ឯកឧត្ដម ញ៉ែម សំអឿន៖ រោងចក្រដំឡូងមីនៅខេត្តរតនគិរី មានសមត្ថភាពផលិតម្សៅមី ៣០០តោន ក្នុង១ថ្ងៃ
ភ្នំពេញ៖ អភិបាលខេត្តរតនគិរីឯកឧត្ដម ញ៉ែម សំអឿន បានឲ្យដឹងថា បច្ចុប្បន្ននេះនៅក្នុងខេត្ដរតនគិរី មានរោងចក្រកែច្នៃម្សៅមីមួយកន្លែង ដែលមានសមត្ថភាពផលិតម្សៅមីប្រមាណ ៣០០តោនរយៈពេល ២៤ម៉ោង។
នៅក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ស្ដីពី «ភាពជោគជ័យរយៈពេល៥ឆ្នាំ របស់រដ្ឋបាលខេត្តរតនគិរី» នៅព្រឹកថ្ងៃទី០៤ ខែមេសា ឆ្នាំ២០២៣នេះ ឯកឧត្ដម ញ៉ែម សំអឿន បានលើកឡើងទៀតថា ក្នុងឆ្នាំ២០២២កន្លងទៅនេះ ក្រុមហ៊ុនបាននាំចេញម្សៅមី ចំនួន២,៦២២តោន ទៅក្រៅប្រទេស តាមច្រកទ្វារអន្ដរជាតិអូរយ៉ាដាវ។
ឯកឧត្ដមអភិបាលខេត្តបានថ្លែងយ៉ាងដូច្នេះថា “នៅក្នុងខេត្តមានរោងចក្រកែច្នៃម្សៅមីមួយកន្លែង មានសមត្ថភាពផលិត ១,២០០តោន/២៤ម៉ោង (គិតជាម្សៅមី៣០០តោន)។ ឆ្នាំ២០២២ ក្រុមហ៊ុនបាននាំចេញម្សៅមីចំនួន ២,៦២២តោន តាមច្រកទ្វារអន្តរជាតិអូរយ៉ាដាវ”។
ពាក់ព័ន្ធរោងចក្រម្សៅមីនេះ លោក អ៊ាវ ហៃ ប្រធានមន្ទីរឧស្សាហកម្ម បច្ចេកវិទ្យា វិទ្យសាស្ដ្រ និងនវានុវត្តន៍ ខេត្តរតនគិរី បានអះអាងថា អ្នកវិនិយោគរោងចក្រកែច្នៃដំឡូងមីនេះ ជាជនជាតិខ្មែរ និងមានប្រើប្រាស់កម្លាំងពលករប្រមាណជាង១០០នាក់ ហើយអាចប្រែប្រួលតាមស្ថានភាពជាក់ស្ដែង។
លោកក៏បានគូសបញ្ជាក់បន្ថែមថា រោងចក្រកែច្នៃដំឡូងមីនេះ មិនដំណើរជាអចិន្ដ្រៃយ៍នោះទេ ពោលដោយសារកង្វះខាតដំឡូងមី។
លោកបន្ដថា នៅពេលដំឡូងមីមិនគ្រប់ចំនួន រោងចក្រមិនទាន់ដំណើរការឡើយ ដោយរង់ចាំទាល់តែដំឡូងមីនោះប្រមូលមកចំនួន៕
