ឯកឧត្តម ដុំ យុហៀន អញ្ជើញចូលរួមចុះសាកសួរសុខទុក្ខយោធិន ដែលឈរជើងនៅយោធភូមិភាគ៣ ខេត្តកោះកុង

ភ្នំពេញ៖ ឯកឧត្តម ដុំ យុហៀន តំណាងរាស្ត្រមណ្ឌលខេត្តកោះកុង និងជាសមាជិកគណ:កម្មការទី៥ នៃរដ្ឋសភា នាព្រឹលថ្ងៃទី២៣ ខែមីនា ឆ្នាំ២០២៣ បានអញ្ជើញចូលរួមអមដំណើរសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តកោះកុង បានអញ្ជើញចុះសំណេះសំណាលសាកសួរសុខទុក្ខ និងនាំយកនូវអំណោយចែកជូនដល់យោធិនដែលកំពុងឈរជើងនៅយោធភូមិភាគ៣ ក្នុងទិសនៃខេត្តកោះកុង។

ក្នុងឱកាសនោះដែរ​ សម្តេចពិជ័យសេនា ទៀ បាញ់ បានលើកឡើងអំពីស្ថានភាព នៃការរីកចម្រើនរបស់ប្រទេសជាតិ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រែក្លាយប្រទេសកម្ពុជាពីភ្លើងសង្គ្រាមមកមានសុខសន្តិភាពពេញលេញ និងបានធ្វើការអភិវឌ្ឍនប្រទេសជាតិឲ្យមានការរីកចម្រើនលើគ្រប់វិស័យ ជាពិសេសការជួបសំណេះសំណាលនាពេលនេះក៏ដូចជាបណ្តាឆ្នាំកន្លងមក ដែលសម្តេចតែងតែជួបសំណេះសំណាលជាមួយយោធិន ត្រៀមលក្ខណៈសម្បត្តិក្នុងការរៀបចំពិធីបុណ្យអង្គរសង្ក្រាន្តនាពេលខាងមុខ និងត្រៀមលក្ខណៈធ្វើជាម្ចាស់ផ្ទះក្នុងការរៀបចំព្រឹត្តការណ៍ស៊ីហ្គេមលើកទី៣២ ( 32nd SEA Games) និងអាស៊ានប៉ារ៉ាហ្គេមលើកទី១២​ នាពេលខាងមុខនេះ។​

ក្រោយបញ្ចប់កិច្ចសំណេះសំណាលរួចមក​ សម្តេចពិជ័យសេនា បានអញ្ជើញចុះពិនិត្យមើលវឌ្ឍនភាពនៃការសាងសង់ស្តូបវិមានឈ្នះ ឈ្នះ នៅកោះកុង និងបានចុះសំណេះសំណាល និងនាំយកនូវអំណោយជូនចំពោះកម្មករ កម្មការិនី ដែលកំពុងធ្វើការងារយ៉ាងសកម្មក្នុងការដ្ឋានសាងសង់នេះផងដែរ ៕