ប្រធានអង្គការ ILO ប្រចាំនៅកម្ពុជា បានថ្លែងអំណរគុណ និងវាយតម្លៃខ្ពស់ចំពោះការគាំទ្ររបស់រាជរដ្ឋាភិបាលកម្ពុជាមកលើបេសកកម្មរបស់អង្គការ

ភ្នំពេញ៖ លោក Graeme Buckley ប្រធានអង្គការ ILO ប្រចាំនៅកម្ពុជា បានថ្លែងអំណរគុណ និងវាយតម្លៃខ្ពស់ចំពោះការគាំទ្ររបស់រាជរដ្ឋាភិបាលកម្ពុជាមកលើបេសកកម្មរបស់អង្គការ ILO នៅកម្ពុជា និងបានជម្រាបជូនថាគិតមកដល់ពេលនេះ ទំនាក់ទំនងកិច្ចសហប្របត្តិការរវាងលោកជាមួយកម្ពុជា ជាកិច្ចសហប្រតិបត្តិការយូរអង្វែងមួយដែលមានរយៈពេលជាច្រើនទសវត្សរ៍កន្លងមកហើយ។

ថ្លែងក្នុងឱកាសដែរ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានទទួលជួបលោក Graeme Buckley ប្រធានអង្គការ ILO ប្រចាំនៅកម្ពុជា ចូលជួបពិភាក្សាការងារ នារសៀលថ្ងៃពុធ ៨កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែមីនា ឆ្នាំ២០២៣នេះ នៅវិមានសន្តិភាព។

លោកប្រធានអង្គការ ក៏ថ្លែងអំណរគុណចំពោះ ភាពជាដៃគូដ៏ល្អនេះ ដែលមានជាច្រើនទសវត្សរ៍កន្លងមក និងបានជម្រាបជូនសម្ដេចផងដែរថាបច្ចុប្បន្ន អង្គការ ILO មានកិច្ចសហប្រតិបត្តិការលើវិស័យអាទិភាពមួយចំនួនជាមួយនឹងក្រសួងស្ថាប័នពាក់ព័ន្ធ របស់រាជរដ្ឋាភិបាលកម្ពុជា ហើយចំពោះកិច្ចការស្នូលរបស់អង្គការ គឺធ្វើការងារពាក់ព័ន្ធទៅនឹងវិស័យការងារស្ថិតក្រោមសមត្ថកិច្ចក្រសួងការងារ និងបណ្ដុះបណ្ដាលវិជ្ជាជីវៈ ជួយគាំទ្រដល់ការលើកកម្ពស់លក្ខខណ្ឌការងារក្នុងវិស័យការងាររោងចក្រកាត់ដេរក៏ដូចជារោងចក្រ ផលិតលិតផលវាយនភណ្ឌដទៃទៀត ៕