួមមួយនៃជម្លោះប្រដាប់ អាវុធនៅកម្ពុជា ឈានទៅសម្រេចបាននូវកិច្ចព្រមព្រៀងសន្តិភាពទីក្រុងប៉ារីស នៅថ្ងៃទី២៣ តុលា ១៩៩១។ ៣- គោលនយោបាយឈ្នះឈ្នះរបស់រាជរដ្ឋាភិបាល ៤- ការអនុគ្រោះយោគយល់ សម្រាប់ជនតាំងខ្លួនជាអ្នក ភៀសខ្លួននយោបាយ ក្នុងការធ្វើមាតុភូមិនិវត្តន៍ និងការរួបរួមជាតិ ដើម្បីវឌ្ឍនភាពរួមក្នុងទិសដៅឆ្នាំ២០៣០ និងឆ្នាំ២០៥០។

សូមបញ្ជាក់ថា​ ៖​ សិក្ខាសាលាស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” មានគោលបំណង ក្នុងកិច្ចពង្រឹង និងរំលេចការយល់ដឹងដល់ប្រជាពលរដ្ឋ នូវរាល់អន្តរវិស័យ នៅជុំវិញរដ្ឋបាលខេត្ត ដែលបានផ្តល់សេវាសាធារណៈ ប្រកបដោយការទទួលខុសត្រូវខ្ពស់ ជាមួយនឹងកិត្យានុភាព ឧត្តមភាពនៃការដឹកនាំរាប់តាំងពីថ្នាក់ជាតិ រហូតដល់ថ្នាក់ក្រោមជាតិផងដែរ៕