ស្នងការខេត្តមណ្ឌលគិរី បើកកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំឆ្នាំ២០២២ និងផ្សព្វផ្សាយទិសដៅការងារ របស់ក្រសួងមហាផ្ទៃ និងអគ្គស្នងការដ្ឋាននគរបាលជាតិឆ្នាំ២០២៣

ភ្នំពេញ៖ ស្នងការដ្ឋាននគរបាលខេត្តមណ្ឌលគិរី នាព្រឹកថ្ងៃពុធ ១៥កើត ខែចេត្រ ឆ្នាំខាល ចត្វាស័ក.ព.ស ២៥៦៦  ត្រូវនឹងថ្ងៃទី០៥ ខែមេសា ឆ្នាំ២០២៣ បានបើកកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំឆ្នាំ២០២២ របស់ស្នងការដ្ឋាននគរបាលខេត្ត និងផ្សព្វផ្សាយទិសដៅការងាររបស់ក្រសួងមហាផ្ទៃ និងអគ្គស្នងការដ្ឋាននគរបាលជាតិឆ្នាំ២០២៣។

កិច្ចប្រជុំនេះបានប្រព្រឹត្តធ្វើឡើងក្រោមអធិបតីភាព លោកឧត្តមសេនីយ៍ទោ ឡោ សុខា ស្នងការនគរបាលខេត្ត និងមានការអញ្ជើញចូលរួមពី លោក លោកស្រីស្នងការរង លោកស្នងការរងទទួលការងារព្រំដែនលោកមេបញ្ជាការ វរសេនាតូចនគរបាលព្រំដែនគោកទាំងពីរ លោក លោកស្រីនាយ នាយរងការិយាល័យជំនាញ លោកអធិការនគរបាល ក្រុង ស្រុក ទាំង៥ លោកនាយប៉ុស្តិ៍នគរបាលរដ្ឋបាលទាំង២១ ឃុំ សង្កាត់ ដែលបានចូលរួមសរុបចំនួន ១៤៦នាក់។

ជាកិច្ចចាប់ផ្តើមបើកកិច្ចប្រជុំ លោកឧត្តមសេនីយ៍ទោ ឡោ សុខា ស្នងការខេត្ត បានមានប្រសាសន៍បើកកិច្ចប្រជុំនិងបានអនុញ្ញាតិអោយ លោកវរសេនីយ៍ឯក មុិញ ឈុន នាយការិយាល័យសរុបនិងវិភាគបានឡើងអានរបាយការណ៍សង្ខេបស្តីពី កិច្ចប្រជុំបូកសរុបសភាពការណ៍និងលទ្ធផលកិច្ចប្រតិបត្តិការប្រចាំឆ្នាំ២០២២ របស់ស្នងការដ្ឋាននគរបាលខេត្តមណ្ឌលគិរី និងផ្សព្វផ្សាយទិសដៅការងាររបស់ក្រសួងមហាផ្ទៃ និងអគ្គស្នងការដ្ឋាននគរបាលជាតិឆ្នាំ២០២៣។

ទន្ទឹមគ្នានោះផងដែរ លោកឧត្តមសេនីយ៍ទោ ស្នងការ បានអនុញ្ញាតឲ្យ លោក នាយការិយាល័យជំនាញ ឡើងធ្វើបទបង្ហាញពីសកម្មភាពការងារដែលសម្រេចបានក្នុងឆ្នាំ២០២២កន្លងមកនេះ និងលើកឡើងពីចំណុចប្រឈមមួយចំនួន យកមកដោះស្រាយនិងអនុវត្តនូវការងារប្រចាំថ្ងៃ អោយបានរលូន។

មុននិងបញ្ចប់ លោកឧត្តមសេនីយ៍ទោ ឡោ សុខា ស្នងការនគរបាលខេត្ត បានមានប្រសាសន៍បូកសរុបលទ្ធផលការងារ នៃកិច្ចប្រជុំ លោកឧត្តមសេនីយ៍ទោស្នងការ បានជំរុញអោយមន្រ្តីនគរបាលជំនាញទាំងអស់ខិតខំពង្រឹងវិន័យ និងបទបញ្ជាលេខ០០៦ អោយបានល្អប្រសើរបន្ថែមទៀត និងពង្រឹងកាអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ និងខិតខំបង្រ្កាបនូវរាល់បទល្មើសល្បែងស៊ីសងគ្រប់ប្រភេទ ក្នុងទូទាំងខេត្តអោយមានប្រសិទ្ធិភាពខ្ពស់បន្ថែមទៀត និងជំរុញកាធ្វើអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋដែលគ្រប់អាយុអោយសម្រេចបានតាមផែនការរបស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ និងពង្រឹងផ្សព្វផ្សាយគោលនយោបាយ ភូមិ ឃុំ សង្កាត់ មានសុវត្ថិភាពដល់តាមបណ្តាមូលដ្ឋានដើម្បីអោយគោលនយោបាយនេះ សម្រេចបានដោយជោគជ័យ ៕