ព្រះអគ្គីជ័យកីឡានឹងត្រូវដង្ហែទៅដល់ស្ថានទូតនៃព្រះរាជាណាចក្រកម្ពុជាប្រចាំនៅទីក្រុងបាងកក់ ព្រះរាជាណាចក្រថៃ នៅពីថ្ងៃទី១៥ ខែមេសា ឆ្នាំ ២០២៣
ថៃ៖ប្រតិភូបេសកជនពិសេសដឹកនាំដោយឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេសនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ និងកីឡាប៉ារ៉ាហ្គេមលើកទី ១២លោកបណ្ឌិតសាស្ត្រាចារ្យ សេង ប៊ុនសុង តំណាងគណៈកម្មាធិការជាតិកីឡាអូឡាំពិកកម្ពុជា និងសហការី បានធ្វើដំណើរចាកចេញពីប្រទសសិង្ហបុរី កាលពីរសៀលថ្ងៃទី ១៥ ខែមេសា ឆ្នាំ ២០២៣ ដោយអញ្ជើញចូលរួមជូនដំណើរពីសំណាក់ឯកឧត្តម សុខ ខឿន ឯកអគ្គរាជទូតព្រះរាជាណាចក្រកម្ពុជាប្រចាំនៅប្រទេសសិង្ហបុរី និងសហការី បន្ទាប់ពីការដង្ហែព្រះអគ្គីជ័យកីឡាប្រទេសសិង្ហបុរី បានប្រារព្ធពិធីដង្ហែប្រកបដោយភាពជោគជ័យ និងមោទកភាពកាលពីព្រឹកថ្ងៃទី១៥ ខែសីហាឆ្នាំ ២០២៣ កន្លងទៅនេះ ដោយមានការចូលរួមពីសំណាក់ថ្នាក់ដឹកនាំ និងកីឡាករ កីឡាការិនីសិង្ហបុរី ជាច្រើនរូប។
សូមជម្រាបជូនថាព្រះអគ្គីជ័យកីឡា និងភ្លើងគប់នឹងត្រូវដង្ហែនៅក្នុងទីក្រុងបាងកក់ ព្រះរាជាណាចក្រថៃ នៅថ្ងៃទី ១៧ ខែមេសា ឆ្នាំ២០២៣។
ព្រះអគ្គីជ័យកីឡាដែលត្រូវដង្ហែតាមបណ្ដាប្រទេសសមាជិកអាស៊ាន និងប្រទេសទីម័រឡេស្តេ គឺស្របពេលដែលកម្ពុជាធ្វើជាម្ចាស់ផ្ទះនៃការរៀបចំការប្រកួតកីឡាស៊ីហ្គេមលើកទី ៣២ ដែលនឹងត្រូវប្រារព្ធពិធីបើកនៅថ្ងៃទី ៥ ខែឧសភា ឆ្នាំ ២០២៣ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពីត្រូវបានប្រតិភូបេសកជនពិសេសធ្វើការដង្ហែជុំវិញបណ្ដាប្រទេសជាសមាជិកអាស៊ាន និងប្រទេសទទីម័រឡេស្តេ ព្រមទាំងហែរជុំវិញបណ្ដាខេត្តដែលនៅជាប់នឹងបឹងទន្លេសាបនៃព្រះរាជាណាចក្រកម្ពុជារួច៕
