កងទ័ពជប៉ុនបានអោយដឹងថា ឧទ្ធម្ភាគចក្រដែលដឹកសមាជិកនាវិក ១០ នាក់បានធ្លាក់ចូលសមុទ្រ
តូក្យូ៖ឧទ្ធម្ភាគចក្ររបស់កងទ័ពជប៉ុន ដែលបានបាត់ខ្លួន ដឹកសមាជិកនាវិក ១០នាក់ ត្រូវបានគេជឿថា បានធ្លាក់ចូលទៅក្នុងសមុទ្រ ពីកោះភាគខាងត្បូង បន្ទាប់ពីវត្ថុដែលមើលទៅដូចជាបំណែកយន្តហោះ ត្រូវបានគេប្រទះឃើញនៅក្នុងតំបន់នោះ។
ឧទ្ធម្ភាគចក្រ UH-60JA Black Hawk បានបាត់ពីរ៉ាដាកាលពីរសៀលថ្ងៃព្រហស្បតិ៍ ខណៈកំពុងបំពេញបេសកកម្មឈ្លបយកការណ៍ភាគខាងជើងនៃកោះ Miyako ប្រធានកងកម្លាំងស្វ័យការពារដី លោក Yasunori Morishita បាននិយាយនៅក្នុងសន្និសីទសារព័ត៌មានមួយ។លោកបាននិយាយថា កំទេចកំទីដែលគេជឿថាជាបំណែកយន្តហោះត្រូវបានគេប្រទះឃើញនៅក្នុងតំបន់ ចម្ងាយប្រហែល ១,៨០០ គីឡូម៉ែត្រ (១,១២០ ម៉ាយ) ភាគនិរតីនៃទីក្រុងតូក្យូ។
រដ្ឋាភិបាលកំពុងពង្រឹងសមត្ថភាពការពាររបស់ខ្លួននៅភាគនិរតីនៃប្រទេសជប៉ុន ដើម្បីឆ្លើយតបទៅនឹងសកម្មភាពយោធាដែលកាន់តែខ្លាំងឡើងរបស់ចិននៅក្នុងតំបន់ រួមទាំងតៃវ៉ាន់ផងដែរ។សារព័ត៌មានក្យូដូ បាននិយាយថា កប៉ាល់ឆ្មាំឆ្នេរសមុទ្រជប៉ុន ក៏បានរកឃើញដាននៃប្រេង ដែលអាចទាក់ទងនឹងឧទ្ធម្ភាគចក្រដែលបាត់នោះ ប៉ុន្តែក្រុមមន្ត្រីបានបដិសេធមិនបញ្ជាក់របាយការណ៍នេះទេ។លោក Morishita បាននិយាយថា ឧទ្ធម្ភាគចក្រនេះត្រូវបានឈរជើងនៅមូលដ្ឋានកងទ័ពក្នុងតំបន់ដ៏សំខាន់មួយនៅក្នុងខេត្ត Kumamoto នៅលើកោះ Kyushu ភាគខាងត្បូង ហើយសមាជិកនាវិកម្នាក់ក្នុងចំណោមសមាជិកនាវិកទាំង ១០ នាក់គឺមេបញ្ជាការកងពលគឺ Yuichi Sakamoto ។
Morishita បានអោយដឹងថា ឧទ្ធម្ភាគចក្របានបាត់ពីរ៉ាដាលឿនជាងការគិតពីមុន។
ទូរទស្សន៍សាធារណៈ NHK បាននិយាយមុននេះថា ឧទ្ធម្ភាគចក្របានបាត់ពីរ៉ាដាប្រហែលមួយម៉ោងបន្ទាប់ពីវាបានចាកចេញពីកោះ Miyako និងប្រហែលកន្លះម៉ោងមុនពេលវាត្រលប់មកវិញ។នាយករដ្ឋមន្ត្រី Fumio Kishida បាននិយាយថា ក្រសួងការពារជាតិកំពុងស៊ើបអង្កេត។
