លោកជំទាវ ម៉ែន សំអន អញ្ជើញបួងសួងសុំសេចក្តីសុខ ជូនប្រទេសជាតិ នៅវត្តភ្នំសំបុក និងវត្តសន្ធរវង្ស ក្នុងខេត្តក្រចេះ
ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភាព្រឹទ្ធសភា និងអធិការកិច្ច នារសៀលថ្ងៃចន្ទ ១៣កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៣ ខែមេសា ឆ្នាំ២០២៣ បានអញ្ជើញបួងសួងសុំសេចក្តីសុខ ជូនប្រទេសជាតិ នៅវត្តភ្នំសំបុក ស្ថិតនៅឃុំថ្មគ្រែ ស្រុកចិត្របុរី និងវត្តសន្ធរវង្ស (ហៅវត្តក្រចេះក្រុង) ស្ថិតក្នុងក្រុងក្រចេះ ខេត្តក្រចេះ។
ពិធីនេះក៏មានការអញ្ជេីញចូលរួមពីសំណាក់ លោកជំទាវកិត្តិបណ្ឌិត អ៉ឹង កន្ថាផាវី រដ្ឋមន្រ្តីក្រសួងកិច្ចការនារី, ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ អ្នកតំណាងរាស្រ្តមណ្ឌលក្រចេះ ឧកញ៉ា ឯកឧត្តម លោកជំទាវ លោក លោកស្រី មន្រ្តីរាជការ ពុទ្ធបរិស័ទ្ធចំណុះជេីងវត្ត យ៉ាងច្រេីនកុះករ។
គោលបំណងដែលប្រារព្ធពិធីនេះគឺដើម្បីរំលឹកប្រវត្តិសាស្ត្រ និងដឹងគុណណូបការៈរបស់អតីតព្រះ មហាក្សត្រខ្មែរជាច្រើនជំនាន់ ក៏ដូចជាការដឹងគុណអារុកអារក្ស អ្នកតាព្រៃព្រឹក្សា ដែលធ្វើអោយយើងមានជីវិត មានក្តីសង្ឃឹមនេះគឺជាការតប ស្នងសងគុណជូនវិញ ហើយយើងត្រូវដឹងគុណសន្តិភាព ដែលបានផ្តល់ឪកាសឲ្យយើងបានប្រកបកិច្ចប្រតិបត្តិ ទាំងផ្នែកអាណាចក្រ និងពុទ្ធចក្រដោយមានការរីកចំរើនគួឲ្យកត់សម្គាល់។
លោកជំទាវកិត្តិសង្គហបណ្ឌិត បានបួងសួងថ្វាយព្រះពរជ័យថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃគ្រប់ព្រះអង្គ និង ជូនពរសម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំ សមាជិក សមាជិកា ព្រឹទ្ធសភា រដ្ឋសភា ព្រមទាំងប្រជាពលរដ្ឋ នៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នា។ ជាពិសេស សូមឲ្យប្រទេសជាតិរួចផុតពី ជម្ងឺដង្កាត់ ជម្ងឺកូវីដ-១៩ គ្រោះកាចចង្រៃ ជៀសផុតពីគ្រោះរាំងស្ងួត និងសម្បូរសប្បាយជានិច្ចនិរន្ត។ ជាពិសេស សូមឲ្យពិធីអង្គរសង្ក្រាន្តបានដំណើរការទៅដោយរលូន និង ការរៀបចំព្រឹត្តិការណ៍ប្រកួតកីឡាស៉ីហ្គេម និងអាស៊ានប៉ារ៉ាហ្គេមដំណើរការទៅតាមផែនការដែលបានគ្រោងទុក ៕
