ឧត្តមសេនីយ៍ឯក ឆាយ គឹមខឿន ជំរុញឱ្យតាមបណ្តានាយកដ្ឋាន-អង្គភាព ដែលមានសមត្ថកិច្ចពាក់ព័ន្ធ ត្រូវរួមគ្នាធ្វើយ៉ាឱ្យព្រឹត្តិការណ៍អង្គរសង្ក្រាន្តឆ្នាំនេះ ទទួលបានជោគជ័យ

ភ្នំពេញ៖ នៅព្រឹកថ្ងៃទី៤ ខែមេសា ឆ្នាំ២០២៣នេះ អគ្គស្នងការដ្ឋាននគរបាលជាតិ បានបើកកិច្ចប្រជុំឆ្លងផែនការការពារអង្គរសង្រ្កាន្ត ខេត្តសៀមរាប ក្រោមធិបតីភាព ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរង នៃអគ្គស្នងការដ្ឋាននគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នៃអគ្គស្នងការដ្ឋាននគរបាលជាតិ។

កិច្ចប្រជុំនេះ មានការចូលរួមពី ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរង នៃអគ្គស្នងការដ្ឋាននគរបាលជាតិ និងជាប្រធាននាយកដ្ឋានកណ្តាលសន្តិសុខ, ឯកឧត្តម ឧត្តមសេនីយ៍ឯក យឹម លាង អគ្គស្នងការរង នៃអគ្គស្នងការដ្ឋាននគរបាលជាតិ, ឯកឧត្តម សុខ សប្បាយណា សមាជិកអចិន្រ្តៃយ៍សភាពសហព័ន្ធយុវជនកម្ពុជា និងជាប្រធានក្រុមប្រតិបត្តិព្រឹត្តិការណ៍អង្គរសង្ក្រាន្ត, ឯកឧត្តម ឧត្តមសេនីយ៍ឯក អ៊ុង សារិទ្ធ មេបញ្ជាការរង និងជានាយសេនាធិការ បញ្ជាការដ្ឋានអង្គរក្ស, ឯកឧត្តម ឧត្តមសេនីយ៍ឯក ម៉ន សាម៉ុន មេបញ្ជាការរងកងរាជអាវុធហត្ថលើផ្ទៃប្រទេស, ប្រធាននាយកដ្ឋាន-អង្គភាពពាក់ព័ន្ធ ចំណុះអគ្គស្នងការដ្ឋាននគរបាលជាតិ, ស្នងការនគរបាលខេត្តសៀមរាប, ស្នងការនគរបាលខេត្តព្រៃវែង និងអ្នកពាក់ព័ន្ធមួយចំនួនទៀត។

បន្ទាប់ពី ឯកឧត្តម សុខ សប្បាយណា ធ្វើបទបង្ហាញពាក់ព័ន្ធការរៀបចំព្រឹត្តិការណ៍អង្គរសង្ក្រាន្ត រួចមក ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានធ្វើបទបង្ហាញពន្យល់ពីផែនការការពារ និងស្នើសុំអង្គប្រជុំផ្តល់នូវធាតុចូលនៅក្នុងរបាយការណ៍។ បន្ទាប់ពីបានពិភាក្សា និងទទួលបានធាតុចូល អង្គប្រជុំបានឯកភាពគ្នាដាក់ចេញនូវផែនការការពារព្រឹត្តិការណ៍អង្គរសង្រ្កាន្ត និងដាក់សុំឆ្លង ឯកឧត្តម នាយឧត្តសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដើម្បីពិនិត្យសម្រេច និងចុះហត្ថលេខា ផ្សព្វផ្សាយនាពេលខាងមុខ។

ឯកឧត្តម ឧត្តមសេនីយ៍ឯក ឆាយ គឹមខឿន បានបញ្ជាក់ថា ក្នុងផែនការនោះ បានគិតដល់អំពីការការពារសន្តិសុខ សណ្តាប់ធ្នាប់ សុវត្ថិភាព សម្រាប់គោលដៅអទិភាព និងមុខសញ្ញាការពារ ជាពិសេសកិច្ចការពារនៅតំបន់សំខាន់ៗដែលប្រារព្ធពិធីដូចជា ៖ ប្រាសាទបាយ័ន, ប្រាសាទអង្គរតូច, សួនច្បារដងស្ទឹងព្រះរាជតំណាក់, អង្គរឃ្យុងយូ, ផាប់ស្រ្ទីត និងកន្លែងស្នាក់នៅរបស់គណៈប្រតិភូ ដោយផែនការបានគិតយ៉ាងម៉ត់ចត់នៅទិសដៅនៃការពង្វាងចរាចរណ៍ បញ្ចៀសការកកស្ទះចរាចរណ៍ និងការត្រៀមដោះស្រាយហេតុការណ៍ជាយថាហេតុ ព្រមទាំងបានបែងចែកប្រគល់ភារកិច្ចច្បាស់លាស់ទៅតាមអង្គភាពដែលមានសមត្ថកិច្ចពាក់ព័ន្ធ។

ជាចុងក្រោយ ឯកឧត្តម ឧត្តមសេនីយ៍ឯក ឆាយ គឹមខឿន តាងនាម ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជំរុញឱ្យតាមបណ្តានាយកដ្ឋាន-អង្គភាព ដែលមានសមត្ថកិច្ចពាក់ព័ន្ធ ត្រូវរួមគ្នាធ្វើយ៉ាឱ្យព្រឹត្តិការណ៍អង្គរសង្ក្រាន្ត ឆ្នាំ២០២៣នេះ ទទួលបានជោគជ័យ៕