នាយឧត្តមសេនីយ៍ នេត សាវឿន ណែនាំដល់ស្នងការនគរបាលរាជធានី-ខេត្តទាំងអស់ ឱ្យយកចិត្តទុកដាក់ពង្រឹងការងារការពារសន្ដិសុខ សណ្ដាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ ពិសេសក្នុងព្រឹត្តិការណ៍សំខាន់ៗ នៅពេលខាងមុខនេះ

ភ្នំពេញ៖ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនៃអគ្គស្នងការដ្ឋាននគរបាលជាតិ បានណែនាំដល់ស្នងការនគរបាលរាជធានី-ខេត្តទាំងអស់ ឱ្យយកចិត្តទុកដាក់ពង្រឹងការងារការពារសន្ដិសុខ សណ្ដាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ ពិសេសក្នុងព្រឹត្តិការណ៍សំខាន់ៗ ដែលនឹងប្រព្រឹត្តទៅនាពេលខាងមុខឆាប់ៗនេះ។

ការណែនាំរបស់ ឯកឧត្តម នាយឧត្តមសេនីយ៍ សន្តិបណ្ឌិត សន្ដិបណ្ឌិត នេត សាវឿន អគ្គស្នងការនគរបាលជាតិ ក្នុងកិច្ចប្រជុំជាមួយស្នងការនគរបាលរាជធានី-ខេត្ត នៅនាយកដ្ឋានអង្គរក្ស នារសៀលថ្ងៃព្រហស្បតិ៍ ទី៦ ខែមេសា ឆ្នាំ២០២៣។ ដោយមានការចូលរួមពីអគ្គស្នងការរង, ប្រធាននាយកដ្ឋានកណ្ដាល, អនុប្រធានសេនាធិការ និងប្រធាននាយកដ្ឋានពាក់ព័ន្ធ។

ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន បានគូសបញ្ជាក់ថា ព្រឹត្តិការណ៍សំខាន់ៗ ដែលកងកម្លាំងនគរបាលទាំងអស់ ត្រូវយកចិត្តទុកដាក់នៅចំពោះមុខនេះរួមមាន៖ ពិធីបុណ្យចូលឆ្នាំប្រពៃណីជាតិខ្មែរ ពិសេសព្រឹត្តិការណ៍អង្គរសង្ក្រាន្ដ និងសង្ក្រាន្ដដែលនឹងរៀបចំនៅតាមបណ្ដារាជធានី-ខេត្ត, ការធ្វើជាម្ចាស់ផ្ទះស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ និងដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៧ ឆ្នាំ២០២៣។

ឯកឧត្តម នាយឧត្តមសេនីយ៍ នេត សាវឿន បានធ្វើការណែនាំថា សម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរ នៅឆ្នាំនេះ ត្រូវបានរាជរដ្ឋាភិបាលបើកទូលាយឱ្យរៀបចំនៅទូទាំងប្រទេស ក្រោយគ្រប់គ្រងបាននូវការឆ្លងរីករាលដាលជំងឺកូវីដ១៩ ដូច្នេះភារកិច្ចរបស់កងកម្លាំងនគរបាលជាតិ ត្រូវយកចិត្តទុកដាក់ការពារសន្ដិសុខ សណ្ដាប់ធ្នាប់ និងសុវត្ថិភាពជូនប្រជាពលរដ្ឋឲ្យបានជោគជ័យ ពិសេសនៅតាមទីវត្តអារាម និងទីតាំងសប្បាយភាពក្នុងមូលដ្ឋាន។

ក្នុងអំឡុងពេលបុណ្យចូលឆ្នាំនេះ កងកម្លាំងនគរបាលទាំងអស់មិនត្រូវបានអនុញ្ញាតឱ្យឈប់សម្រាក ឬមានការផ្លាស់ប្ដូរចេញពីនោះទេ ពោលត្រូវធានាកម្លាំងឱ្យបានគ្រប់គ្រាន់ ផ្លាស់ប្ដូរវេនប្រចាំការ ប្រចាំបញ្ជា និងត្រៀមអន្ដរាគមន៍គ្រប់ពេល ២៤ម៉ោង លើ២៤ម៉ោង ព្រោះនេះជាកាតព្វកិច្ចរបស់កងកម្លាំងនគរបាលជាតិ ដែលត្រូវបម្រើសង្គមជាតិ។ នេះជាអ្វីដែល ឯកឧត្តម នាយឧត្តមសេនីយ៍ សន្ដិបណ្ឌិត អគ្គស្នងការនគរបាលជាតិ បានគូសបញ្ជាក់។

