លោកជំទាវ ជូ ប៊ុនអេង៖ ឆ្នាំ២០២២ កម្ពុជាជួយសង្គ្រោះជនរងគ្រោះ ពីអាជីវកម្មផ្លូវភេទជាង ២០០នាក់ ឃាត់ខ្លួនជនសង្ស័យ ១៤៩នាក់
ភ្នំពេញ៖ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ដ្រៃយ៍ គ.ជ.ប.ជ បានថ្លែងឲ្យដឹងថា ក្នុងឆ្នាំ២០២២ កម្ពុជាជួយសង្គ្រោះជនរងគ្រោះ ពីការធ្វើអាជីវកម្មផ្លូវភេទ ២២៥នាក់ និងឃាត់ខ្លួនជនសង្ស័យ ១៤៩នាក់ ។
ក្នុងពិធីផ្សព្វផ្សាយរបាយការណ៍ជាតិ ស្ដីពីការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២២ និងលើកទិសដៅការងារឆ្នាំ២០២៣ របស់ គ.ជ.ប.ជ នាថ្ងៃទី២៣ មីនានេះ លោកជំទាវ ជូ ប៊ុនអេង បានធ្វើរបាយការណ៍សង្ខេប ស្ដីពីការងារប្រយុទ្ធប្រឆាំងអំពើជួញដូរមនុស្ស គោរពជូន សម្ដេចក្រឡាហោម ស ខេង និងអង្គពិធីថាជ្រាបថា ក្នុងឆ្នាំ២០២២ គ្រប់ក្រសួង ស្ថាប័ន មន្ទីរ អង្គភាពរាជធានី-ខេត្ត ជាសមាជិកនៃ គ.ជ.ប.ជ នៅគ្រប់កម្រិត និងមានការចូលរួមគាំទ្រសហការដោយអង្គការដៃគូជាតិ និងអន្ដរជាតិពាក់ព័ន្ធ បានបន្ដខិតខំធ្វើសកម្មភាពប្រតិបត្តិការ តាមយុទ្ធសាស្ដ្រដែលបានកំណត់បានយ៉ាងល្អប្រសើរប្រកបដោយការយកចិត្តទុកដាក់ខ្ពស់។
លោកជំទាវ អនុប្រធានអចិន្ដ្រៃយ៍ គ.ជ.ប.ជ បញ្ជាក់ថា «ករណីអំពើធ្វើអាជីវកម្មផ្លូវភេទ ឆ្នាំ២០២២ បង្ក្រាបបាន ១៣០ករណី/១២៤ករណី (កើន ៦ករណី) ឃាត់ខ្លួនជនសង្ស័យចំនួន ១៤៩នាក់ អនីតិជន ១៩នាក់ និងជនបរទស ១០នាក់ មាន ៣សញ្ជាតិ។ ដោយឡែក សង្គ្រោះជនរងគ្រោះចំនួន ២២៥នាក់ មានអាយុក្រោម ១៥ឆ្នាំ ចំនួន ១២៤នាក់, អាយុ១៥-១៧ឆ្នាំ ចំនួន៣១នាក់ និងអាយុ ១៨ឆ្នាំឡើង ៧០នាក់ (ប្រគល់ឱ្យមន្ទីរសង្គមកិច្ច ៤៨នាក់ និងប្រគល់ឱ្យគ្រួសារ ១៧៧នាក់)» ។
លើសពីនេះ លោកជំទាវ បន្ថែមថា ការដាក់ចេញនូវផែនការប្រតិបត្តិការបង្កើនការបង្ក្រាបអំពើជួញដូរមនុស្សគ្រប់ទម្រង់ របស់ គ.ជ.ប.ជ ចាប់ពីថ្ងៃទី១៨ ខែសីហា ឆ្នាំ២០២២ ជាលទ្ធផលដល់ត្រឹមថ្ងៃទី១០ ខែវិច្ឆិកា ឆ្នាំ ២០២២ សមត្ថកិច្ច បានរកឃើញជនបរទេស ៨៧១នាក់ មកពី ១២ប្រទេស ក្នុងនោះ មាន ១៦២នាក់ ត្រូវបានកំណត់អត្តសញ្ញាណ រកឃើញថា ពាក់ព័ន្ធនឹងអំពើរត់ពន្ធ និងជួញដូរមនុស្ស ហើយ៨០នាក់ទៀត ត្រូវបានកំណត់ថា ជាជនសង្ស័យប្រព្រឹត្តបទល្មើស ដែលត្រូវបានឃាត់ខ្លួន បញ្ចូនទៅតុលាការ ៕
