មន្រ្តីជាន់ខ្ពស់ក្រសួងបរិស្ថាន៖ មន្រ្តីឧទ្យានុរក្សដើរតួនាទីយ៉ាងសំខាន់ក្នុងបុព្វហេតុកិច្ចគាំពារបរិស្ថាន និងការអភិរក្សធនធានធម្មជាតិ

ភ្នំពេញ៖ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន នាព្រឹកថ្ងៃទី០១ ខែមេសា ឆ្នាំ២០២៣ បានអញ្ជើញចុះសួរសុខទុក្ខ និងយកគ្រឿងឧបភោគ បរិភោគ ជូនដល់មន្ត្រីឧទ្យានុរក្ស មកពីស្នាក់ការកណ្តាលឧទ្យានុរក្សឫស្សីជ្រ៉ំថ្មបាំង និងស្នាក់ការរងឧទ្យានុរក្សឆាយអារ៉ែង ក្នុងឧទ្យានជាតិជួរភ្នំក្រវាញកណ្តាល។

ក្នុងពិធីសំណេះសំណាលនាឱកាសនោះ លោកជំទាវ ម៉ុម ថានី មានប្រសាសន៍ថា មន្រ្តីឧទ្យានុរក្សដើរតួនាទីយ៉ាងសំខាន់ក្នុងបុព្វហេតុកិច្ចគាំពារបរិស្ថាន និងការអភិរក្សធនធានធម្មជាតិ ហើយមន្ត្រីឧទ្យានុរក្យយើងប្រចាំនៅតាមតំបន់ការពារធម្មជាតិមាននីតិសម្បទាជាភ្នាក់ងារនគរបាលយុត្តិធម៌ និងមន្ត្រីនគរបាលយុត្តធម៌មានភារកិច្ចល្បាតជាប្រចាំ ក្នុងការអង្កេត តាមដាន ស្រាវជ្រាវជីវៈចម្រុះ និងប្រព័ន្ធអេកូឡូស៊ី និងចាត់វិធានការទប់ស្កាត់ បទល្មើសធនធានធម្មជាតិ ព្រមទាំងមានវិធានការទប់ស្កាត់ ភ្លើងឆេះព្រៃផងដែរ។

លោកជំទាវរដ្ឋលេខាធិការ បានបន្តទៀតថា ភារកិច្ចមួយទៀតរបស់ឧទ្យានុរក្ស គឺត្រូវចេះអប់រំផ្សព្វផ្សាយស្តីពី កិច្ចការពារបរិស្ថាន សម្របសម្រួល និងអភិវឌ្ឍសហគមន៍តំបន់ការពារធម្មជាតិ ដែលរស់នៅក្នុងនិងក្បែរតំបន់ការពារធម្មជាតិ ជាពិសេសកម្ពុជាក្រោមដំបូលសន្តិភាព មានភាពរីកចម្រើន និងរក្សាបាននូវស្ថេរភាពកំណើនសេដ្ឋកិច្ច ហើយបច្ចុប្បន្នជាប្រទេសមានចំណូលមធ្យមកម្រិតទាប និងឈានទៅសម្រេចចក្ខុវិស័យប្រែក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រាក់ចំណូលកម្រិតខ្ពស់នៅឆ្នាំ២០៥០ ដែលទាមទារឱ្យមានការគិតគូអំពី បញ្ហាបរិស្ថាន និងការគ្រប់គ្រងធនធានធម្មជាតិប្រកបដោយនិរន្តភាព ៕