នាយឧត្តមសេនីយ៍ គៀត ច័ន្ទថារិទ្ធ៖ កិច្ចការអន្តោប្រវេសន៍ ជាកិច្ចការស្នូលមួយដ៏សំខាន់របស់ក្រសួងមហាផ្ទៃ ក្នុងការរួមចំណែកការពារសន្តិសុខជាតិ អធិបតេយ្យភាព បូរណភាពទឹកដី
ភ្នំពេញ៖ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានថ្លែងដោយសង្កត់ធ្ងន់ថា កិច្ចការអន្តោប្រវេសន៍នេះ គឺជាកិច្ចការស្នូលមួយដ៏សំខាន់ របស់ក្រសួងមហាផ្ទៃ ក្នុងការរួមចំណែកការពារសន្តិសុខជាតិ អធិបតេយ្យភាព បូរណភាពទឹកដី ព្រមទាំងការទាក់ទាញភ្ញៀវទេសចរអន្តរជាតិ ចូលមកទស្សនាក្នុងព្រះរាជាណាចក្រកម្ពុជា។
ក្នុងឱកាសអញ្ជើញធ្វើបាឋកថា ចែករំលែកបទពិសោធលើប្រធានបទស្ដីពី “កំណែទម្រង់លើការងារអន្តោប្រវេសន៍” នៅបណ្ឌិត្យសភានគរបាលកម្ពុជា នាថ្ងៃទី២៨ ខែមីនា ឆ្នាំ២០២៣ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានគូសបញ្ជាក់អំពីចំនុចសំខាន់ៗនៃការធ្វើកំណែទម្រង់លើការងារអន្តោប្រវេសន៍ ដោយផ្តោតលើកិច្ចការមួយចំនួនដូចជា៖
១.ប្រវត្តិការងារ និងស្នាដៃធំៗដែលសម្រេចបាន
២.ប្រវត្តិនៃការកសាងអគ្គនាយកដ្ឋានអន្តោប្រវេសន៍
៣.ចំណុចសំខាន់ៗនៃច្បាប់ស្តីពីអន្តោប្រវេសន៍
៤.តួនាទី និងភារកិច្ចរបស់អគ្គនាយកដ្ឋានអន្តោប្រវេសន៍
៥.សភាពការណ៍ និងការងារគ្រប់គ្រងជនបរទេសនៅកម្ពុជា
៦.សភាពការណ៍ និងការងារអន្តោប្រវេសន៍ក្នុងឆ្នាំ២០២២
៧.ទិសដៅជាយុទ្ធសាស្ត្ររបស់អគ្គនាយកដ្ឋានអន្តោប្រវេសន៍។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានមានប្រសាសន៍សង្កត់ធ្ងន់ថា «កិច្ចការអន្តោប្រវេសន៍នេះគឺជាកិច្ចការស្នូលមួយដ៏សំខាន់របស់ក្រសួងមហាផ្ទៃ ក្នុងការរួមចំណែកការពារសន្តិសុខជាតិ អធិបតេយ្យភាព បូរណភាពទឹកដី ព្រមទាំងការទាក់ទាញភ្ញៀវទេសចរអន្តរជាតិចូលមកទស្សនាក្នុងព្រះរាជាណាចក្រកម្ពុជា។ ជាពិសេសទៀតនោះ កិច្ចការអន្តោប្រវេសន៍គឺពាក់ព័ន្ធផ្ទាល់លើការងាររក្សាសន្តិសុខ សណ្ដាប់ធ្នាប់សាធារណ: និងរួមចំណែកក្នុងការអភិវឌ្ឍន៍គោលនយោបាយវិនិយោគ គោលនយោបាយទេសចរណ៍ គោលនយោបាយជាតិផ្សេងៗជាច្រើនទៀតរបស់រាជរដ្ឋាភិបាល និងការចូលរួមចំណែកក្នុងការអភិវឌ្ឍសេដ្ឋកិច្ចជាតិផងដែរ» ។
នៅក្នុងឱកាសនោះ ឆ្លើយតបតាមសំណើសុំរបស់បណ្ឌិត្យសភានគរបាលកម្ពុជា ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានឧបត្ថម្ភម៉ាស៊ីនកុំព្យូទ័រលើតុ ចំនួន ៥០គ្រឿង ជូនដល់បណ្ឌិត្យសភានគរបាលកម្ពុជា សម្រាប់បម្រើដល់ការងារបណ្តុះបណ្តាលកងកម្លាំងនគរបាលជាតិ ៕
