សាលាមួយនៅវៀតណាម គ្រោងបង្កើនអាហារូបករណ៍ ៤៥កន្លែងថែមទៀត សម្រាប់និស្សិតកម្ពុជា ដែលរៀនជំនាញវិជ្ជាជីវៈ

ភ្នំពេញ៖ ឯកឧត្ដម អ៉ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានថ្លែងឱ្យដឹងថា សាលាមួយនៅប្រទេសវៀតណាម ដែលមានឈ្មោះថា សាលាថៃង្វៀន បាននឹងបង្កើនការផ្ដល់អាហារូបករណ៍ លើកម្រិតបរិញ្ញាបត្រវិស្វករ ៤៥កន្លែងថែមទៀត សម្រាប់និស្សិតកម្ពុជាដែលចង់រៀនជំនាញវិជ្ជាជីវៈ ក្នុងឆ្នាំ២០២៣។

គួរជម្រាបថា កន្លងមក សាលាថៃង្វៀនរបស់វៀតណាម បានផ្តល់អាហារូបករណ៍ជូននិស្សិតកម្ពុជាមកបន្តការសិក្សានៅទីនេះ ចំនួន១៨១នាក់រួចមកហើយ ហើយបច្ចុប្បន្ននេះកំពុងសិក្សាចំនួន១០៨នាក់ទៀត កម្រិតសញ្ញាបត្រជាន់ខ្ពស់/បរិញ្ញាបត្ររង។

ក្នុងពេលទស្សនកិច្ចនៅសាលាថៃង្វៀន នាព្រឹកថ្ងៃទី៦ ខែមេសា ឆ្នាំ២០២៣ ឯកឧត្ដម អ៉ិត សំហេង បានបញ្ជាក់ថា ការផ្តល់អាហារូបករណ៍ដល់សិស្សកម្ពុជាកន្លងមក ពិតជាបានជួយនិងបានផ្តល់ឱកាសដល់ពួកគេឱ្យទទួលបានជំនាញច្បាស់លាស់ និងជំនាញបច្ចេកទេស ដើម្បីយកទៅបម្រើការងារនៅកម្ពុជា ជាពិសេសបម្រើការងារនៅតាមរោងចក្រ សហគ្រាសរបស់អ្នកវិនិយោគិនវៀតណាមនៅកម្ពុជា។

ឆ្លើយតបចំពោះសំណូមពរឯកឧត្ដម អ៉ិត សំហេង, ក្រសួងការងារ ជនពិការ និងសង្គមកិច្ចវៀតណាម ព្រមទាំងថ្នាក់ដឹកនាំខេត្តថៃង្វៀន និងសាលាថៃង្វៀន នឹងបន្តផ្តល់អាហារូបករណ៍ជូននិស្សិតកម្ពុជាចំនួន៤៥កន្លែងថែមទៀត លើកម្រិតបរិញ្ញាបត្រ/កម្រិតវិស្វករ សម្រាប់ឆ្នាំ២០២៣នេះ។

ឯកឧត្ដម រដ្ឋមន្ត្រីទទួលបានបដិសណ្ឋាកិច្ចស្វាគមន៍យ៉ាងកក់ក្តៅដោយលោក Nguyen Ba Hoan អនុរដ្ឋមន្រ្តីក្រសួងការងារ ជនពិការ និងសង្គមកិច្ចវៀតណាម លោក Le Quang Tien សមាជិកគណៈកម្មការប្រតិបត្តិនៃគណៈកម្មការគណបក្សខេត្ត និងជាអភិបាលរងខេត្ត នៃគណៈកម្មការប្រជាជនខេត្តថៃង្វៀន និងថ្នាក់ដឹកនាំ មន្រ្តីរាជការ លោកគ្រូ អ្នកគ្រូ នៃសាលាថៃង្វៀនផងដែរ។

ជាកិច្ចថ្លែងអំណរគុណ ឯកឧត្ដមរដ្ឋមន្រ្តី អ៉ិត សំហេង បានស្នើសុំរាជរដ្ឋាភិបាលកម្ពុជាដ់ម្បីផ្តល់គ្រឿងឥស្សរយសជូនសាលាថៃង្វៀន ដើម្បីជាការលើកទឹកចិត្ត និងផ្តល់កិត្តិយសដល់ការខិតខំជួយបណ្តុះបណ្តាលធនធានមនុស្សកម្ពុជា៕