កម្ពុជាមានគម្រោងបង្កើតសាលាបណ្តុះបណ្តាលជំនាញវិជ្ជាជីវៈ នៅតាមព្រំដែនជាមួយវៀតណាម សម្រាប់បម្រើឱ្យសេចក្តីត្រូវការរបស់ប្រជាជននិងប្រទេសទាំងពីរ
ភ្នំពេញ៖ កម្ពុជាមានគម្រោងបង្កើតសាលាបណ្តុះបណ្តាលជំនាញវិជ្ជាជីវៈ នៅតាមព្រំដែនជាមួយប្រទេសវៀតណាម សម្រាប់បម្រើឱ្យសេចក្តីត្រូវការរបស់ប្រជាជននិងប្រទេសទាំងពីរ ហើយអាចផ្លាស់ប្តូរគ្រូបច្ចេកទេស និងនិស្សិតទៅវិញទៅមកបាន។
ការឱ្យដឹងបែបនេះខណៈដែលឯកឧត្ដម អ៉ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លើកឡើងចំណុចនេះ ក្នុងពេលជួបសម្ដែងការគួរសមចំពោះលោក TRAN HONG HA ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម នាថ្ងៃទី៥ ខែមេសា ឆ្នាំ២០២៣ ក្នុងពេលលោកបំពេញទស្សនកិច្ចនៅប្រទេសវៀតណាម។
នាឱកាសនោះ ឯកឧត្ដម អ៉ិត សំហេង បានបញ្ជាក់ថា «កម្ពុជាមានគម្រោងបង្កើតសាលាបណ្តុះបណ្តាលជំនាញវិជ្ជាជីវៈ នៅតាមព្រំដែនជាមួយប្រទេសវៀតណាម សម្រាប់បម្រើឱ្យសេចក្តីត្រូវការរបស់ប្រជាជននិងប្រទេសទាំងពីរ ហើយអាចផ្លាស់ប្តូរគ្រូបច្ចេកទេស និងនិស្សិតទៅវិញទៅមកបាន»។
ជាការឆ្លើយតបលោកឧបនាយករដ្ឋមន្ត្រី TRAN HONG HA បានបញ្ជាក់វិញថា វៀតណាមក៏នឹងបន្តគាំទ្រនិងសហការជាមួយកម្ពុជាលើវិស័យការងារ និងបណ្តុះបណ្តាលវិជ្ជាជីវៈ និងគាំទ្រឱ្យមានរៀបចំបង្កើតសាលាបណ្តុះបណ្តាលជំនាញវិជ្ជាជីវៈនៅតាមព្រំដែនប្រទេសទាំងពីរ។
ជាងនេះទៅទៀត «វៀតណាមក៏នឹងបន្តផ្តល់អាហារូបករណ៍ដល់និស្សិតកម្ពុជា ដើម្បីបានសិក្សារៀនសូត្រក្នុងប្រទេសវៀតណាម»។ នេះបើតាមលោកឧបនាយករដ្ឋមន្ត្រី TRAN HONG HA។
ឯកឧត្ដម អ៉ិត សំហេង ក៏បានជម្រាបពីវឌ្ឍភាពថ្មីៗដែលក្រសួងការងារ និងបណ្តុះបណ្តាលវិជ្ជាជីវៈកម្ពុជា និងក្រសួងការងារ ជនពិការ និងសង្គមកិច្ចវៀតណាម បានចុះហត្ថលេខាលើអនុស្សរណៈនៃការយោគយល់គ្នាក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ នៅប្រទេសកម្ពុជា កាលពីថ្ងៃទី៨ ខែវិច្ឆិកា ឆ្នាំ២០២២ កន្លងមក។
នៅកិច្ចប្រជុំថ្នាក់រដ្ឋមន្រ្តីការងារកម្ពុជា-វៀតណាម និងកិច្ចប្រជុំពាក់ព័ន្ធថ្មីៗនេះ លោករដ្ឋមន្ត្រី អ៉ិត សំហេង និងលោករដ្ឋមន្ត្រី DAO NGUC DUNG ដែលជាសហប្រធានដឹកនាំកិច្ចប្រជុំរួមគ្នា ក៏បានចុះហត្ថលេខាលើផែនការសកម្មភាពរយៈពេល៥ឆ្នាំ (ឆ្នាំ២០២៣-២០២៧) សម្រាប់អនុវត្តអនុស្សរណៈនៃការយោគយល់គ្នា និងសេចក្តីថ្លែងការណ៍រួមគ្នាក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ។
លោកឧបនាយករដ្ឋមន្ត្រី TRAN HONG HA បានបង្ហាញការគាំទ្រទាំងស្រុងនូវក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈរបស់ប្រទេសទាំងពីរ ដែលក្រសួងទាំងពីរបានចុះហត្ថលេខាជាមួយគ្នាថ្មីៗនេះ។
លោកឧបនាយករដ្ឋមន្ត្រីក៏បានស្នើសុំឱ្យក្រសួងការងារកម្ពុជា និងវៀតណាមរៀបចំបន្ថែមនូវតម្រូវការចាំបាច់ទាំងឡាយណាដែលពាក់ព័ន្ធនឹងវិស័យការងារ និងបណ្តុះបណ្តាលវិជ្ជាជីវៈ សម្រាប់ដាក់ចូលក្នុងផែនការកិច្ចសហប្រតិបត្តិការរវាងប្រទេសទាំងពីរផងដែរ៕
