ឧត្តមសេនីយ៍ឯក ឯក សំអូន៖ យោធិន ត្រូវបន្តអនុវត្តឱ្យបានល្អ តាមភារកិច្ចដែលថ្នាក់លើប្រគល់ជូន ដើម្បីបន្តទទួលបានទំនុកចិត្ត ពីថ្នាក់ដឹកនាំ ក្នុងការដំឡើងសក្កិ មុខតំណែង និងគ្រឿងឥស្សរិយយស

ភ្នំពេញ៖ ក្នុងពិធីបូកសរុបលទ្ធផលការងារយោធាសន្តិសុខឆ្នាំ២០២២ និងផ្សព្វផ្សាយផែនការសកម្មភាពការងារយោធាសន្តិសុខឆ្នាំ២០២៣ របស់កងពលតូចថ្មើរជើងលេខ៥២ នៅថ្ងៃទី២២ ខែមីនា ឆ្នាំ២០២៣ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោកមេបញ្ជាការយោធភូមិភាគទី៥ បានថ្លែងថា យោធិន កងពលតូចថ្មើរជើងលេខ៥២ ត្រូវបន្តអនុវត្តឱ្យបានល្អបន្ថែមទៀត តាមភារកិច្ចដែលថ្នាក់លើបានប្រគល់ជូន ដើម្បីបន្តទទួលបាននូវទំនុកចិត្តពីថ្នាក់ដឹកនាំគ្រប់លំដាប់ថ្នាក់ ក្នុងការដំឡើងឋានន្តរសក្កិ មុខតំណែង និងគ្រឿងឥស្សរិយយសជាថ្មីទៀត ។

ក្នុងឱកាសបូកសរុប ឯកឧត្តម ឧត្តមសេនីយ៍ឯក ឯក សំអូន បានធ្វើការកោតសរសើរដល់កម្លាំងកងពលតូចថ្មើរជើងលេខ៥២ ដែលកន្លងមកបានប្រឹងប្រែងសម្រេចបានជោគជ័យគ្រប់ភារកិច្ចដែលថ្នាក់លើដាក់ជូន និងការចុះជួយសង្គ្រោះប្រជាពលរដ្ឋដែលជួបគ្រោះមហន្តរាយផ្សេងៗ រហូតមានការសរសើរមិនដាច់ពីមាត់ពីសំណាក់ប្រជាពលរដ្ឋរស់នៅក្នុងភូមិសាស្ត្រដែលខ្លួនទទួលខុសត្រូវ អង្គភាពបានចូលរួមចំណែកយ៉ាងសំខាន់ក្នុងការទប់ស្កាត់និងការពារជំងឺកូវីដ-១៩។

ដោយឈរលើផែនការការងារកសាងពង្រឹងអង្គភាពរឹងមាំលើគ្រប់វិស័យ របស់យោធភូមិភាគទី៥ ធ្វើឱ្យកងពលតូចថ្មើរជើងលេខ៥២ ធានាបានគ្រប់ភារកិច្ចដែលថ្នាក់លើប្រគល់ជូន ជាពិសេសលើការងារហ្វឹកហ្វឺន ប្រមូលផ្តុំគ្រប់គ្រងកម្លាំង ជំរុញការងារបង្កបង្កើនផល ចិញ្ចឹមសត្វ ធានាជីវភាពកងទ័ព មានផ្ទះបាយរួម មានម្ហូបអាហារហូបគ្រប់គ្រាន់ ហើយបានបញ្ជូនកម្លាំងចុះប្រតិបត្តិការជួយសង្រ្គោះប្រជាពលរដ្ឋ រងគ្រោះដោយធម្មជាតិ គ្រោះទឹកជំនន់ ខ្យល់កន្រ្តាក់ ជួយកសាង ជួសជុលផ្ទះ​ ជួយច្រូតស្រូវជូនប្រជាពលរដ្ឋ​។

ឯកឧត្តម ឧត្តមសេនីយ៍ឯក បានថ្លែងនូវការអបអរសាទរ ចំពោះយោធិនដែលមានស្នាដៃល្អក្នុងការបំពេញភារកិច្ចបម្រើជាតិមាតុភូមិនាពេលកន្លងមក ហើយក៏បានអំពាវនាវដល់យោធិនទាំងអស់ របស់កងពលតូចថ្មើរជើងលេខ៥២ ត្រូវបន្តអនុវត្តឱ្យបានល្អបន្ថែមទៀត តាមភារកិច្ចដែលថ្នាក់លើបានប្រគល់ជូន ដើម្បីបន្តទទួលបាននូវទំនុកចិត្តពីថ្នាក់ដឹកនាំគ្រប់លំដាប់ថ្នាក់ ក្នុងការដំឡើងឋានន្តរសក្កិ មុខតំណែង និងគ្រឿងឥស្សរិយយសជាថ្មីទៀត។

នៅក្នុងឱកាសនេះផងដែរ ឯកឧត្តម ឧត្តមសេនីយ៍ឯក ព្រមទាំងនាយទាហាន នាយទាហានរង និងពលទាហានទាំងអស់ សូមចូលរួមអបអរសាទរយ៉ាងក្លៀវក្លាជាទីបំផុត ចំពោះ ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ដែលត្រូវបានព្រះមហាក្សត្រ នៃព្រះរាជាណាចក្រកម្ពុជា តែងតាំងឋានន្តរសក្តិថ្នាក់នាយឧត្តមសេនីយ៍ នៃកងយោធពលខេមរភូមិន្ទ និងសូមគោរពជូនពរ ឯកឧត្តម មេបញ្ជាការ និងលោកជំទាវ ព្រមទាំងបុត្រាបុត្រី សូមទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ។

ជាចុងបញ្ចប់ ឯកឧត្តម ក៏បានបំពាក់គ្រឿងឥស្សរិយយយស ជូនប័ណ្ណសរសើរ លិខិតសរសើរ រង្វាន់ ជូនដល់នាយទាហាន ពលទាហាន ដែលមានស្នាដៃឆ្នើមក្នុងការងារ១ឆ្នាំកន្លងទៅ និងប្រគល់អំណោយរបស់ក្រសួងការពារជាតិ ជូនដល់បណ្តាកងឯកភាព ចំណុះកងពលតូចថ្មើរជើងលេខ៥២ ផងដែរ៕