ឯកឧត្តម វេង សាខុន បានចូលរួមអបអរសាទរដល់ប្រជាពលរដ្ឋនៅស្រុកតំបែរដែលទទួលបាននូវសមិទ្ធផលថ្មីមួយទៀតក្នុងវិស័យពុទ្ធចក្រ
ភ្នំពេញ៖ ឯកឧត្តម វេង សាខុន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋាន ស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្តកំពង់ចាម នាព្រឹកថ្ងៃអាទិត្យ ៥កើត ខែចេត្រ ឆ្នាំខាល ចត្វាស័ក ពស ២៥៦៦ ត្រូវនឹងថ្ងៃទី២៦ ខែមីនា ឆ្នាំ២០២៣ បានអញ្ជើញជាអធិបតីក្នុងពិធីបុណ្យឆ្លងឧបដ្ឋានសាលា និងសម្ពោធសមិទ្ធផលនានា នៅវត្តមង្គលគិរី ហៅវត្តដូនមាស ស្ថិតក្នុងភូមិដូនមាស ឃុំគោកស្រុក ស្រុកតំបែរ ខេត្តត្បូងឃ្មុំ។ ពិធីនេះក៏មានការអញ្ជើញចូលរួមរបស់សមាជិក សមាជិកានៃក្រុមការងាររាជរដ្ឋាភិបាលចុះមូលដ្ឋានថ្នាក់ស្រុក ថ្នាក់ឃុំ ថ្នាក់ភូមិ និងពុទ្ធបរិស័ទចំណុះជើងវត្ត សរុបប្រមាណជាង ៣០០នាក់។
មានមតិសំណេះសំណាលទៅកាន់ព្រះសង្ឃ និងពុទ្ធបរិស័ទ ឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តី បានពាំនាំនូវបណ្តាំផ្ញើសាកសួរសុខទុក្ខរបស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលសម្តេចទាំងពីរតែងតែគិតគូរ និងបារម្ភពីសុខទុក្ខ ជីវភាព និងស្ថានភាពរស់នៅរបស់ប្រជាពលរដ្ឋយើងគ្រប់ៗរូប។
ឯកឧត្តមរដ្ឋមន្រ្តីប្រតិភូ ក៏បានចូលរួមអបអរសាទរដល់ប្រជាពលរដ្ឋនៅស្រុកតំបែរដែលទទួលបាននូវសមិទ្ធផលថ្មីមួយទៀតក្នុងវិស័យពុទ្ធចក្រ។ សមិទ្ធផលថ្មីនេះអាចកើតចេញបាន ក៏ដោយសារប្រទេសយើងមានសុខសន្តិភាពពេញលេញនៅទូទាំងប្រទេស ហើយសុខសន្តិភាពនេះបង្កើតឡើងក៏ដោយសារគណបក្សប្រជាជនកម្ពុជា ដែលមានសម្តេចតេជោជាប្រធាន។
ឯកឧត្តមរដ្ឋមន្រ្តីប្រតិភូ បានបន្ថែមទៀតថា ពីអតីតកាល ប្រទេសជាតិយើងឆ្លងកាត់ដំណាក់កាលដ៏សែនលំបាក ភ្លើងសង្រ្គាមរាមរ៉ៃពេញផ្ទៃប្រទេស អសន្តិសុខស្បៀង ប្រជាពលរដ្ឋយើងប្រាថ្នានិងសង្ឃឹមចង់បានតែភាពសុខសន្តិភាព និងសិទ្ធិរស់រានមានជីវិតតែប៉ុណ្ណោះ។ ក្តីប្រាថ្នារបស់ប្រជាពលរដ្ឋយើងត្រូវបានសម្រេចដោយសម្តេចតេជោ តាមរយៈថ្ងៃជ័យជំនះ ៧ មករា ឆ្នាំ១៩៧៩ និងនយោបាយឈ្នះ ឈ្នះ ដែលបង្កើតបានជាម្លប់នៃសុខសន្តិភាព ស្ថេរភាពសង្គម និងការអភិវឌ្ឍជាបន្តបន្ទាប់។ ជាក់ស្ដែងស្រុកតំបែរបានទទួលនូវការអភិវឌ្ឍហេដ្ឋរចនាសម្ព័ន្ធជាច្រើនដូចជា ផ្លូវថ្នល់ ស្ពាន អគ្គិសនី សាលារៀន មន្ទីរពេទ្យ វត្តអារាម វិហារ សារ៉ាវជាដើម។
