សម្តេចតេជោ ស្ងប់ស្ងែងនឹងការបំបែកឯកទគ្គកម្មបត់បេះដូងរហូតដល់ជិត៤លាន
ភ្នំពេញ៖ ក្នុងឱកាសអញ្ជើញជាអធិបតីភាពក្នុងពិធីបើកព្រឹត្តិការណ៍អង្គរសង្ក្រាន្ត ឆ្នាំ២០២៣ នាថ្ងៃទី១៤ ខែមេសា ឆ្នាំ២០២៣ នៅបរិវេណប្រាសាទបាយ័ន ខេត្តសៀមរាប សម្តេចតេជោ ហ៊ុន សែន នាយករដ្ឋមន្ត្រីបានកោតស្ងប់ស្ងែងចំពោះការបំបែកឯកទគ្គកម្ម «បត់បេះដូងរហូតដល់ជិត៤លាន» ហើយដាក់បង្ហាញនៅបរិវេណប្រាសាទអង្គរវត្តនោះ គឺជាការបង្ហាញឱ្យឃើញនូវការចូលរួមដ៏អស្ចារ្យរបស់ប្រជាជនកម្ពុជា និងបង្ហាញអត្ថន័យនៃសេចក្ដីស្រឡាញ់យ៉ាងស្រស់បំព្រង។
សម្ដេចតេជោពិតជាមានការរីករាយជាមួយនឹងការបត់បេះដូងច្រើនជាងគេនៅលើពិភពលោក ដែលមានចំនួនរហូតដល់៣,៩១៧,៨០៥បេះដូង គឺជាចំនួនមួយដ៏ច្រើន និងអាចនិយាយបានថាប្រជាជនកម្ពុជាចាប់អារម្មណ៍ និងចូលរួមក្នុងយុទ្ធនាការបំបែកឯកទគ្គកម្មនេះ។
សម្ដេចតេជោនាយករដ្ឋមន្ត្រីបានបញ្ជាក់ថា អ្នកដែលបានចូលរួមក្នុងយុទ្ធនាការនេះ គឺមានអាយុចាប់ពី៤-៨០ឆ្នាំ ដែលអាចចាត់ទុកថានេះជាការចូលរួមផ្ដល់នូវសេចក្ដីស្រឡាញ់យ៉ាងស្រស់បំព្រង។
សម្ដេចថា ពិភពលោកអាចយល់បានអំពីអត្ថន័យនៃបេះដូង គឺមិនមែនជាការចៃដន្យនោះទេ តែជាការគិតគូរដ៏ស៉ីជម្រៅមួយរបស់យុវជន-ប្រជាជនកម្ពុជា។
គួរជម្រាបថា បេះដូងក្រដាសដែលបានបត់ដោយប្រជាជនកម្ពុជាទូទាំងប្រទេស សម្រាប់កម្មវិធី «បេះដូងច្រើនជាងគេលើពិភពលោក» ត្រូវបានកត់ត្រាជាផ្លូវការចូលក្នុងកំណត់ត្រាពិភពលោក នៅវេលាម៉ោង៥៖១៧នាទីល្ងាច ថ្ងៃទី១១ ខែមេសា ឆ្នាំ២០២៣ ដែលមានចំនួនបេះដូងសរុប៣,៩១៧,៨០៥បេះដូង។ តួលេខនេះ គឺបំបែកកំណត់ត្រាចាស់របស់ចក្រភពអង់គ្លេសដែលកាលពីឆ្នាំ២០១៩ មានចំនួន៥៣,៧០៤បេះដូង៕
