មេទ័ពជើងគោក ឧបត្ថម្ភគ្រឿងឧបភោគបរិភោគ ជូនកងកម្លាំងបោសសម្អាតមីនទាំង ១៦កង កំពុងបំពេញបេសកកម្ម បោសសម្អាតមីនខេត្តបន្ទាយមានជ័យ និងខេត្តឧត្តរមានជ័យ

ភ្នំពេញ៖ ឯកឧត្តម ឧត្ដមសេនីយ៍ឯក ខឹមជា សាខឿន មេបញ្ជាការរង នាយសេនាធិការកងទ័ពជើងគោក អមដំណើរដោយឧត្តមសេនីយ៍ឯក អ៊ុច វ៉ាន់ថា មេបញ្ជាការរងកងទ័ពជើងគោក មេបញ្ជាការ បញ្ជាការដ្ឋានវិស្វកម្ម និងប្រតិភូគណៈកម្មការគ្រប់គ្រងសកម្មភាពបោសសម្អាតមីនកងទ័ពជើងគោក ជាច្រើនរូប បានអញ្ជើញចុះសាកសួរសុខទុក្ខ និងនាំយកអំណោយរបស់ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ជូនដល់កងកម្លាំងបោសសម្អាតមីនទាំង១៦កង យោធភូមិភាគទី៥ កំពុងបំពេញបេសកកម្មបោសសម្អាតមីនទិសខេត្តបន្ទាយមានជ័យ និងខេត្តឧត្តរមានជ័យ នាថ្ងៃទី២៤, ២៥ ខែមីនា ឆ្នាំ២០២៣ ។

នៅក្នុងដំណើរចុះត្រួតពិនិត្យ និងសាកសួរសុខទុក្ខរយៈពេល ០២ថ្ងៃនាឱកាសនោះ ឧត្ដមសេនីយ៍ឯក ខឹមជា សាខឿន បានពាំនាំការសាកសួរសុខទុក្ខពីសំណាក់ ឯកឧត្ដម នាយឧត្ដមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក ជូនដល់កងកម្លាំងបោសសម្អាតមីនទាំងអស់ និងបាននាំយកគ្រឿងឧបភោគបរិភោគ ជាអំណោយមេបញ្ជាការកងទ័ពជើងគោកជូនដល់កងកម្លាំងបោសសម្អាតមីនទាំង ១៦កង ក្នុង០១កងៗ ទទួលបានរួមមាន៖ ថវិកាចំនួន ១,៣០០,០០០រៀល , មីជាតិ ១០កេស, ទឹកក្រូច Coca Cola ១០កេស, ទឹកសុទ្ធ Vital ១០កេស, ទឹកសុទ្ធ ភ្នំជប់ ៣០យួរ, ទឹកស៊ីអ៊ីវ ១កេស, ប៊ីចេង ១កេស, ម្សៅស៊ុបមាន់ ១កេស និងស្រាបៀ Anchor ៦កេស ។

សម្រាប់ក្រុមទិន្នន័យ ផែនទី ចំនួន ០៥នាក់ ទទួលបានថវិកាចំនួន ២៥០,០០០រៀល, មីជាតិ ០៦កេស, ទឹកក្រូច Coca Cola ០៦កេស, ទឹកសុទ្ធ Vital ០៦កេស, ទឹកសុទ្ធ ភ្នំជប់ ២០យួរ, ទឹកស៊ីអ៊ីវ ១កេស, ប៊ីចេង ១កេស, ម្សៅស៊ុបមាន់ ១កេស និងស្រាបៀ Anchor ០៥កេស ។

ឯកឧត្តម ឧត្ដមសេនីយ៍ឯក ខឹមជា សាខឿន បានជូនពរដល់កងកម្លាំងបោសសម្អាតមីនទាំង១៦ កង បណ្តាអង្គភាពចំណុះ កងទ័ពជើងគោក សូមមានសុខភាពល្អ សុខសុវត្ថិភាព សំរេចភារកិច្ច និងជោគជយ័ គ្រប់ភារកិច្ចដែលថ្នាក់លើប្រគល់ជូន ។

ឧត្ដមសេនីយ៍ឯក ខឹមជា សាខឿន ប្រតិភូគណៈកម្មការគ្រប់គ្រងសកម្មភាពបោសសម្អាតមីន កងទ័ពជើងគោក កងកម្លាំងបោសសម្អាតមីនទាំង ១៦កង សូមគោរពថ្លែងអំណរគុណយ៉ាងជ្រាយជ្រៅចំពោះឯកឧត្ដម នាយឧត្ដមសេនីយ៍ ហ៊ុន ម៉ាណែត បានយកចិត្តទុកដាក់គិតគូរពីសុខទុក្ខគ្រប់ពេលវេលា ៕