ព្រះមហាក្សត្រ និងសម្តេចម៉ែ យាងមកដល់កម្ពុជាវិញហើយ
ភ្នំពេញ៖ នៅល្ងាចថ្ងៃទី១៦ ខែមីនា ឆ្នាំ២០២៣នេះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់ បានយាងមកដល់ប្រទេសកម្ពុជាវិញហើយ បន្ទាប់ពីគង់ប្រថាប់នៅរដ្ឋធានីប៉េកាំង ប្រទេសចិន អស់រយៈពេលប្រមាណជាមួយខែ។
សូមរំលឹកថា ព្រះករុណាជាអម្ចាស់ជីវិតតម្កល់លើត្បូង និងសម្តេចព្រះវររាជមាតាជាតិខ្មែរ បានសព្វព្រះរាជហឫទ័យយាងទៅកាន់រដ្ឋធានីប៉េកាំង ប្រទេសចិន កាលពីថ្ងៃទី១២ ខែកុម្ភៈ ឆ្នាំ២០២៣ ដើម្បីពិនិត្យព្រះរាជសុខភាពតាមការយាងរបស់ក្រុមគ្រូពេទ្យចិន។
ព្រះរាជដំណើរយាងនិវត្តន៍ដល់អាកាសយានដ្ឋានអន្តរជាតិភ្នំពេញ សម្តេចព្រះបរមនាថ នរោត្តម សីហមុនី និងសម្តេចព្រះវររាជមាតាជាតិខ្មែរ ទទួលបានការថ្វាយព្រះរាជវឌ្ឍនកិច្ចទទួលព្រះរាជដំណើរពីសំណាក់ដឹកនាំជាន់ខ្ពស់នៃស្ថាប័នជាតិ មានដូចជា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្ត្រីកម្ពុជា, សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងព្រះញាតិវង្ស និងមន្ត្រីរាជការជាច្រើនអង្គ/នាក់ទៀត៕
