លោកឧកញ៉ា ហួត ឈឿន អញ្ជើញចូលរួមក្នុងពិធីបើកសម្ពោធសាខាថ្មីរបស់ធនាគារវីង ក្នុងខេត្តបន្ទាយមានជ័យ

ភ្នំពេញ៖ លោកឧកញ៉ា ហួត ឈឿន ប្រធានសភាពាណិជ្ជកម្ម មណ្ឌលខេត្តកំពង់ ចាម-មណ្ឌលគិរី បានអញ្ជើញចូលរួមក្នុងពិធីបើកសម្ពោធសាខាថ្មី របស់ធនាគារវីង ក្នុងខេត្តបន្ទាយមានជ័យ។

ការបើកសម្ពោធសាខាថ្មីនេះ គឺជាដំណើរនៃការវិវឌ្ឍគួរឲ្យកត់សម្គាល់ សម្រាប់ធនាគារ វីង ក្នុងការបន្តផ្តល់សេវាកម្មធនាគារឌីជីថល ប្រកបដោយភាពច្នៃប្រឌិត និងគុណភាពខ្ពស់ ទៅដល់ពលរដ្ឋកម្ពុជាគ្រប់រូប នៅទូទាំងព្រះរាជាណាចក្រកម្ពុជា។

ទីតាំងរបស់ធនាគារ វីង សាខាខេត្តបន្ទាយមានជ័យ ស្ថិតនៅផ្លូវជាតិលេខ៥ ភូមិ៣ សង្កាត់ព្រះពន្លា នាក្រុងសិរីសោភ័ណ។

ពិធីសម្ពោធនេះ ត្រូវបានរៀបចំធ្វើឡើងដោយមានវត្តមានរបស់លោក រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យធនាគារជាតិនៃកម្ពុជា និងលោក លី សុវណ្ណារិទ្ធ អភិបាលរងខេត្តបន្ទាយមានជ័យ ព្រមទាំងអ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង និងជាអគ្គនាយកក្រុមហ៊ុនរ៉ូយ៉ាល់គ្រុប ក៏ដូចជាឥស្សរជន និងភ្ញៀវកិត្តិយសជាច្រើនរូបទៀត៕