លោកឧកញ៉ា ហួត ឈឿន៖ ឯកឧត្ដមបណ្ឌិត ហ៊ុន ម៉ាណែត មានគុណសម្បត្តិសាកសមនឹងទទួល ឋានន្តរស័ក្តិជានាយឧត្តមសេនីយ៍

ភ្នំពេញ៖ ព្រះករុណា ព្រះបាទ សម្តេចព្រះ បរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី១៧ ខែមីនា ឆ្នាំ២០២៣ បានចេញព្រះរាជក្រឹត្យដំឡើងឋានន្តរស័ក្តិថ្នាក់នាយឧត្តមសេនីយ៍ ដល់បណ្ឌិត ហ៊ុន ម៉ាណែត ជាអគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។

ជុំវិញការទទួលបានឋានន្តរស័ក្តិថ្នាក់នាយឧត្តមសេនីយ៍របស់បណ្ឌិត ហ៊ុន ម៉ាណែត ត្រូវបានលោកឧកញ៉ា ហួត ឈឿន ប្រធានសភាពាណិជ្ជកម្មពីរខេត្តគឺ មណ្ឌលខេត្តកំពង់ចាម និងខេត្តមណ្ឌលគិរី បានបង្ហាញទស្សនៈផ្ទាល់ខ្លួនថា ឯកត្ដមបណ្ឌិត ហ៊ុន ម៉ាណែត ពិតជាមានគុណសម្បត្តិគ្រប់គ្រាន់នឹងទទួល ឋានន្តរស័ក្តិជានាយឧត្តមសេនីយ៍(ផ្កាយ៤)។

លោកឧកញ៉ា ហួត ឈឿនបានសម្តែងការគាំទ្រពេញទំហឹងចំពោះការប្រោសព្រះរាជទានដំឡើងឋានន្តរស័ក្តិនាយឧត្តមសេនីយ៍ (ផ្កាយ៤) ជូនបណ្ឌិត ហ៊ុន ម៉ាណែត។

លោកឧកញ៉ា បានគាំទ្រការដំឡើងនូវឋានន្តរស័ក្តិនេះ ដោយបានកត់សម្គាល់នូវគុណសម្បត្តិធំៗមួយចំនួនរបស់ឯកឧត្ដមបណ្ឌិតដោយក្នុងនោះនាយឧត្តមសេនីយ៍ ហ៊ុន ម៉ាណែត ជានាយទាហានជាន់ខ្ពស់មួយរូបរបស់កម្ពុជា ដែលបានបញ្ចប់ការសិក្សាខ្ពស់រួមមាន៖ ជាកូនខ្មែរដំបូងគេ បានបញ្ចប់ការសិក្សានៅសាលាបណ្ឌិត្យយោធាអាមេរិក West Point និងបានបញ្ចប់ថ្នាក់អនុបណ្ឌិតសេដ្ឋកិច្ច នៅសាកលវិទ្យាល័យ New York សហរដ្ឋអាមេរិក និងថ្នាក់បណ្ឌិតសេដ្ឋកិច្ច នៅសាកលវិទ្យាល័យ Bristol នៃចក្រភពអង់គ្លេស។

បន្ថែមពីលើសមត្ថភាពនៃចំណេះដឹងហើយនោះ នាយឧត្តមសេនីយ៍ ហ៊ុន ម៉ាណែត ជានាយទាហាន ដែលបានចូលប្រឡូកក្នុងកិច្ចការយោធាដោយផ្ទាល់តាំងពីក្រោយពេលបញ្ចប់ការសិក្សា។ ជាពិសេសក្នុងសមរភូមិនាប្រាសាទព្រះវិហារ ដោយការឈ្លានពានរបស់ថៃ នាឆ្នាំ២០០៨ នាយឧត្តមសេនីយ៍ ហ៊ុន ម៉ាណែត ជានាយទាហានវ័យក្មេងមួយរូប មានភាពអង់អាចក្លាហាន និងបានចុះជាប់ប្រចាំទៅសមរភូមិជួរមុខ។

លោកឧកញ៉ា ហួត ឈឿន បានកត់សម្គាល់ឃើញថា នាយឧត្តមសេនីយ៍ ហ៊ុន ម៉ាណែត តែងចុះទៅដល់សមរភូមិមុខនៅប្រាសាទព្រះវិហារ ប្រាសាទតាមាន់ និងប្រាសាទតាក្របីជាដើមហើយឯកឧត្ដមបណ្ឌិត ហ៊ុន ម៉ាណែត មានភាពច្បាស់លាស់ និងប្រាកដនិយម ភាពអង់អាចក្លាហាន។

បន្ថែមពីលើនេះ លោកឧកញ៉ា ហួត ឈឿន ក៏បានមើលឃើញថា នាយឧត្តមសេនីយ៍ ហ៊ុន ម៉ាណែត មានសណ្តានចិត្តប្រកបដោយព្រហ្មវិហារធម៌ ខ្វាយខ្វល់គិតពីសុខទុក្ខ និងមានទំនួលខុសត្រូវខ្ពស់ចំពោះពលទាហាន ដោយបានយកអំណោយសម្ភារៈ ជាពិសេសទឹកចិត្តជាមួយយុទ្ធជនជួរមុខ ហើយនាយឧត្តមសេនីយ៍ ហ៊ុន ម៉ាណែត មានទាំងព្រមទាំងអត្តចរិត សីលធម៌ គុណធម៌ និងភាពជាអ្នកដឹកនាំ៕