ដោយឡែក សម្រាប់ព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ដែលកម្ពុជាត្រូវធ្វើជាម្ចាស់ផ្ទះនេះ ឯកឧត្តម នាយឧត្តមសេនីយ៍ សន្តិបណ្ឌិត បានលើកឡើងថា រាជធានី-ខេត្ត ដែលមានការពាក់ព័ន្ធការដង្ហែភ្លើងគប់ ជាពិសេសពិធីបើក និងបិទនៅពហុកីឡដ្ឋានមរតកតេជោ និងនៅកន្លែងប្រកួតក្នុងរាជធានីភ្នំពេញ ព្រមទាំងខេត្តចំនួន៤ទៀត រួមមាន ខេត្តសៀមរាប, ព្រះសីហនុ, កែប និងកំពត ត្រូវតែធានាសន្ដិសុខ សណ្ដាប់ធ្នាប់ និងសុវត្ថិភាពឱ្យបាន១០០ភាគរយ ដោយត្រូវរៀបចំផែនការច្បាស់លាស់ជាមួយគណៈបញ្ជាការឯកភាព។

ព្រឹត្តិការណ៍ដែលសំខាន់ជាងនេះទៅទៀតនោះ គឺដំណើរការនៃការបោះឆ្នោតជ្រើសតាំងតំណាងរាស្ដ្រ នីតិកាលទី៧ ដែលនឹងប្រព្រឹត្ដទៅនៅថ្ងៃទី២៣ ខែកក្កដា ឆ្នាំ២០២៣ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន បានសង្កត់ធ្ងន់ថា កងកម្លាំងនគរបាលមានកាតព្វកិច្ចការពារការដំណើរការទូទៅនៃការបោះឆ្នោត ទាំងមុនដំណើរការបោះឆ្នោត, ពេលបោះឆ្នោត និងក្រោយការបោះឆ្នោត ហើយក៏កងកម្លាំងនគរបាលមានកាតព្វកិច្ចជាប្រជាពលរដ្ឋត្រូវចូលរួមបោះឆ្នោតផងដែរ។

ពាក់ព័ន្ធកិច្ចការពារ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន បានបញ្ជាឱ្យប្រើប្រាស់កម្លាំងឱ្យអស់លទ្ធភាព ក្នុងនោះមានទាំងការប្រចាំការក្នុងគណៈបញ្ជាការអចិន្ដ្រៃយ៍របស់ខេត្ត, ប្រចាំបញ្ជាអន្ដរាគមន៍នៅរាជធានី ខេត្ត ក្រុង ស្រុក ខណ្ឌ ឃុំ សង្កាត់ និងការពារនៅតាមគោលដៅដែលបានកំណត់ ដែលក្នុងនោះក៏ត្រូវមានការចូលរួមពីប្រជាការពារផងដែរ។ លើសពីនេះ ក៏ត្រូវរៀបចំការបណ្ដុះបណ្ដាលដល់ប្រជាការពារទាំងអស់ អំពីក្រមសីលធម៌ និងតួនាទីការពារដែលត្រូវអនុវត្តជាដើម។

ជាមួយគ្នានេះ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ក៏បានណែនាំនូវការងារជំនាញមួយចំនួនផងដែរ ដល់ស្នងការនគរបាលរាជធានី-ខេត្ត និងយកចិត្ដទុកដាក់ពង្រឹងការងារប្រចាំបញ្ជា, តាមដានព័ត៌មានតាមបណ្ដាញសង្គមដែលពាក់ព័ន្ធក្នុងមូលដ្ឋានរបស់ខ្លួន ហើយឆ្លើយតបឱ្យបានទាន់ពេលវេលា ទាន់សភាពការណ៍ និងមានចំណាត់ការរដ្ឋបាលឱ្យបានលឿន និងកែប្រែឥរិយាបថ ប្រើប្រាស់ពាក្យសម្ដីឱ្យបានសមរម្យជាមួយប្រជាពលរដ្ឋ ពិសេសមន្ដ្រីនគរបាលចរាចរណ៍ និងនគរបាលប៉ុស្ដិ៍រដ្ឋបាល។

ស្របពេលពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ក្នុងពេលឆាប់ៗខាងមុខនេះ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន ក៏បានជូនពរដល់កងកម្លាំងនគរបាលទូទាំងប្រទេស និងក្រុមគ្រួសារ ព្រមទាំងអតីតយុទ្ធជន សូមជួបតែសុខភាពល្អ សុភមង្គល និងជោគជ័យគ្រប់ភារកិច្ច ៕