ព្រះវិហារ ឧបដ្ឋានសាលា និងសមិទ្ធផលនានា ក្នុងវត្តព្រៃអង្គរក្រៅ ស្ថិតក្នុងឃុំដូនតី ស្រុកពញាក្រែក ខេត្តត្បូងឃ្មុំ ត្រូវបានសម្ពោធឆ្លងជាផ្លូវការ
ភ្នំពេញ៖ ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ តំណាងដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នាព្រឹកថ្ងៃទី០៥ ខែមេសា ឆ្នាំ២០២៣ បានអញ្ជើញជាអធិបតីភាពក្នុងពិធីសម្ពោធឆ្លងព្រះវិហារ ឧបដ្ឋានសាលា និងសមិទ្ធផលនានា ក្នុងវត្តព្រៃអង្គរក្រៅ ស្ថិតក្នុងឃុំដូនតី ស្រុកពញាក្រែក ខេត្តត្បូងឃ្មុំ។ ដោយមានការអញ្ជើញចូលរួមពីសំណាក់ថ្នាក់ដឹកនាំ អាជ្ញាធរមូលដ្ឋាន មន្រ្តីរាជការ ប្រជាពលរដ្ឋ និងសិស្សានុសិស្ស សរុបប្រមាណជាង ១,២០០នាក់ផងដែរ។
ថ្លែងក្នុងឱកាសនោះ ឯកឧត្តមរដ្ឋមន្រ្តី ក៏បានពាំនាំនូវការសាកសួរសុខទុក្ខពីសំណាក់សម្តេចតេជោ នាយករដ្ឋមន្រ្តី និងសម្តេចចក្រី ប្រធានរដ្ឋសភាជាតិ ដែលជានិច្ចជាកាលតែងតែគិតគូរយកចិត្តទុកដាក់ចំពោះប្រជាពលរដ្ឋនៅគ្រប់មជ្ឈដ្ឋាន ជាពិសេសប្រជាពលរដ្ឋក្រីក្រ រងគ្រោះ និងងាយរងគ្រោះជាដើម។
ឆ្លៀតក្នុងឱកាសនោះ ឯកឧត្តមរដ្ឋមន្រ្តី វង សូត ក៏បាននាំយកនូវបច្ច័យកសាងចំនួន ២០លានរៀល សម្រាប់កសាងសមិទ្ធផលនានាបន្ថែមទៀត និងបានឧបត្ថម្ភថវិកាមួយចំនួនរួមមាន៖ ១.សាលាស្រុកពញាក្រែក ទទួលបានថវិកា ចំនួន ១០លានរៀល, ២.វិទ្យាល័យក្នុងស្រុកពញាក្រែកចំនួន៤ ក្នុង១វិទ្យាល័យ ទទួលបានថវិកា ៣លានរៀល, ៣.អនុវិទ្យាល័យក្នុងស្រុកពញាក្រែកចំនួន៨ ក្នុង១វិទ្យាល័យ ទទួលបានថវិកា ២លានរៀល និងបានឧបត្ថម្ភថវិកាមួយចំនួនជូនដល់ប្រជាពលរដ្ឋ តាជីយាយជី កងកម្លាំង និងសិស្សនុសិស្សដែលបានចូលរួមផងដែរ ៕ 
