ឧត្តមសេនីយ៍ឯក ជីវ ផល្លី អញ្ជើញបើកវគ្គបណ្តុះបណ្តាល ស្តីពីការបង្ការទប់ស្កាត់អំពើជួញដូរមនុស្សឆ្លងដែន ការកំណត់អត្តសញ្ញាណជន រងគ្រោះ ការស៊ើបអង្កេតប្រមូលភស្តុតាងនិងបង្ក្រាបករណីជួញដូរមនុស្ស
ភ្នំពេញ៖ នៅស្នងការដ្ឋាននគរបាលខេត្តបន្ទាយមានជ័យ នាថ្ងៃទី២០ ខែមីនា ឆ្នាំ២០២៣ បានរៀបចំបើកវគ្គ បណ្តុះបណ្តាល ស្តីពីការបង្ការទប់ស្កាត់អំពើជួញដូរមនុស្សឆ្លងដែន ការកំណត់អត្តសញ្ញាណជនរងគ្រោះ ការស៊ើបអង្កេតប្រមូលវត្ថុតាងនិងបង្ក្រាបករណីជួញដូរមនុស្ស រយៈពេល០៣ថ្ងៃចាប់ពីថ្ងៃទី២០ដល់ថ្ងៃទី២២ ខែមីនា ឆ្នាំ២០២៣ ក្រោមអធិបតីភាព លោកឧត្តមសេនីយ៍ឯក ជីវ ផល្លី អគ្គស្នងការរង នគរបាលជាតិតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ មានការចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរង នាយ ការិយាល័យ លោក Damian Robustelli នាយកប្រចាំតំបន់អាស៊ី នៃអង្គការ OPERATION UNDERGROUND RAILROAD នាយការិយាល័យ និងសិក្ខាកាមជាច្រើននាក់ ។
ថ្លែងក្នុងពិធីបើវគ្គនោះដែរ លោកឧត្តមសេនីយ៍ឯក ជីវ ផល្លី អគ្គស្នងការរង មានប្រសាសន៍ថា៖ ដោយមានការអនុញ្ញាតិ ពី ឯកឧត្តម នាយឧត្តមសេនីយ៍ សន្តិបណ្ឌិតនេត សាវឿណ អគ្គស្នងការនគរបាលជាតិ លោកមានកិត្តិយស និងមានសេចក្តីរីករាយក្នុងការមកចូលរួមបើកវគ្គបណ្តុះបណ្តាល ស្តីពីការបង្ការទប់ស្កាត់អំពើជួញដូរមនុស្សឆ្លងដែន ការកំណត់អត្តសញ្ញាណជនរងគ្រោះ ការស៊ើបអង្កេតប្រមូលវត្ថុតាងនិងបង្ក្រាបករណីជួញដូរមនុស្ស នៅស្នងារដ្ឋាននគរបាលខេត្តបន្ទាយមានជ័យ នាពេលនេះ ។
លោកឧត្តមសេនីយ៍ អគ្គស្នងការរង បន្តថា៖អំពើជួញដូរមនុស្ស គឺជាឧក្រិដ្ឋកម្មឆ្លងដែន ដែលមួយថ្ងៃៗ មានការវិត្តន៍និងប្រែប្រួលពីសកម្មភាពមួយទៅសកម្មភាពមួយ ដែលពីការជួញដូរមនុស្សមានភាពសាមញ្ញ ប៉ុន្តែបច្ចប្បន្នមានការប្រែប្រួលពាក់ព័ន្ធនឹងស្ថានភាពស្មុគស្មាញ ពីការជួញដូរតាមរូបភាពធម្មតាទៅការជួញដូរមនុស្សតាមរូបភាពបច្ចេកវិទ្យា ។ការបង្កើនវគ្គបណ្តុះបណ្តាលគឺជាការចាំបាច់ ហើយជាតម្រូវការដល់សមត្ថកិច្ចដែលជាមន្ត្រីអនុវត្តច្បាប់ពាក់ព័ន្ធនៅក្នុងមូលដ្ឋានរបស់ខ្លួន ក្នុងការឆ្លើយតបទៅនឹងកង្វល់របស់ប្រជាពលរដ្ឋ របស់ជនរងគ្រោះ ។
មួយវិញទៀតវគ្គបណ្តុះបណ្តាលពេលនេះ ខុសពីវគ្គបណ្តុះ បណ្តាលដទៃទៀត ដែលយើងអាចចែករំលែកនិងបទពិសោធន៍ចំណេះដឹងពាក់ព័ន្ធទៅនឹងអំពើជួញដូរមនុស្សតាមប្រព័ន្ធអនឡាញ ក្រៅប្រពន្ធ័អនឡាញ និងអំពើជួញដូរមនុស្សតាមរូបភាពកេងប្រវ័ញ្ចពលកម្ម ក៏ដូចជាអំពើជួញដូរមនុស្សតាមរូបភាពពរពោះជំនួស និងមានទម្រង់ពាកព័ន្ធជាច្រើនទៀត ដែលយើងត្រូវរួមគ្នាដឹង រួមគ្នាបង្ការទប់ស្កាត់និងបង្រ្កាប ។ ទន្ទឹមនោះការលើកកម្ពស់សមត្ថភាពយល់ដឹង ត្រូវការថវិកានិងត្រូវការវគ្គបណ្តុះបណ្តាចាំបាច់ណាស់ ដូចជាខេត្តបន្ទាយមានជ័យ មានព្រំដែនជាប់នឹងប្រទេសថៃ ដែលត្រូវធ្វើកិច្ចសហប្រតបត្តិការក្នុងការផ្តល់ព័ត៌មានទៅវិញទៅមក ដើម្បីទប់ស្កាត់នូវការជួញដូរមនុស្សឆ្ងដែន ក៏ដូចជាការស្រាវជ្រាវបង្ក្រាបបទល្មើស ហើយអំពើជួញដូរមនុស្សក៏ពាក់ព័ន្ធជាមួយនឹងបទល្មើសព្រហ្មទណ្ឌ និងបទល្មើសសម្អាតប្រាក់ផងដែរ ៕
