សម្ដេច ស ខេង ថ្លែងអំណរគុណ អង្គការ ILO  ដែលបានដើរតួនាទីយ៉ាងសកម្មក្នុងការជួយគាំទ្រដល់កម្ពុជា

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នារសៀលថ្ងៃពុធ ៨កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែមីនា ឆ្នាំ២០២៣នេះ បានទទួលជួបលោក Graeme Buckley ប្រធានអង្គការ ILO ប្រចាំនៅកម្ពុជា ចូលជួបពិភាក្សាការងារ នៅវិមានសន្តិភាព។

សម្ដេចក្រឡាហោម ស ខេង បានថ្លែងស្វាគមន៍ និងថ្លែងអំណរគុណ អង្គការ ILO ដែលបានដើរតួនាទីយ៉ាងសកម្មក្នុងការជួយគាំទ្រដល់កម្ពុជា តាមរយៈការអនុវត្តគម្រោងនានា ជាមួយនឹងក្រសួង ស្ថាប័នពាក់ព័ន្ធរបស់រាជរដ្ឋាភិបាលកម្ពុជា ក្នុងនោះក្នុងវិស័យស្ថិតក្រោមក្រសួងមហាផ្ទៃ ក៏មានកិច្ចការសំខាន់ៗ ដូចជាការគាំទ្រដល់ការងារទេសន្តរប្រវេសន៍ និងការងារសុវត្ថិភាពចរាចរណ៍ផ្លូវគោក។

សម្តេចក្រឡាហោម ក៏បានជម្រាបជូនលោកប្រធាន ILO ថាក្នុងនាមថ្នាក់ដឹកនាំក្រសួងមហាផ្ទៃ ត្រៀមខ្លួនជានិច្ចក្នុងការបន្តនូវកិច្ចសហប្រតិបត្តិការដ៏ល្អនេះជាមួយនឹងអង្គការ ILO លើគម្រោងដែលមានស្រាប់រវាងភាគីទាំងពីរ ក៏ដូចជាគម្រោងនានា ក្នុងឱកាសនៃកិច្ចសហប្រតិបត្តិការនាពេលអនាគត ៕