អភិបាលខេត្តកំពង់ឆ្នាំង គោរពអរគុណសម្ដេចតេជោដែលបានផ្ដល់រថយន្តក្រុងដឹកជញ្ជូនប្រជាពលរដ្ឋដោយឥតគិតថ្លៃក្នុងពិធីបុណ្យចូលឆ្នាំថ្មី

ភ្នំពេញ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោកជំទាវ រួមជាមួយលោកជំទាវ កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង លោកជំទាវសមាជិកក្រុមប្រឹក្សាខេត្ត និងក្រុមការងារ នាព្រឹកថ្ងៃទី១៧ ខែមេសា ឆ្នាំ២០២៣ បានចុះសួរសុខទុក្ខ និងនាំយកថវិកាឧបត្ថម្ភជូនក្រុមអ្នកបើកបររថយន្តក្រុងដឹកជញ្ជូនប្រជាពលរដ្ឋ កម្មករ កម្មការិនីដោយឥតគិតថ្លៃពីខេត្តកំពង់ឆ្នាំង និងរាជធានីភ្នំពេញ និងបានឧបត្ថម្ភថវិកា និងសារុងជូនអ្នកបើករថយន្តតាក់ស៊ី និងបងប្អូនប្រជាពលរដ្ឋ កម្មករ កម្មការិនីអ្នកធ្វើដំណើរផងដែរ។

ឆ្លៀតក្នុងឱកាសនេះ ឯកឧត្តមអភិបាលខេត្ត ក៏បានគោរពថ្លែងអំណរគុណយ៉ាងជ្រាលជ្រៅជាទីបំផុតជូនចំពោះសម្ដេចតេជោ នាយករដ្ឋមន្ត្រី ដែលបានផ្ដល់រថយន្តក្រុងដឹកជញ្ជូនបងប្អូនប្រជាពលរដ្ឋ កម្មករ កម្មការិនីដោយឥតគិតថ្លៃ ជួយសម្រួលដល់ការចំណាយជូនបងប្អូនក្នុងការធ្វើដំណើរមកលេងស្រុកកំណើត ជួបជុំបងប្អូនក្រុមគ្រួសារ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ។

អំណោយ និងថវិកាដែលបានឧបត្ថម្ភរួមមាន ឧបត្ថម្ភថវិកាចំនួន ២លានរៀលជូនក្រុមអ្នក​បើកបរ​រថយន្តក្រុង​ឥតគិតថ្លៃ ឧបត្ថម្ភជូនអ្នកបើករថយន្តតាក់ស៊ីចំនួន ១២នាក់ ក្នុងម្នាក់ៗទទួលបានថវិកា ១១ម៉ឺនរៀល និងសារុង១ និងឧបត្ថម្ភជូនបងប្អូនប្រជាពលរដ្ឋ កម្មករ កម្មការិនីអ្នកធ្វើដំណើរក្នុងម្នាក់ៗទទួលបានថវិកា ១ម៉ឺនរៀល និងសារុង១ ៕