ឧត្តមសេនីយ៍ត្រី សេង មហា ប្រកាសតែងតាំង ផ្លាស់ប្តូរមុខតំណែង និងបំពាក់ឋានន្តរសក្តិជូនយោធិន នៃកងរាជអាវុធហត្ថខេត្តតាកែវ ៨០រូប

ភ្នំពេញ៖ នៅថ្ងៃទី១៨ ខែមេសា ឆ្នាំ២០២៣នេះ ទីបញ្ជាការដ្ឋានកងរាជអាវុធហត្ថខេត្តតាកែវ បានរៀបចំពិធីប្រកាសតែងតាំង ផ្លាស់ប្តូរមុខតំណែង និងបំពាក់ឋានន្តរសក្តិជូនយោធិន នៃកងរាជអាវុធហត្ថខេត្តតាកែវ ចំនួន ៨០រូប ។

ពិធីនេះស្ថិតក្រោមអធិបតីភាពលោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ និងលោកមេបញ្ជាការរង និង ប្រធាន អនុប្រធានមន្ទីរ និងយោធិនកងរាជអាវុធហត្ថចូលរួមយ៉ាងច្រើនផងដែរ ។

ថ្លែងនៅក្នុងពិធីប្រកាសតែងតាំងផ្លាស់ប្តូរមុខតំណែង និងបំពាក់ឋានន្តរស័ក្តជូនយោធិន កងរាជអាវុធហត្ថខេត្តតាកែវ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត បានធ្វើការកោតសរសើរចំពោះកងកំលាំងលើស្មារតីរួមរបស់អង្គភាព ដែលមន្ត្រីកងរាជអាវុធហត្ថរបស់យើងបានខិតខំបំពេញភារៈកិច្ច ការការពារសន្តិសុខសណ្តាប់ធ្នាប់ជូនបងប្អូនប្រជាពលរដ្ឋបានយ៉ាងល្អប្រសើរ បើទោះបីជាមានបទល្មើសមានការកើនឡើងនៅក្នុងខេត្ត នៅកំរិតណាក៏ដោយ តែកំលាំងកងរាជអាវុធហត្ថយើងគឺធ្វើការបង្ក្រាបនិងទុបស្កាត់បានទាន់ពេលវេលា ។

មួយវិញទៀតចំពោះមន្ទីរក៏សាងកំលាំងត្រូវតែពិនិត្យមើលលទ្ធភាពចំពោះមន្ត្រីកងរាជអាវុធហត្ថរបស់យើង ដែលពួកគាត់មានអតីតភាពបម្រើការងារយូរឆ្នាំត្រូវរៀបចំធ្វើការស្នើសុំតំឡើងឋានន្តរស័ក្តជូនពួកគាត់ ដោយមិនត្រូវទុកអោយគាត់ក្រិនស័ក្តនោះទេ បើពុំដូច្នេះទេមន្ត្រីរបស់យើងអាចនឹងឆាប់ចូលនិវត្តន៍ទាំងដែលពួកគាត់ជាមន្ត្រីយោធិនកងរាជអាវុធហត្ថពរពេញដោយសមត្ថភាពនៅក្នុងមូលដ្ឋាន ៕