នាយឧត្តមសេនីយ៍ សែម សុវណ្ណនី អញ្ជើញបិទវគ្គហ្វឹកហ្វឺនជំនាញបោសសម្អាតមីនមនុស្សធម៌ និងប្រគល់សម្ភារបោសសម្អាតមីន ជូនកងអនុសេនាតូចបោសសំអាតមីនចំនួន ៥កង
ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន និងជាអគ្គនាយកមជ្ឈមណ្ឌលជាតិរក្សាសន្តិភាព នៅថ្ងៃទី១៧ ខែមីនា ឆ្នាំ២០២៣ បានអញ្ជើញបិទវគ្គហ្វឹកហ្វឺនជំនាញបោសសម្អាតមីនមនុស្សធម៌និងពិធីផ្ទេរប្រគល់សម្ភារបោសសម្អាតមីន ជូនកងអនុសេនាតូចបោសសម្អាតមីនចំនួន៥កង មកពីមជ្ឈមណ្ឌលជាតិរក្សាសន្តិភាព, បញ្ជាការដ្ឋានកងទ័ពជើងទឹក និងបញ្ជាការដ្ឋានកងវិស្វកម្មអគ្គបញ្ជាការ នៃកងយោធពលខេមរៈភូមិន្ទ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ នាស្រុកភ្នំស្រួច ខេត្តកំពង់ស្ពឺ។
ឯកឧត្តម សែម សុវណ្ណនី ក្នុងនាមសម្តេចពិជ័យសេនា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈកម្មាធិការជាតិ និងអាជ្ញាធរមីនកម្ពុជា បានថ្លែងថា វគ្គហ្វឹកហ្វឺននេះ សំដៅដល់ការពង្រឹងសមត្ថភាព កងយោធពលខេមរភូមិន្ទ សម្រាប់ចូលរួមបោសសម្អាតមីនមនុស្សធម៌ក្នុងប្រទេស និងដើម្បីលើកកម្ពស់សមត្ថភាពកងកម្លាំងរក្សាសន្តិភាព សម្រាប់អនុវត្តភារកិច្ចក្រោមឆ័ត្រ អង្គការសហប្រជាជាតិ។ វគ្គហ្វឹកហ្វឺននេះបានមក ដោយសារកិច្ចខិតខំប្រឹងប្រែង ប្រកបដោយគតិបណ្ឌិតដ៏ឈ្លាសវៃ និងប៉ិនប្រសព្វរបស់ សម្តេចតេជោ ហ៊ុន សែន ក្នុងការកៀរគរថវិកាពីសប្បុរសជន ដើម្បីភូមិ-ឃុំមានសុវត្ថិភាព។ ចំពោះសមត្ថភាព កងអនុសេនាតូចបោសសម្អាតមីនទាំង៥កង មកពីបញ្ជាការដ្ឋានវិស្វកម្មអគ្គបញ្ជាការ បញ្ជាការដ្ឋានកងទ័ពជើងទឹក ព្រមទាំងមជ្ឈមណ្ឌលជាតិ ទាំងសមត្ថភាពបោសសម្អាតមីន បច្ចេកទេសបើកបរ ជំនាញក្នុងការដឹកនាំគ្រប់គ្រងចំការមីន ការរៀបចំគ្រាប់ សម្រាប់ធ្វើការកំទេច និងសមត្ថភាពសង្គ្រោះក្នុងចំការមីន។ សម្តេចតេជោ នាយករដ្ឋមន្ត្រី បានផ្តួចផ្តើមកម្មវិធី “ផ្តល់ដីសុវត្ថិភាព បង្កើតស្នាម ញញឹម” ដើម្បីចូលរួមចំណែកសម្រេចបាន នូវកម្ពុជាមួយគ្មានមីននៅឆ្នាំ២០២៥។
ឯឧត្តមសេនីយ៍ឯក ហួត គឹមសាន អគ្គនាយករងមជ្ឈមណ្ឌលជាតិរក្សាសន្តិភាព និងជានាយកសាលាហ្វឹកហ្វឺនកងកម្លាំងរក្សាសន្តិភាពពហុជាតិ បានបញ្ជាក់ថា នេះជាវគ្គទី២ ដែលសាលាទទួលសិក្ខាកាម មកពីមជ្ឈមណ្ឌលជាតិ បញ្ជាការដ្ឋានកងទ័ពជើងទឹក និងបញ្ជាការដ្ឋានវិស្វកម្មអគ្គបញ្ជាការ មកធ្វើការហ្វឹកហ្វឺន ដែលវគ្គទី១ បានប្រារព្ធធ្វើឡើងនាកំឡុង ខែសីហា ឆ្នាំ២០២២ មានសិក្ខាកាមចំនួន៩កងអនុសេនាតូច ស្មើនឹង២៣៤នាក់ មកពីបញ្ជាការដ្ឋានកងទ័ពជើងគោក។ វគ្គនេះ គឺហ្វឹកហ្វឺនលើកជំនាញ បោសសម្អាតមីនដោយដៃ, កម្ទេចគ្រាប់មិនទាន់ផ្ទុះ (EOD), សិក្សាស្រាវជ្រាវប្លង់, បើកបររយន្តតូច ធំ និងជំនាញសង្គ្រោះបឋម។ ក្រៅពីជំនាញខាងលើ ក៏បានហ្វឹកប្រើប្រាស់ម៉ាស៊ីនរាវមីន ដែលជាបច្ចេកវិទ្យាចុងក្រោយផងដែរ។
ចំពោះសិក្ខាកាមមកពីបញ្ជាការដ្ឋានវិស្វកម្មអគ្គបញ្ជាការ ទទួលបានរយន្តធំចំនួន១គ្រឿង រថយន្តពេទ្យ១គ្រឿង រថយន្តFord ៣គ្រឿង សម្ភារបោសសម្អាតមីន និងវិទ្យុទាក់ទង ចំណែកបញ្ជាការដ្ឋានកងទ័ពជើងទឹក ទទួលបានរថយន្តធំ១គ្រឿង រថយន្តពេទ្យ១គ្រឿង រថយន្តFord ១គ្រឿង សម្ភារបោសសម្អាតមីន និងវិទ្យុទាក់ទង ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
