កម្ពុជាធ្វើពិធីបំពាក់គ្រឿងឥស្សរយយសមេដាយមុនីសារាភ័ណ្ឌ ជូនសាស្ត្រាចារ្យជប៉ុន មានស្នាដៃលើការងារស្រាវជ្រាវជំងឺថ្លើមនៅកម្ពុជា
ភ្នំពេញ៖ រាជរដ្ឋាភិបាលកម្ពុជា បានបំពាក់គ្រឿងឥស្សរយយសមេដាយមុនីសារាភ័ណ្ឌជូនលោកស្រីសាស្ត្រាចារ្យ Junko TANAKA សាកលវិទ្យាធិការរងនៃសាកលវិទ្យាល័យហ៊ីរ៉ូស៊ីម៉ាប្រទេសជប៉ុន ដើម្បីជាការតបស្នងចំពោះលោកស្រីដែលបានផ្តួចផ្តើមការងារស្រាវជ្រាវអំពីជំងឺថ្លើមនៅកម្ពុជា ចាប់តាំងពីឆ្នាំ២០០៩ រហូតមកដល់បច្ចុប្បន្ន។
ពិធីបំពាក់គ្រឿងឥស្សរយយសមេដាយមុនីសារាភ័ណ្ឌជូនលោកស្រីសាស្ត្រាចារ្យ Junko TANAKA បានធ្វើឡើងនៅថ្ងៃទី៥មេសា ឆ្នាំ២០២៣ នៅសាកលវិទ្យាល័យវិទ្យាសាស្ត្រសុខាភិបាល ក្រោមអធិបតីភាព ឯកឧត្ដមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល។
ក្នុងឱកាសនោះ ឯកឧត្ដមសាស្ដ្រាចារ្យ ម៉ម ប៊ុនហេង បានថ្លែងកោតសរសើរ ចំពោះលោកស្រីសាស្ដ្រាចារ្យ Junko TANAKA ដែលបានផ្ដួចផ្ដើមការងារស្រាវជ្រាវអំពីជំងឺថ្លើមនៅកម្ពុជាជាច្រើនកន្លងមកនេះ និងបានផ្សព្វផ្សាយលទ្ធផលស្រាវជ្រាវអំពីជំងឺថ្លើមនៅកម្ពុជា បានជាច្រើនអត្ថបទក្នុងទិន្នានុវត្ដវិទ្យាសាស្ដ្រអន្ដរជាតិធំៗ ដែលលទ្ធផលទាំងនេះបានក្លាយជាធាតុចូលយ៉ាងសំខាន់សម្រាប់ក្រសួងសុខាភិបាល និងរាជរដ្ឋាភិបាលកម្ពុជា ក្នុងការធ្វើអន្ដរាគមន៍សុខភាពសាធារណៈ ឱ្យកាន់តែមានប្រសិទ្ធភាព និងចូលរួមលើកកម្ពស់សុខុមាលភាពប្រជាជនកម្ពុជា។
ឯកឧត្ដមរដ្ឋមន្ដ្រីសុខាភិបាល បញ្ជាក់ថា “ខ្ញុំសង្ឃឹមថា លោកស្រីសាស្រ្ដាចារ្យ នឹងបន្ដសហការជាមួយសាកលវិទ្យាល័យវិទ្យាសាស្ដ្រសុខាភិបាលបន្ដទៀត ដើម្បីជំរុញការបណ្ដុះបណ្ដាល និងការស្រាវជ្រាវនៅសាកលវិទ្យាល័យវិទ្យាសាស្ដ្រសុខាភិបាល ព្រោះស្នាដៃស្រាវជ្រាវ និងបណ្តុះបណ្តាលរបស់លោកស្រីនេះ ជាគំរូស្រាប់ដែលបង្ហាញឱ្យឃើញនូវការផ្សារភ្ជាប់គ្នាដោយមិនអាចខ្វះបាន រវាងការបណ្តុះបណ្តាល និងការស្រាវជ្រាវក្នុងវិស័យសុខាភិបាល”។
លោកស្រីសាស្ត្រាចារ្យ ជុនកូ តាណាកា បានផ្តួចផ្តើមការងារស្រាវជ្រាវអំពីជំងឺថ្លើមចាប់តាំងពីឆ្នាំ២០០៩ រហូតមកដល់បច្ចុប្បន្ន ហើយលោកស្រីបានផ្សព្វផ្សាយលទ្ធផលស្រាវជ្រាវអំពីជំងឺថ្លើមនៅកម្ពុជា មកដល់ពេលនេះបានចំនួន១២អត្ថបទវិទ្យាសាស្ត្រក្នុងនិន្នានុវត្តន៍វិទ្យាសាស្ត្រអន្តរជាតិ ដែលលទ្ធផលស្រាវជ្រាវទាំងនេះបានចូលរួមចំណែកយ៉ាងសំខាន់ ជំរុញគំនិតស្រលាញ់ការងារស្រាវជ្រាវរបស់មន្ត្រីបុគ្គលិក និងនិស្សិតសាកលវិទ្យាល័យវិទ្យាសាស្ត្រសុខាភិបាល។ នេះបើតាមការបញ្ជាក់របស់លោកសាស្ត្រាចារ្យ សាផុន វឌ្ឍនៈ សាកលវិទ្យាធិការសាកលវិទ្យាល័យវិទ្យាសាស្ត្រសុខាភិបាល។
ឯកឧត្ដមសាស្ត្រាចារ្យបានបន្តថា ជាច្រើនឆ្នាំកន្លងមកនេះ លោកស្រីបានដើរតួនាទីយ៉ាងសំខាន់ក្នុងការផ្តួចផ្តើមនៃកិច្ចសហប្រតិបត្តិការ រវាងសាកលវិទ្យាល័យវិទ្យាសាស្ត្រសុខាភិបាល និងសាកលវិទ្យាល័យហ៊ីរ៉ូស៊ីម៉ាប្រទេសជប៉ុន ដើម្បីជំរុញការកសាងធនធានមនុស្សក្នុងវិស័យសុខភាពសាធារណៈ។ ក្នុងនោះលោកស្រីបានជួយរកអាហារូបករណ៍ និងបណ្តុះបណ្តាលនិស្សិតកម្ពុជាថ្នាក់បណ្ឌិតវិទ្យាសាស្ត្រ ចំនួន៣នាក់ និងថ្នាក់បរិញ្ញាបត្រជាន់ខ្ពស់ចំនួន១នាក់ សិក្សានៅសាកលវិទ្យាល័យហ៊ីរ៉ូស៊ីម៉ា និងគ្រោងបន្តជួយផ្តល់អាហារូបករណ៍ជូននិស្សិតកម្ពុជា ២-៣នាក់ទៀតក្នុង១ឆ្នាំ សម្រាប់រយៈពេល ៣ឆ្នាំខាងមុខ។
ជាមួយគ្នានេះ ឯកឧត្ដមសាស្ត្រាចារ្យក៏បានសម្ដែងនូវការអបអរសាទ ចំពោះលោកស្រី ជុនកូ តាណាកា ដែលទទួលបានការទទួលស្គាល់ស្នាដៃពីរាជរដ្ឋាភិបាលកម្ពុជា បានសម្រេចផ្តល់ជូនលោកស្រីនូវគ្រឿងឥស្សរយយសមេដាយមុនីសារាភ័ណ្ឌ៕