រាជរដ្ឋាភិបាលក៏កំពុងពង្រឹង និងពង្រីកហេដ្ឋារចនាសម្ព័ន្ធសំខាន់ៗជាច្រើនឥតឈប់ឈរដូចជាផ្លូវល្បឿនលឿន កំពង់ផែទឹកជ្រៅ និងព្រលានយន្តហោះអន្តរជាតិខ្នាតធំ ដែលទាំងអស់នេះគឺជាសរសៃឈាមនៃកំណើនសេដ្ឋកិច្ចរបស់ប្រទេសយើង។ ក្នុងកិច្ចគាំពារសង្គម រាជរដ្ឋាភិបាលបាន នឹងបន្តការឧបត្ថម្ភជាសាច់ប្រាក់ដល់គ្រួសារក្រីក្រ និងងាយរងគ្រោះ ដើម្បីរក្សាលំនឹងជីវភាពរបស់ពួកគាត់។
ក្នុងន័យនេះ ឯកឧត្តមរដ្ឋមន្រ្តីប្រតិភូ បានណែនាំដល់ក្រុមការងារ និងអាជ្ញាធរមូលដ្ឋានត្រូវបន្តបង្កើនសកម្មភាពចុះជួយដល់ប្រជាពលរដ្ឋយើងតាមគ្រប់រូបភាព ធ្វើយ៉ាងណាចូលរួមជាមួយរាជរដ្ឋាភិបាលជួយសម្រួលការលំបាករបស់ប្រជាជននៅមូលដ្ឋាន។ មួយវិញទៀត អាជ្ញាធរមូលដ្ឋានពាក់ព័ន្ធត្រូវធ្វើការត្រួតពិនិត្យ និងវាយតម្លៃឱ្យបានល្អិតល្អនបំផុតចំពោះក្រុម ឫបុគ្គលណាដែលវាយប្រហារ និងផ្សព្វផ្សាយព័ត៌មានមិនពិត ប៉ះពាល់ដល់កិត្តិយស និងសមិទ្ធិផលរបស់សម្តេចតេជោ និងគណបក្សប្រជាជនកម្ពុជា ដើម្បីកសាងសំណុំរឿងបញ្ជូនទៅតុលាការ ចាត់វិធានការតាមផ្លូវច្បាប់។
មុននឹងបញ្ចប់ ឯកឧត្តម វេង សាខុន បានអំពាវនាវដល់ប្រជាពលរដ្ឋយើងទាំងអស់នៃឃុំគោកស្រុក និងទូទាំងស្រុកតំបែរ ខេត្តត្បូងឃ្មុំត្រូវបន្តគាំទ្រ និងបោះឆ្នោតជូនគណបក្សប្រជាជនកម្ពុជា ដែលមានសម្តេចតេជោហ៊ុន សែន ជាប្រធានគណបក្ស ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ កុំបីខានទាំងអស់គ្នា។
ជាមួយនឹងការដាក់សម្ពោធឆ្លងឧបដ្ឋានសាលានេះ ឯកឧត្តម វេង សាខុន បាននាំយកបច្ច័យជាថវិការបស់ឯកឧត្តម និងលោកជំទាវ ព្រមទាំងសប្បុរសជនសរុប ២៤,២លានរៀលប្រគេនដល់ព្រះសង្ឃ ព្រះចៅអធិការវត្តមង្គលគិរី ហៅវត្តដូនមាសសម្រាប់បន្តការកសាងវត្ត។ ពុទ្ធបរិស័ទចំណុះជើងវត្តដែលបានអញ្ជើញចូលរួមនាព្រឹកនេះចំនួនជាង ៣០០នាក់ ក៏ទទួលបានការឧបត្ថម្ភក្នុងម្នាក់ៗចំនួន ២០ ០០០ រៀលផងដែរ។
ឯកឧត្តមរដ្ឋមន្រ្តីប្រតិភូ ក៏បានប្រគេនជាថវិកាដល់វត្តសេរីមង្គល ចុងជាច ឃុំចុងជាច ស្រុកតំបែរនូវបច្ច័យចំនួន ១០លានរៀល ដើម្បីទិញក្បឿងប្រកឧបដ្ឋានសាលា ៕
